༧གོང་ས་མཆོག་གིས་སྙིང་རྗེ་དང་ཀུན་ཁྱབ་འགན་ཁུར་ཐད་བཀའ་སློབ།

༧གོང་ས་མཆོག་གིས་རྒྱ་གར་གྱི་རྒྱལ་ས་ལྡི་ལིར་ཡོད་པའི་ཨ་མི་རི་ཀའི་གཞུང་ཚབ་ཀྱི་སློབ་གྲྭའི་དགེ་ལས་ཡོངས་ལ་སྙིང་རྗེ་དང་ཀུན་ཁྱབ་འགན་འཁུར་ཐད་བཀའ་སློབ་གནང་སྐབས། ༢༠༡༦།༤།༨

སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་རྒྱ་གར་གྱི་རྒྱལ་ས་ལྡི་ལིར་ཡོད་པའི། ཨ་མི་རི་ཀའི་གཞུང་ཚབ་ཀྱི་སློབ་གྲྭའི་དགེ་ལས་ཡོངས་ལ་བྱམས་བརྩེ་ནི་འཛམ་གླིང་འདིའི་ནང་རང་གཞན་གཉིས་ཀ་ཞི་བདེའི་ངང་འཚོ་གནས་ཡོང་རྒྱུར་མེད་དུ་མི་རུང་བའི་ཆ་རྐྱེན་ཡིན་པ་སོགས་སྙིང་རྗེ་དང་ཀུན་ཁྱབ་འགན་འཁུར་ཐད་བཀའ་སློབ་གསུང་བཤད་སྩལ་གནང་མཛད་འདུག།
དེ་ཡང་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་ ཕྱི་ཟླ་༤་ཚེས་༨་ཉིན་གྱི་སྔ་དྲོ་རྒྱ་གར་གྱི་རྒྱལ་ས་ལྡི་ལིའི་ནང་ཡོད་པའི་ཨ་མི་རི་ཀའི་གཞུང་ཚབ་ཀྱི་སློབ་གྲྭའི་དགེ་ལས་ཐོུང་ལ། བྱམས་བརྩེ་ནི་འཛམ་གླིང་འདིའི་ནང་རང་གཞན་གཉིས་ཀ་ཞི་བདེའི་ངང་འཚོ་གནས་ཡོང་རྒྱུར་མེད་དུ་མི་རུང་བའི་ཆ་རྐྱེན་ཞིག་ཡིན་པ་བཀའ་གནང་པ་དང་། གཞན་གྱི་སྡུག་བསྔལ་འཁུར་དུ་བླངས་རྒྱུ་ནི། འཇིག་རྟེན་བདེ་སྐྱིད་ཀྱི་རྨང་གཞི་ཞིག་ཡིན་པ་བཀའ་གནང་འདུག
དེ་བཞིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས། འདས་པ་ནི་ཡོལ་ཟིན་པ་ཞིག་ཡིན་པ་དང་། མ་འོངས་པའི་མདུན་ལམ་བཟང་པོ་ཞིག་དང་བདེ་སྐྱིད་ལྡན་པ་ཞིག་བཟོ་རྒྱུ་ནི། སློབ་མ་ཁྱེད་རྣམས་ལྟ་བུ་དུས་རབས་ཉི་ཤུ་རྩ་གཅིག་པའི་མི་རབས་ལ་ལས་འགན་ཆེན་པོ་ཞིག་ཡོད་པ་བཀའ་གནང་ཡོད་པ་རེད།  
༧གོང་ས་༧་སྐྱབས་མགོན་ཆེན་པོ་མཆོག་གི་རྒྱ་གར་གྱི་རྒྱལ་ལྡི་ལིའི་ནང་གི་མཛད་འཆར་གཙོ་བོ་ནི། ཆོས་ལུགས་དང་མ་འབྲེལ་བའི་ཐོག་ནས་ཡ་རབས་སྤྱོད་བཟང་གོང་འཕེལ་གཏོང་ཐབས་སུ་སློབ་གྲྭའི་ཤེས་ཡོན་གྱི་ལམ་ལུགས་ནང་། སློབ་ཚན་གྱི་ངོ་བོའི་ཐོག་ནས་སློབ་གསོ་སྤྲོད་ཕྱོགས་དང་། སློབ་ཚན་གཏན་འབེབས་གནང་ཕྱོགས་ཐད་ཕྱི་ནང་གི་མཁས་པ་ཁག་ཅིག་དང་དཔྱད་བསྡུར་བགྲོ་གླེང་མཛད་རྒྱུ་ཡིན་པ་བཞིན་ཁ་ས་ཚེས་༧ཉིན། རྒྱ་གར་གྱི་རྒྱལ་ས་ལྡི་ལི་གསར་པར་རྟེན་གཞི་བྱེད་པའི་ཤེར་ཊོན་Sheritonགསོལ་མགྲོན་ཁང་དུ། ༧གོང་ས་མཆོག་དབུ་བཞུགས་ཐོག་བགྲོ་གླེང་ཚོགས་འདུ་ཚོགས་ཡོད་པ་རེད།  
བགྲོ་གླེང་ཚོགས་འདུའི་ནང་། ནང་ཆོས་དང་ཤེས་ཡོན་ཐོག་མཁས་པ་བོད་རིགས་དང་། རྒྱ་གར་གཙུག་ལག་སློབ་གྲྭ་ཁག་ནས་མཁས་དབང་དང་། ཤེས་ལྡན་མི་སྣ་བརྒྱ་ཙམ་མཉམ་བཞུགས་གནང་པའི་ཐོག་ཨ་རིའི་Emory་གཙུག་ལག་སློབ་གཉེར་ཁང་གིས་༢༠༡༥་ལོར་འདོན་སྤེལ་བྱས་པའི་Secular Ethics in Education་འམ་ཤེས་ཡོན་སློབ་གསོའི་ནང་ཆོས་དང་འབྲེལ་བ་མེད་པའི་བཟང་སྤྱོད་ཅེས་པའི་སློབ་གཞི་ལག་བསྟར་བྱ་ཕྱོགས་ཐད་བགྲོ་གླེང་གནང་ཡོད་པ་རེད།

གསར་འགོད་པ་དོན་གྲུབ་རྣམ་རྒྱལ།