འགྲོ་བ་མི་གཅིག་གྱུར་གྱི་འདུ་ཤེས་བཟུང་བའི་ཐོག་ནས་བདེ་སྐྱིད་ལྡན་པའི་འཛམ་གླིང་ཞིག་བསྐྲུན་དགོས། ༧གོང་ས་མཆོག་གིས།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས། འདི་ཚེས་༢༥ཉིན་རྒྱ་གར་བྱང་ཕྱོགས་ལ་དྭགས་གླེ་གྲོང་ཁྱེར་ནས་སྤྱི་ལེ་༡༨ཙམ་གྱི་སར་ཆགས་པའི་ཁྲིག་སེ་དགོན་པའི་ཤེས་རབ་སྐྱེད་ཚལ་གླིང་གི་དཔེ་མཛོད་ཁང་དབུ་འབྱེད་རབ་གནས་གནང་ཡོད་པ་དང་། དབུ་འབྱེད་མཛད་སྒོའི་ཐོག་༧གོང་ས་སྐྱབས་མགོན་ཆེན་པོ་མཆོག་གིས། ཕྲུག་གུ་ཆུང་དུས་སྐབས། ཆོས་ལུགས་ཟེར་བ་དེ་ཅི་ཞིག་ཡིན་མིན་མཁྱེན་རྟོགས་མེད་ལ། ནང་པ་དང་ཁ་ཆེ། ཧིན་རྡུ། ཡེ་ཤུ་ཆོས་ལུགས་སོགས་ཀྱི་སྐོར་དེ་བས་གོ་རྟོགས་མེད། དེར་བརྟེན། དེ་དག་ལས་གལ་ཆེ་བ་ཞིག་ནི་ང་ཚོ་འགྲོ་བ་མི་ཟེར་བ་དེ་རེད། ང་ཚོའི་ལྷན་སྐྱེས་རང་བཞིན་ནི་བྱམས་བརྩེ་ལྡན་པ་ཞིག་ཡིན་པ་དེང་གི་ཚན་རིག་པ་ཚོས་ཀྱང་འགྲེལ་བརྗོད་བྱེད་ཀྱི་ཡོད། ངོས་ས་ཕྱོགས་གང་དུ་ཕྱིན་པ་ཡིན་ནའང་། ང་ཚོ་ཚང་མ་གཅིག་མཚུངས་ཡིན་པ་ངོས་འཛིན་བྱེད་ཀྱི་ཡོད། ངོས་ཀྱི་དམ་བཅའ་གཅིག་ནི་འགྲོ་བ་མི་གཅིག་གྱུར་གྱི་འདུ་ཤེས་གོང་འཕེལ་གཏོང་རྒྱུ་དེ་ཡིན་པ་མ་ཟད། དེ་བརྒྱུད་ནས་ཞི་བདེ་དང་བདེ་སྐྱིད་ལྡན་པའི་འཛམ་གླིང་ཞིག་བསྐྲུན་ཐུབ་་བྱེད་དགོས་ཅེས་བཀའ་གནང་འདུག
ད་རེས་དཔེ་མཛོད་ཁང་དེ་ཉིད་དབུ་འབྱེད་མཛད་སྒོའི་ཐོག་ལ་དྭགས་སུ་རྟེན་གཞི་བྱས་པའི་སློབ་གྲྭ་ཁག་ནས་སློབ་མ་༣༠༠༠ཙམ་ཆེད་ཕེབས་ཀྱིས། མགོན་པོ་གང་ཉིད་མཆོག་ནས་ཆོས་ལུགས་ལ་མ་བརྟེན་པའི་བཟང་སྤྱོད་སྤེལ་ཐབས་སྐོར་དམིགས་བསལ་བཀའ་སློབ་ལམ་སྟོན་དང་སློབ་ཕྲུག་ཚོའི་བཀའ་འདྲིར་བཀའ་ལན་སྩལ་འདུག
ལ་དྭགས་གླེ་ལམ་སྒྲོན་སློབ་གྲྭའི་སློབ་མ་ཞིག་གིས། དེང་སྐབས་འཛམ་གླིང་ཁྱོན་ཡོངས་སུ་འགྲན་བསྡུར་གྱི་རྣམ་པ་ཤུགས་ཆེར་ཐོན་བཞིན་ཡོད་པའི་ཁྲོད་སློབ་གྲྭ་ཁག་ཏུ་ཡང་སློབ་ཕྲུག་ནང་ཁུལ་འགྲན་བསྡུར་བྱེད་ཤུགས་ཆེ་རུ་འགྲོ་མུས་ཡིན། དེའི་དབང་གིས། སློབ་ཕྲུག་ཕན་ཚུན་ཕྲག་དོག་དང་རང་གཅེས་འཛིན་གྱི་བསམ་བློ་གཏོང་མཁན་ཇེ་མང་དུ་འགྲོ་བཞིན་འདུག དེར་བརྟེན། བཟང་སྤྱོད་ཀྱི་ཁོར་ཡུག་ལྡན་པའི་འགྲན་བསྡུར་ཞིག་ཇི་ལྟར་སྐྲུན་དགོས་པའི་སྐོར་བཀའ་འདྲི་དགོངས་སྐོར་ཞུ་སྐབས། ༧གོང་ས་མཆོག་གིས། ལྷག་བསམ་གཙང་མའི་ཀུན་སློང་གིས་སྒོ་ནས་འགྲན་བསྡུར་བྱ་རྒྱུ་ནི་གལ་ཆེ་ལ། ལྷག་པར་དུ་འགྲན་བསྡུར་གྱི་གཞི་རྩ་དེ་བྱམས་བརྩེའི་བསམ་བློ་ཡོད་པའི་སྒོ་ནས་བྱས་པ་ཡིན་ཚེ། འགྲན་བསྡུར་དེ་ཡང་དོན་སྙིང་ལྡན་པ་ཞིག་ཡོང་ངེས་ཡིན་ཞེས་བཀའ་ལན་བསྩལ་སོང་།

ཡང་སྐབས་དེར་༧གོང་ས་སྐྱབས་མགོན་ཆེན་པོ་མཆོག་གིས། འཛམ་གླིང་གནམ་གཤིས་འགྱུར་ལྡོག་གི་དཀའ་ངལ་སེལ་དགོས་པའི་གལ་གནད་སྐོར་གསུངས་སྐབས། གོ་ལའི་ཚ་དྲོད་འཕེལ་བས་གནོད་སྐྱོན་དེ་ང་ཚོ་ཚང་མར་དཀའ་ངལ་ཆགས་ཡོད། འབྱུང་འགྱུར་ལོ་འགའ་ཤས་རྗེས་ལ་གོ་ལའི་ཚ་དྲོད་རྒྱས་ཏེ་ཛ་དྲག་གི་གནས་སྟངས་ཆགས་སྲིད་པ་ཞིག་རེད། དེར་བརྟེན། ཤིང་ནགས་འདེབས་བཙུགས་བྱ་རྒྱུ་ནི་ཧ་ཅང་གི་གལ་འགངས་ཆེན་པོ་རེད་ལ། འདི་ཕྱོགས་སུ་ངོས་ཀྱིས་འདེབས་བཙུགས་བྱས་པའི་ཤིང་ནགས་མང་པོ་མཐོང་བྱུང་བས། ཧ་ཅང་གི་ངོ་མཚར་ཆེ་ཞེས་བཀའ་གནང་འདུག
ཡང་སྐབས་དེར་སློབ་མ་པདྨ་གཡུ་སྒྲོན་ལགས་ཀྱིས། དེང་སྐབས་ལ་དྭགས་ཁུལ་དུ་གཞོན་སྐྱེས་ཁྲོད་ཆང་རག་དང་དུག་རྫས་རིགས་སྤྱོད་མཁན་ཇེ་མང་དུ་འགྲོ་བཞིན་ཡོད་པ་དེ་སྔོན་འགོག་དང་བཟང་ངན་རྣམ་འབྱེད་ཀྱི་ཐབས་ལམ་ཇི་ཡོད་སྐོར་ལམ་སྟོན་ཞུས་བར། ༧གོང་ས་མཆོག་གིས། རིང་མིན་གོ་སྐབས་འདྲ་བྱུང་ཚེ། ངོས་ལྡི་ལིར་ཕྱིན་ནས་ནེཧེ་རུ་གཙུག་ལག་སློབ་ཆེན་གཙོས་དེ་ཁུལ་གྱི་སློབ་ཆེན་ཁག་གི་སློབ་དཔོན་དང་གནད་ཡོད་མི་སྣ་ཚོ་དང་ཐུགས་འཕྲད་ཀྱིས། དེང་གི་ཤེས་ཡོན་སློབ་གསོ་དང་རྒྱ་གར་གྱི་གནའ་བོའི་རིག་གཞུང་གཉིས་ཟུང་འབྲེལ་གྱི་ཐོག་ནས་སློབ་གཞི་གཏན་འབེབས་དང་འབྲེལ་བའི་གྲོས་བསྡུར་བྱ་འཆར་ཡོད། གནའ་བོའི་རིག་གཞུང་དེ་འཛམ་གླིང་ཞི་བདེ་དང་དམིགས་བསལ་གྱི་འབྲེལ་བ་ཡོད། འགྲོ་བ་མི་མང་པོ་ཞིག་ནང་སེམས་ཞི་བདེ་མེད་པའི་དབང་གིས། ཁོང་ཁྲོ་དང་དངངས་སྐྲག་སོགས་སྐྱེད་དེ་མཐར་ཆང་རག་དང་དུག་རྫས་རིགས་ལོངས་སུ་སྤྱོད་འགོ་བཙུགས་ཀྱི་ཡོད་ཅེས་བཀའ་གནང་སོང་།
ཨ་རིའི་ཨེ་མོ་རི་གཙུག་ལག་སློེབ་གཉེར་ཁང་ནི་༧གོང་ས་སྐྱབས་མགོན་ཆེན་པོ་མཆོག་གི་དགོངས་པ་གཞི་བཞག་པའི་(See Learning)་ངམ་སྤྱི་ཚོགས་དང་སེམས་མྱོང་། སྤྱོད་བཟང་ཅེས་པའི་བསླབ་གཞི་འཛམ་གླིང་ཁྱོན་ནང་ངོ་སྤྲོད་དང་སྦྱོར་བརྡར་སྤྲོད་མཁན་གཙོ་བོ་དེ་ཡིན་ཞིང་། སྤྱི་ལོ་༢༠༡༩ལོར་སློབ་གཞི་དེ་བཞིན་དབུ་འབྱེད་གནང་པ་ནས་བཟུང་ད་བར་འཛམ་གླིང་ཁྱོན་ནས་ཤེས་ཡོན་སྡེ་ཁག་༥༨༠༠༠ལྷག་མཉམ་ཞུགས་དང་དེ་འབྲེལ་ལས་དོན་སྤེལ་བཞིན་ཡོད་འདུག་ལ། ལ་དྭགས་ཁྲེག་སེ་དགོན་པས་སློབ་གཞི་དེ་བཞིན་ལག་བསྟར་བྱེད་མུས་ཡིན་འདུག་མ་ཟད། ད་བར་ལ་དྭགས་ཁུལ་གྱི་སློབ་མ་༣༥༠ལྷག་ལ་སིའེ་ཤེས་ཡོན་སློབ་གསོའི་བསླབ་གཞི་ངོ་སྤྲོད་དང་སྦྱོར་བརྡར་སྤྲད་ཡོད་པ་ཁྲེག་སེ་རིན་པོ་ཆེས་ངོ་སྤྲོད་གནང་འདུག

གསར་འགོད་པ། བློ་བཟང་དགེ་ལེགས།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།