༧གོང་ས་མཆོག་གིས་ལྡི་ལི་ནས་མཐུན་སྒྲིལ་མཉམ་གནས་ཐད་བཀའ་སློབ་སྩལ་འདུག
2018.12.10
༧གོང་ས་མཆོག་གིས་ལྡི་ལིར་དཔལ་འབྱོར་དང་ཚོང་པའི་ལས་རིགས་ཀྱི་ཆེད་ལས་བ་ཁག་ཅིག་ལ་མཇལ་འཕྲད་བཀའ་སློབ་སྩལ་གནང་སྐབས། ༢༠༡༨།༡༢།༡༠
སངས་རྒྱས་རྒྱ་མཚོ། /RFA
༧གོང་ས་མཆོག་གིས་ལྡི་ལིར་དཔལ་འབྱོར་དང་ཚོང་པའི་ལས་རིགས་ཀྱི་ཆེད་ལས་བ་ཁག་ཅིག་ལ་མཇལ་འཕྲད་བཀའ་སློབ་སྩལ་གནང་འདུག
དེ་ཡང་སྤྱི་ཟླ་༡༢་ཚེས་༡༠་ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་རྒྱ་གར་གྱི་རྒྱལ་ས་ལྡི་ལིའི་(ITC Maurya)་གསོལ་མགྲོན་ཁང་དུ། རྒྱ་གར་དཔལ་འབྱོར་དུས་བབ་གསར་ཁང་གིས་གོ་སྒྲིག་འོག་ཏུ་ལྡི་ལིའི་ནང་གི་དཔལ་འབྱོར་དང་ཚོང་པའི་ལས་རིགས་ཀྱི་མི་སྣ་དྲུག་ཅུ་ལྷག་ལ་འཛམ་གླིང་ཐོག་གི་མི་གྲངས་ཐེར་འབུམ་བདུན་དང་། ཆོས་ལུགས་འདྲ་མིན་ཡོད་པ་རྣམས་མཉམ་གཅིག་ཏུ་མཐུན་སྒྲིལ་ངང་གནས་ཐུབ་པའི་ཐབས་ལམ་ཞེས་པའི་བརྗོད་གཞིའི་ཐོག་བཀའ་སློབ་གནང་ཡོད་པ་དང་། ཐོག་མར་འགོ་འཛིན་གནང་མཁན་དག་གིས་དེ་རིང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་༢༩་འཁོར་བར་རྟེན་འབྲེལ་ཞུས་པ་དང་སྦྲགས་ཏེ་འཛམ་གླིང་ནང་དུ་༧གོང་ས་མཆོག་གིས་བྱམས་དང་། སྙིང་རྗེ་ལ་སོགས་པའི་ཞི་བདེ་དང་མིའི་རིགས་ཀྱི་བཟང་སྤྱོད་དར་སྤེལ་གནང་བའི་མཛད་རྗེས་ལ་བསྔགས་བརྗོད་གནང་ཡོད་པ་རེད།
དེ་ནས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་གསུངས་དོན། འཛམ་གླིང་འདིར་རང་བྱུང་གི་འབྱུང་བ་བཞིའི་གནོད་པ་ལ་སོགས་མང་བོ་ཞིག་ཡོད་པར་མ་ཟད། མིས་བཟོས་པའི་དཀའ་ངལ་མང་དག་ཅིག་ཀྱང་འབྱུང་གི་ཡོད་པ་རེད། སྤྱིར་མིའི་ལྷན་སྐྱེས་ཀྱི་རང་བཞིན་དེ་བྱམས་དང་སྙིང་རྗེའི་ངོ་བོ་ཡིན་པ་ནི་ཚན་རིག་པ་དག་གིས་འགྲེལ་བཤད་བྱེད་ཀྱི་ཡོད་པ་དང་། མི་ཐེར་འབུམ་བདུན་ཡོད་པ་ཚང་མ་ཨ་མའི་བྱམས་སྐྱོང་གི་འོག་ནས་འཚར་ལོངས་བྱུང་བ་གཅིག་པ་ཡིན་པས་མིའི་རང་བཞིན་དེ་བརྩེ་བ་ཡིན་པའི་རྒྱུ་མཚན་གྱིས་ང་ཚོས་འཛམ་གླིང་འདིར་ཞི་བདེ་ཞིག་བསྐྲུན་ཐུབ་པའི་རེ་བ་ཡོད་པ་སོགས་གསུངས་བ་དང་། འཛམ་གླིང་འདིར་མི་ཚང་མ་གཅིག་གྱུར་དང་བྱམས་དང་སྙིང་རྗེའི་ངོ་བོ་ཡིན་ནའང་ཚོགས་པ་ཆེ་ཆུང་གི་ནང་དུ་ང་ཚོ་དང་ཁྱེད་ཚོ་ལ་སོགས་པའི་ལྟ་བ་བཟུང་བ་ལ་བརྟེན་ནས་ཕན་ཚུན་ལ་འཚེ་བ་མང་པོ་བྱེད་ཀྱི་ཡོད་པ་ནི་བསམ་བློ་གུ་དོག་པའི་གནས་སྟངས་ཡིན་པ་དང་ཆོས་ལུགས་མི་འདྲ་བ་དང་རྒྱལ་ཁབ་མི་འདྲ་བའི་དབྱེ་བ་མེད་པའི་སྒོ་ནས་གཅིག་གྱུར་གྱི་བསམ་བློ་བཟུང་སྟེ་མིའི་རིགས་ཀྱི་སེམས་ཀྱི་རིན་ཐང་དང་ཕན་ཚུན་ལ་རོགས་རམ་བྱེད་པའི་ལྟ་བ་འཛིན་རྒྱུ་དེ་གལ་ཆེན་ཡིན་པ་སོགས་གསུངས་འདུག
༧གོང་ས་སྐྱབས་མགོན་ཆེན་པོ་མཆོག་གིས་འཛམ་གླིང་མི་མང་གིས་མཐུན་སྒྲིལ་དང་རོགས་རམ་གྱི་འདུ་ཤེས་བཟུང་སྟེ་དོན་དམ་པའི་མཛའ་འབྲེལ་དང་ཕན་ཚུན་བར་ལ་ཡིད་ཆེས་གནང་དགོས་པ་ལ་སོགས་ཀྱི་སྐོར་གསུངས་ཡོད་པ་རེད།
གསར་འགོད་པ་སངས་རྒྱས་རྒྱ་མཚོ།
བལྟ་བཤེར་མང་ཤོས་བྱས་པའི་གནས་ཚུལ།
RFA
- ཨ་རིའི་གཞུང་ངོས་ནས་རྒྱ་ནག་དང་ལྷན་ཚོང་འབྲེལ་གྲོས་མོལ་བྱས་ཚེ་རྒྱ་ནག་གིས་ཨ་རིའི་ཅ་དངོས་ཐོག་སྒོ་ཁྲལ་གུ་ཡངས་གཏང་རྒྱུ་ཡིན་པ་བརྗོད་འདུག
- རྒྱ་ནག་གཞུང་གི་བཀོད་བྱུས་འོག་གཞུང་འབྲེལ་མིན་པའི་ཚོགས་པས་མཉམ་འབྲེལ་རྒྱལ་ཚོགས་སུ་འགྲོ་བ་མིའི་ཐོབ་ཐང་གི་གནད་དོན་ཐད་ཐེ་བྱུས་བྱེད་བཞིན་ཡོད་སྐོར་སྙན་ཐོའི་གསར་པའི་ནང་གསལ་སྟོན།
- བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་ཨ་རིར་གཞུང་འབྲེལ་ཕྱོགས་ཕེབས་དང་འབྲེལ་ཨ་རིའི་བོད་དོན་དམིགས་བསལ་འབྲེལ་མཐུད་པ་བསྐོ་གཞག་དགོས་པའི་འབོད་སྐུལ་ཞུས་འདུག
- ༸གོང་ས་༸སྐྱབས་མགོན་ཆེན་པོའི་གསེར་ཁྲི་མངའ་གསོལ་མཛད་སྒོའི་སྐབས་ཀྱི་གནས་སྟངས་གསལ་བའི་ཆུ་ཚོན་རི་མོ་ངོ་མ་ ༤༠ ཚོང་སྒྱུར་གནང་རྒྱུ་རེད་འདུག
- བཙན་བྱོལ་ནང་གི་མི་རབས་གཞོན་པ་རྣམས་ལ་བོད་ནང་གི་ཛ་དྲག་གནས་སྟངས་ངོ་སྤྲོད་བྱ་ཆེད། སྙིང་སྟོབས་ཀྱི་འབོད་སྒྲ ཅེས་པའི་གཏམ་བརྗོད་གཟིགས་འབུལ་ཞུ་བཞིན་འདུག
བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
- བྱེས་ཀྱི་གདན་ས་བཀྲིས་ལྷུན་པོ་གཙོས་པའི་བོད་མི་གནས་སྡོད་ས་གནས་ཁག་ཏུ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་སྲུང་བརྩི་ཞུས།
- ཌེ་ལྦེཌ་པར་ཌུ་ལགས་ཨ་རིའི་རྒྱ་ནག་གི་གཞུང་ཚབ་ཆེན་མོར་བསྐོ་གཞག་གནང་གཏན་འཁེལ་འདུག
- རྒྱ་ནག་དང་རྒྱ་གར་གཉིས་གྲོས་མོལ་གྱིས། རྒྱ་གར་གྱི་གནས་སྐོར་བ་རྣམས་བོད་ནང་གངས་རིན་པོ་ཆེར་གནས་མཇལ་དུ་བསྐྱོད་རྒྱུ་བསྐྱར་དུ་སྒོ་འབྱེད་རྒྱུ་རེད་འདུག
- ༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་པ་ ༣༠༠ ལྷག་ལ་མང་མཇལ་སྩལ་བ།
- ལྷོ་ཀོ་རི་ཡའི་མི་སྒེར་གྱི་གནས་ཚུལ་སྲུང་སྐྱོབ་ལྟ་ཞིབ་ཁང་གིས་ཌིབ་སིག་གིས་ལྷོ་ཀོ་རི་ཡའི་མི་ས་ཡ་༡.༥ཡི་གནས་ཚུལ་ཁྲིམས་འགལ་ཐོག་རྐུ་ཁྱེར་བྱེད་བཞིན་པ་གསལ་སྟོན་བྱས་འདུག