༧གོང་ས་མཆོག་ཨ་རི་ནས་སུད་སི་ལ་ཞབས་སོར་བདེ་འཁོད་གནང་བ།

སུད་སིར་བོད་མི་ཚོས་༧གོང་ས་མཆོག་ལ་ཕེབས་བསུ། ༢༠༡༥།༡།༦

སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཕྱི་ཚེས་དྲུག་གི་སྔ་དྲོ་སུད་སི་གྲོང་ཁྱེར་Baselདུ་༧ཞབས་སོར་འཁོད་གནང་མཛད་འདུག
དེ་ཡང་༧གོང་ས་༧སྐྱབས་མགོན་ཆེན་པོ་མཆོག་སུད་སི་Zurichགནམ་ཐང་དུ་ཕེབས་འབྱོར་གནང་སྐབས། ༧གོང་ས་མཆོག་གི་དམིགས་བསལ་སྐུ་ཚབ་སྐལ་བཟང་རྒྱལ་མཚན་ལགས་དང་། སུད་སི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས། ས་གནས་བོད་མིའི་སྤྱི་མཐུན་ཚོགས་པའི་ཚོགས་གཙོ་ཚོགས་གཞོན་དང་། སུད་སི་དང་Liechtensteinས་གནས་ནང་ཡོད་པའི་བོད་དོན་རྒྱབ་སྐྱོར་ཚོགས་པ་སོགས་ཀྱི་སྐུ་ཚབ་རྣམས་གནམ་ཐང་དུ་བཅར་ནས་ཕེབས་བསུ་ཞུས་ཡོད་པ་དང་། ༧གོང་ས་༧སྐྱབས་མགོན་ཆེན་པོ་མཆོག་བཞུགས་བཞག་གནང་སའི་མགྲོན་ཁང་གི་མདུན་ས་གནས་བོད་མི་དང་བོད་དོན་རྒྱབ་སྐྱོར་བ་མི་གྲངས་ལྔ་བརྒྱ་ལྷག་ཙམ་གྱིས་བོད་ལུགས་ཀྱི་རྣམ་པའི་ཐོག་ནས་ཕེབས་བསུ་ཟབ་རྒྱས་ཞུས་གནང་འདུག
སུད་སི་དང་Liechtensteinས་གནས་བོད་མི་ཚོས་ཇི་ལྟར་གསོལ་འདེབས་ཞུས་པ་བཞིན་བཀའ་བཞེས་བཟང་པོ་ཐོབ་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སུད་སི་ནང་བཞུགས་བཞག་གཉིས་རིང་། ཕྱི་ཚེས་༧ཉིན་དང་ཕྱི་ཚེས་༨ཉིན་གྱི་སྔ་དྲོའི་ཉིན་ཕྱེད་རིང་ས་གནས་བོད་མི་དང་། ནང་པའི་དད་ལྡན་པ་ཚོར་དགེ་བཤེས་གླང་རི་དམ་པས་མཛད་པའི་བློ་སྦྱོང་ཚིག་བརྒྱད་མ་སོགས་གསུང་ཆོས་སྩལ་གནང་མཛད་རྒྱུ་དང་། དེ་བཞིན་ཕྱི་ཚེས་༨ཀྱི་ཕྱེད་ཡོལ་ལ་སུད་སི་ས་གནས་བོད་མི་ཚོས་གོ་བསྒྲིགས་གནང་སྟེ་དམངས་ཁྲོད་དུ་དེང་སྐབས་འཛམ་གླིང་ནང་གི་འཇིག་རྟེན་ཀུན་སྤྱོད་ཅེས་པའི་བརྗོད་གཞིའི་ཐོག་ནས་བཀའ་སློབ་སྩལ་གནང་མཛད་པའི་རྗེས་ཕྱི་ཚེས་༩ཉིན་སུད་སི་ནས་ཆིབས་ཞལ་བསྒྱུར་གནང་མཛད་ཏེ་ཡོ་རོབ་ཀྱི་རྒྱལ་ཁབ་ནོར་ཝེ་དུ་༧ཞབས་སོར་འཁོད་གནང་མཛད་ཀྱི་ཡོད་འདུག

གསར་འགོད་པ་འཆི་མེད།