༧གོང་ས་མཆོག་ནས་ཝར་ཎའི་ཆོས་འབྲེལ་མཇུག་བསྒྲིལ།

༄༅། ། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་ཝ་ར་ཎ་སིར་སྩལ་བཞིན་པའི་དེ་རིང་ཆོས་འབྲེལ་གྱི་ཉིན་མཐའ་མའི་ཐོག་བཀའ་སློབ་གནང་སྐབས།    སངས་རྒྱས་ཀྱི་བསྟན་པ་ལུང་རྟོགས་ཀྱི་བསྟན་པ་གཉིས་ཡོད་པ་དང་། དེ་ལྟ་བུའི་ལུང་རྟོགས་ཀྱི་བསྟན་པ་ཉམས་པ་སོར་ཆུད་དང་།    མི་ཉམས་གོང་འཕེལ་ཐབས་གང་གི་བྱེད་དགོས་ཟེར་ན། བཤད་པ་དང་སྒྲུབ་པའི་ཐོག་ནས་བསྟན་པ་འཛིན་སྐྱོང་སྤེལ་གསུམ་བྱེད་དགོས། དགོན་པ་དང་ལྷ་སྐུ་ཆེན་པོ་བཞེངས་པས་རྩ་བའི་བསོད་ནམས་ཅུང་གསོག་གི་ཡོད་ཀྱང་བསྟན་པ་ཉམས་པ་སོར་ཆུད།    མི་ཉམས་གོང་འཕེལ་གྱི་བསྟན་པའི་ཞབས་འདེགས་སྒྲུབ་ཟེར་བ་ནོར་འཁྲུལ་ཡིན། དགོན་པ་གཙུག་ལག་ཁང་དེ་ཚོའི་ནང་སངས་རྒྱས་ཀྱི་ཆོས་བཀའ་འགྱུར་དང་བསྟན་འགྱུར་དེ་དག་འཆད་ཉན་གྱི་སློབ་སྦྱོང་བྱེད་མཁན་དགོས་རྒྱུ་གལ་ཆེན་པོ་ཡིན། ཞེས་སོགས་བཀའ་སློབ་ཕེབས་རྗེས་ཆོས་ཞུ་བ་ཁྱིམ་པ་ཕོ་མོ་རྣམས་ལ་དགེ་བསྙེན་སྡོམ་པ་འབོག་འཇོགས་དང་།    དད་ལྡན་ཆོས་ཞུ་བ་ཡོངས་ལ་འཕགས་པ་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་གི་དབང་ཆེན་བཀའ་དྲིན་བསྩལ་གནང་མཛད་ཡོད་པ་རེད།    ཕྱོགས་མཚུངས་ཆོས་འབྲེལ་གོ་སྒྲིག་ཚོགས་ནས་ཆོས་ཞུ་བ་ཡོངས་ཀྱི་ཚབ་ཞུས་ཏེ།    བཀའ་དྲིན་གཏང་རག་གི་གི་ཚུལ་དུ་བརྟན་བཞུགས་འདེགས་འབུལ་ཞུས་ཡོད་པ་རེད།།