དཀའ་ངལ་ཉུང་དུ་གཏོང་དགོས་ན་བཟང་སྤྱོད་ངེས་པར་དུ་དགོས།

༧གོང་ས་མཆོག་གིས་གསར་འགོད་པའི་དྲི་བར་བཀའ་ལན་གནང་བ་དང་བདེ་བ་དང་བདེ་བའི་རྒྱུ་ཞེས་བའི་བརྗོད་གཞིའི་ཐོག་བཀའ་སློབ་གནང་བ།
དེ་ཡང་བོད་མིའི་བླ་ན་མེད་པའི་དབུ་ཁྲིད་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཨོ་སི་ཌོ་ལི་ཡའི་Leara Blue Mountainsཞེས་པའི་ས་ཁུལ་དུ་དཔལ་རྡོ་རྗེ་འཇིགས་བྱེད་དང་གསང་བ་འདུས་པ་སོགས་ཉིན་ལྔའི་ཆོས་འབྲེལ་ཁག་ཁ་ས་ལེགས་པར་གྲུབ་ཡོད་པ་དང་། ཉིན་གུང་གསོལ་ཚིགས་བར་སེང་སྐབས་ཨོ་སི་ཌོ་ལི་ཡའི་Sydney Morning Heraldཞེས་པའི་གསར་ཤོག་གི་གསར་འགོད་པ་Eryk Bagshawལགས་ཀྱིས་༧གོང་ས་སྐྱབས་མགོན་ཆེན་པོ་མཆོག་ལ་བཟང་སྤྱོད་ཀྱི་ཤེས་ཡོན་སྐོར་བཀའ་འདྲི་འཁྱུག་ཙམ་ཞུས་འདུག གསར་འགོད་པ་Bagshawལགས་ཀྱིས། སྒྲིག་འཛུགས་ཡོད་པའི་ཆོས་ལུགས་ཁག་གིས་ཆོས་ལུགས་རིས་མེད་འཛིན་པའི་ལྟ་བ་ལ་ཞེད་སྣང་བྱེད་དགོས་ཡོད་མེད་བཀའ་འདྲི་ཞུས་པར། ༧གོང་ས་སྐྱབས་མགོན་ཆེན་པོ་མཆོག་གིས། དེ་ནི་ཁྱེད་རང་གིས་ཆོས་ལུགས་རིས་མེད་ཞེས་པའི་གོ་དོན་འགྲེལ་བཤད་རྒྱབ་སྟངས་ལ་རག་ལུས་ཀྱི་རེད་ཅེས་བཀའ་ལན་གནང་འདུག ཡང་ཁོང་གིས་ང་ལ་ནུབ་ཕྱོགས་པའི་གྲོགས་པོ་ཞིག་ཡོད་པ་ཁོང་གིས་ཆོས་ལུགས་རིས་མེད་ཅེས་པ་དེ་ཆོས་ཁས་མི་ལེན་མཁན་ཡིན་པའི་བློ་འཚབ་བྱེད་ཀྱི་འདུག་ལ་ཁོང་ཚོས་ཆོས་ལུགས་རིས་མེད་ཅེས་པ་དེ་དཀོན་མཆོག་མེད་པར་འདོད་པའི་ལྟ་བ་དང་གཅིག་མཚུངས་ཡིན་པའི་ཞེད་སྣང་བྱེད་ཀྱི་འདུག་ཞེས་ཞུས་པར། ༧གོང་ས་སྐྱབས་མགོན་ཆེན་པོ་མཆོག་གིས། མགོན་པོ་ཉིད་ཀྱིས་ཆོས་ལུགས་རིས་མེད་ཅེས་པ་དེ་རྒྱ་གར་གྱིས་ལྟ་གྲུབ་ཐོག་ནས་གསུངས་ཀྱི་ཡོད་པ་དང་། རྒྱ་གར་ནང་རྒྱལ་སྤྱིའི་ཆོས་ལུགས་ཆེ་ཁག་ཚང་མ་མཉམ་གནས་ཐོག་འཕེལ་རྒྱས་འགྲོ་བཞིན་ཡིན་པ་དང་། རྒྱ་གར་གཞུང་གིས་ཆོས་ལུགས་རིས་མེད་ཅེས་པ་ནི་ཆོས་ལུགས་ཚང་མར་གུས་བཀུར་ཞུ་དགོས་པ་ཞིག་ལ་ངོས་འཛིན་བྱེད་ཀྱི་ཡོད་པ་དང་། མཐའ་ན་ཆོས་ཁས་མི་ལེན་མཁན་ཚོའི་ལྟ་བ་ལའང་གུས་བཀུར་བྱེད་ཀྱི་ཡོད་པ་རེད་ཅེས་དང་ཡང་བཟང་སྤྱོད་དེ་གལ་ཆེ་ཆུང་གང་འདྲ་ཡིན་མིན་དང་། དགོས་གལ་ཡོད་མེད་བཀའ་འདྲི་ཞུས་པར། ༧གོང་ས་སྐྱབས་མགོན་ཆེན་པོ་མཆོག་གིས། འཛམ་གླིང་ནང་མི་གསོད་ཁྲག་སྦྱོར་དང་། ལྐོག་ཟ་རུལ་སུངས། དབུལ་ཕྱུག་མི་སྙོམས་པ་མཉའ་གནོན་བཤུ་གཞོག་སོགས་མིས་བཟོས་པའི་དཀའ་ངལ་དེ་ཚོ་ཉུང་དུ་གཏོང་དགོས་ན། བཟང་སྤྱོད་ངེས་པར་དུ་དགོས་པ་རེད་ཅེས་བཀའ་གནང་འདུག

གསར་འགོད་པ་ཚེ་དབང་དངོས་གྲུབ།
གཞན་༧གོང་ས་མཆོག་གིས་ས་གནས་ཀྱི་མཛད་འཆར་ཉིན་མཐའ་མའི་ཉིན་བདེ་བ་དང་བདེ་བའི་རྒྱུ་ཞེས་བའི་བརྗོད་གཞིའི་ཐོག་བཀའ་སློབ་གནང་བ་འདི་གའི་ཆེད་མངགས་གསར་འགོད་པ་ནོར་བུ་དགྲ་འདུལ་གྱིས་བཏང་བའི་གནས་ཚུལ་ལ་གསན་རོགས།