རིང་མིན་ཕོ་བྲང་པོ་ཏ་ལར་ཞབས་སོར་འཁོད་ཐུབ་པའི་ཐུགས་རེ་ཡོད་ཅེས་བཀའ་སྩལ་བ།

ལོ་ལྟར་ས་ག་ཟླ་བའི་རིང་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་མ་ཎི་དུང་སྒྲུབ་སྨིན་ཚོགས་གནང་སྲོལ་ཡོད་པ་བཞིན། ཕྱི་ཟླ་ ༥ པའི་ཚེས་ ༢༠ དང་། བོད་ཟླ་ ༤ པའི་ཚེས་ ༡ ཉིན་གྱི་སྔ་དྲོ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མ་ཎི་དུང་སྒྲུབ་ཀྱི་ཚོགས་མགོན་དུ་ཆིབས་བསྒྱུར་བཀའ་དྲིན་བསྐྱངས་ཏེ། མ་ཎི་རིལ་བུ་དག་ལ་ཕྱག་བྱིན་དང་བསྔོ་སྨོན་མཛད་རྗེས། བཀའ་སློབ་ཕེབས་གསལ། རིང་མིན་མགོན་པོ་གང་ཉིད་མཆོག་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏ་ལར་ཞབས་སོར་འཁོད་ཐུབ་པའི་ཐུགས་རེ་ཡོད་པའི་སྐོར་བཀའ་གནང་སོང་། 

ཡང་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས། སྤྱན་རས་གཟིགས་ནི་བོད་གངས་ཅན་ལྗོངས་ཀྱི་ལྷ་སྐལ་ཡིན་ལ། བོད་མི་རྒན་གཞོན་ཚང་མས། སྤྱན་རས་གཟིགས་ལ་གསོལ་བ་གདབ་རྒྱུ་ནི་རང་བཞིན་གྱི་བག་ཆགས་ཟབ་མོ་བཞག་ཡོད། ལྷག་པར་དུ་བོད་མིའི་སེམས་རྒྱུད་ལ་ཡོད་པའི་སེམས་བཟང་པོ་བྱ་རྒྱུའི་གོམས་གཤིས་དེ་མུ་མཐུད་ཉར་དགོས་པ་བཀའ་གནང་སོང་། 

སྤྱིར་བོད་ཟླ་བཞི་པར་ས་ག་ཟླ་བའམ་འབུམ་འགྱུར་ཟླ་བ་ཟེར་ཞིང་། ས་ག་ཟླ་བའི་ཚེས་བཅོ་ལྔ་ཉིན་ནི་སྟོན་པ་བཅོམ་ལྡན་འདས་སྐུ་བལྟམས་པ་དང་། སངས་རྒྱས་པ། མྱ་ངན་ལས་འདས་པ་བཅས་དུས་ཆེན་གསུམ་འཛོམས་ཀྱི་དུས་ཁྱད་པར་ཅན་གྱི་ཉིན་མོ་ཞིག་ཡིན་ཞིང་། ཟླ་བ་འདིའི་ནང་སྡིག་སྤོང་དགེ་སྒྲུབ་ཀྱི་ལས་ལ་བརྩོན་ན་རླབས་ཆེན་གྱི་ཕན་ཁྱད་ཡོད་པ་གསུང་སྲོལ་ཡོད་པ་བཞིན། ༸གོང་ས་༸སྐྱབས་མགོན་ཆེན་པོ་མཆོག་གིས། ས་ག་ཟླ་བའི་སྐབས་མ་ཎི་གསོག་སྒྲུབ་ཀྱི་ཕན་ཡོན་སྐོར་བཀའ་གནང་བ་དང་སྦྲགས། རྒྱུན་དུ་བྱང་ཆུབ་ཀྱི་སེམས་ཉམས་ལེན་བྱས་ཏེ། སེམས་པ་བཟང་པོ་བྱ་རྒྱུ་ནི་ཆོས་ཀྱི་སྙིང་པོ་ཡིན་པ་བཀའ་གནང་སོང་། 

ཡང་༸གོང་ས་༸སྐྱབས་མགོན་ཆེན་པོ་མཆོ་གིས། བོད་ཀྱི་སངས་རྒྱས་པའི་ཆོས་དེ་དེང་སྐབས་འཛམ་གླིང་གི་སྤྱི་ནོར་དུ་གྱུར་ཡོད་པར་མ་ཟད། ཚན་རིག་པ་ཚུད་པའི་འཛམ་གླིང་ཡོངས་ཀྱིས་དོ་སྣང་བྱེད་ཡུལ་ཞིག་ཏུ་གྱུར་ཡོད། བོད་བརྒྱུད་ནང་བསྟན་དེ་བཞིན་རྨོངས་དད་ཀྱི་ཆོས་ལུགས་ཤིག་མིན་པར། རིགས་པའི་ལམ་ནས་དཔྱད་པ་བྱ་རྒྱུ་ཡོད་པའི་ཆོས་ལུགས་ཤིག་ཡིན་པའི་ཁར་། ལྷག་དོན་དུ་སེམས་འདུལ་ཏེ། འདུན་པ་གཉིས་ལྡན་གྱི་སེམས་བསྐྱེད་རྒྱུའི་ཐད་ཧ་ཅང་གཏིང་ཟབ་མོ་གསལ་ཡོད་པས། ཚང་མས་ཧུར་ཐག་བྱས་ཏེ་ཆོས་ལུགས་བཟང་པོ་དེ་མུ་མཐུད་རྒྱུན་འཛིན་གནང་དགོས་པ་གལ་གནད་ཆེ་བའི་སྐོར་བཀའ་གནང་སོང་། 

གཞན་ཡང་མ་ཎི་དུང་སྒྲུབ་ཅེས་པ་ནི་ས་ག་ཟླ་བའི་སྐབས་མ་ཎི་དུང་ཕྱུར་གཅིག་གསོག་སྒྲུབ་གནང་དགོས་པ་དང་། དེ་ལས་མང་བ་གསོག་སྒྲུབ་ཐུབ་ན་མཆོད་པའི་རྒྱན་དུ་གྱུར་པའི་རླབས་ཆེན་གྱི་ཆོས་ཕྱོགས་བྱེད་སྒོ་ཞིག་ཡིན་ཞིང་། འདི་ལོའི་བཞུགས་སྒར་ཁུལ་དུ་མ་ཎི་དུང་སྒྲུབ་དེ་བཞིན་ས་ག་ཟླ་བའི་ཚེས་ ༡ ནས་ཚེས་ ༨ བར་ཉིན་གྲངས་བརྒྱད་རིང་འཕགས་པ་སྤྱན་རས་གཟིགས་ཀྱི་ཆོ་གའི་སྒོ་ནས་གསོག་སྒྲུབ་གནང་གི་ཡོད་པ་རེད།

གསར་འགོད་པ། བློ་བཟང་དགེ་ལེགས། 
རྩོམ་སྒྲིག་པ། ཡེ་ཤེས་ཟླ་བ།
དྲྭ་ཐོག་སྤེལ་མཁན། ཡེ་ཤེས་ཟླ་བ།