༧གོང་ས་མཆོག་གི་མཚན་ཐོག་ཝིར་ཇི་ནི་ཡ་གཙུག་ལག་སློབ་ཆེན་དུ་སྤྱི་ཚོགས་ཕན་བདེ་སྒྲུབ་པའི་གཞོན་སྐྱེས་འགོ་ཁྲིད་འདུ་འཛོམས།

དེ་ཡང་(The Dalai Lama Fellows Contemplative Leadership Assembly)་ཞེས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་མཚན་ཐོག་གོ་ལ་ཁྱོན་ཡོངས་ནས་སྤྱི་ཚོགས་ལ་ཕན་བདེའི་ཞབས་འདེགས་སྒྲུབ་མཁན་གྱི་གཞོན་སྐྱེས་འགོ་ཁྲིད་ཚོའི་འདུ་འཛོམས་ཞིག་འདས་པའི་གཟའ་མཇུག་ནས་བཟུང་ཨ་རིའི་ཝིར་ཇི་ནི་ཡའི་མངའ་སྡེའི་(UVA)་གཙུག་ལག་སློབ་གཉེར་ཁང་དུ་བསྐོངས་ཚོགས་གནང་པ་དང་། དེར་རྒྱལ་ཁབ་༢༠ཙམ་ནས་གཞོན་སྐྱེས་འགོ་ཁྲིད་༦༠ཙམ་མཉམ་ཞུགས་གནང་ཡོད་འདུག
སྤྱི་ཚོགས་ཀྱི་དཀའ་ངལ་མྱངས་མྱོང་པའི་ཡུལ་ལུང་འདྲ་མིན་གྱི་གཞོན་སྐྱེས་འགོ་ཁྲིད་ཀྱི་འདུ་འཛོམས་གོ་སྒྲིག་ཞུ་མཁན་གཙུག་ལག་སློབ་གཉེར་ཁང་དེའི་བདེ་དོན་ཚན་རིག་སྡེ་ཚན་གྱི་འགན་འཁུར་བ་(Aneel Chima)་ཡིས། ༧གོང་ས་ཏཱ་ལའི་བླ་མ་མཆོག་གིས་འདི་ལྟ་བུའི་ལས་གཞི་བརྒྱུད་ནས་ཕྱི་དངོས་པོ་དང་ནང་བསམ་བློ་ཟུང་འབྲེལ་གྱི་ཐོག་ནས་སྤྱི་ཚོགས་ལ་ཕན་བདེ་སྒྲུབ་ཐུབ་པའི་ཐུགས་རེ་གནང་ཡོད་རེད་ཅེས་གསུངས་འདུག
དེ་དང་ཕྱོགས་མཚུངས་འདུ་འཛོམས་གོ་སྒྲིག་ཞུ་མཁན་གཞན་སྐུ་ཞབས་(DeMauro)་ཡིས། ༧གོང་ས་ཏཱ་ལའི་བླ་མ་མཆོག་གིས་ཨ་ཧྥི་རི་ཀའི་གླིང་ཕྲན་ཁག་དང་། དཀྱིལ་ཤར་ཡུལ་གྲུ་སོགས་ཀྱི་ནང་དཀའ་ངལ་ཡོད་སའི་རྒྱལ་ཁབ་ཁག་གི་གཞོན་སྐྱེས་ཚོར་འདི་ལྟབུའི་གོ་སྐབས་ཐོབ་དཀའ་བར་གཟིགས་ཏེ་ཡུལ་གྲུ་དེ་དག་གི་གཞོན་སྐྱེས་ཚོར་ཡང་གོ་སྐབས་གནང་རྒྱུའི་དགོངས་པ་ཆེ་བཞེས་གནང་བ་ཞིག་རེད་ཅེས་གསུངས་འདུག
ད་རེས་ཀྱི་འདུ་འཛོམས་འདིའི་ནང་། འདས་ལོའི་ལས་གཞི་དང་ད་ལོའི་ལས་གཞིའི་ཐོག་གྲོས་བསྡུར་གནང་བཞིན་ཡོད་པ་དང་། འདུ་འཛོམས་དེའི་ཐོག་མཉམ་ཞུགས་གནང་མཁན་ཁོངས་སུ་སྤྱི་ཚོགས་ཀྱི་དཀའ་རྙོག་འདྲ་མིན་འོག་ནས་འཚར་ལོངས་བྱུང་བའི་གཞོན་སྐྱེས་དང་། ལས་མེད་ན་གཞོན། ཡང་ན་རྒྱལ་ཁབ་གཞན་དུ་གཞིས་སྤོ་བྱེད་པའི་བརྒྱུད་རིམ་ཁྲོད་དཀའ་ངལ་འཕྲད་པའི་རིགས་སོགས་སྤྱི་ཚོགས་ནང་དཀའ་ངལ་དུ་མར་གདོང་ལེན་བྱེད་མྱོང་མཁན་ཚུད་ཡོད་ཅིང་། ལས་རིམ་འདི་བརྒྱུད་གཞོན་སྐྱེས་མི་རབས་ཁྲོད་ལུས་སེམས་གཉིས་ཀའི་ཐོག་ནས་ཟབ་སྦྱོང་དང་ཡང་སློབ་གསོ་རིགས་སྤྲོད་མཁན་གྱི་སྤྱི་ཚོགས་ཞབས་ཞུ་བའི་གཞོན་སྐྱེས་རིགས་ལ་གོ་སྐབས་སྤྲད་གནང་བ་ཞིག་ཡིན་འདུག
ད་རེས་འདུ་འཛོམས་འདིའི་སྐབས་ཚོགས་ཞུགས་པ་ཚོས་རང་གིས་འགྲོ་སོང་རྩ་བ་ནས་གཏོང་མི་དགོས་པར་༧གོང་ས་སྐྱབས་མགོན་ཆེན་པོ་མཆོག་གི་མཚན་ཐོག་ནས་སློབ་ཡོན་ལས་གཞིར་འགྲོ་གྲོན་ནར་གཏོང་གནང་གི་ཡོད་པ་རེད།
༧གོང་ས་ཏཱ་ལའི་བླ་མའི་སློབ་ཡོན་གྱི་ལས་གཞི་འདི་ཕྱི་ལོ་༢༠༡༠ནས་དབུ་འཛུགས་གནང་སྟེ། འཛམ་གླིང་ནང་རྒྱལ་ཁབ་འདྲ་མིན་དང་མི་རིགས་སྣ་ཚོགས་ཀྱི་སློབ་ཕྲུག་ལ་སློབ་ཡོན་འདི་གནང་བཞིན་ཡོད་པ་རེད།

གསར་འགོད་པ། རིག་འཛིན་ཆོས་སྒྲོན།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། སྐལ་ལྡན་བློ་གྲོས།
དྲྭ་ཐོག་སྤེལ་མཁན། ཀླུ་འབུམ།