༸གོང་ས་མཆོག་བཞུགས་སྒར་དུ་༸ཞབས་སོར་བདེ་བར་འཁོད་པ།

༸གོང་ས་མཆོག་བཞུགས་སྒར་ཉེ་འཁྲིས་སུ་ཆགས་པའི་གྷ་གྷལ་གནམ་ཐང་སུ་༸ཞབས་སོར་འཁོད་པའི་སྐབས། ༢༠༢༣།༠༤།༢༢ ཉིན།

འདི་ཚེས་ ༢༢ ཉིན་གྱི་ཞོགས་པ་ཕྱག་ཚོད་ ༨།༣༠ ཡོལ་ཙམ་ལ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལིར་མཛད་འཕྲིན་ཁག་ལེགས་གྲུབ་ཀྱིས་བཞུགས་སྒར་དུ་༸ཞབས་སོར་བདེ་བར་འཁོད་ཅིང་། བཞུགས་སྒར་ཉེ་འཁྲིས་སུ་ཆགས་པའི་གྷ་གྷལ་གནམ་ཐང་ནས་༸རྒྱལ་བའི་ཕོ་བྲང་བར་དད་ལྡན་པ་རྣམས་ཀྱིས་ལག་ཏུ་གདུག་སྤོས་དང་མཇལ་དར། མེ་ཏོག་དང་མཆོད་རྫས་སོགས་བསྣམས་ཏེ་མགོན་པོ་གང་ཉིད་མཆོག་ཕེབས་བསུ་གཟབ་རྒྱས་ཞུས་གནང་སོང་།

འདི་ག་རླུང་འཕྲིན་ཁང་གིས་བོད་མི་ཁག་གཅིག་ལ་༸གོང་ས་མཆོག་གི་གསེར་ཞལ་མཇལ་རྒྱུ་བྱུང་བའི་མྱོང་ཚོར་བཅར་འདྲི་ཞུ་སྐབས། དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས་ཀྱིས། ༸གོང་ས་མཆོག་གི་གསེར་ཞལ་མཇལ་རྒྱུ་བྱུང་བ་དེ་ཧ་ཅང་སྐལ་བ་བཟང་པོ་ཞིག་ལ་ངོས་འཛིན་ཞུ་བཞིན་ཡོད་ཡོད་ཅེས་འགྲེལ་བརྗོད་གནང་བྱུང་།
ཡང་རྒྱ་གར་རྒྱལ་ས་ལྡི་ལིར་མཐོ་སློབ་འགྲིམས་བཞིན་པའི་སློབ་མ་བསྟན་འཛིན་ཆོས་མཚོ་ལགས་ཀྱིས། ཁོ་མོ་ལྡི་ལིའི་ནང་མཐོ་སློབ་འགྲིམས་བཞིན་ཡོད་སྟབས་༸གོང་ས་མཆོག་མཇལ་རྒྱུ་ཏོག་ཙམ་དཀོན་ན་ཡང་། ད་རེས་མགོན་པོ་གང་ཉིད་མཆོག་གི་གསེར་ཞལ་མཇལ་རྒྱུ་བྱུང་བར་ཧ་ཅང་དགའ་སྤོབས་ཡོད་ཅེས་འགྲེལ་བརྗོད་གནང་བྱུང་།
ཐེངས་འདིའི་རྒྱ་གར་རྒྱལ་ས་ལྡི་ལིའི་ནང་ཆིབས་སྒྱུར་མཛད་དོན་ནི། ཉེ་ཆར་མཇུག་སྒྲིལ་ཟིན་པའི་གོ་ལའི་ནང་པའི་ལྷན་ཚོགས་ཀྱི་ཉིན་གཉིས་པའི་ཚོགས་མགོན་དུ་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་མཛད་ཡོད་པ་རེད།

གསར་འགོད་པ། ཡེ་ཤེས་ཟླ་བ།
རྩོམ་སྒྲིག་པ།  ཡེ་ཤེས་ཟླ་བ།  
དྲྭ་ཐོག་སྤེལ་མཁན། ཡེ་ཤེས་ཟླ་བ།