རྒྱལ་སྤྱིའི་གནམ་གཤིས་འགྱུར་ལྡོག་སྐོར་གྱི་ལྷན་ཚོགས།

༄༅༎བཙན་བྱོལ་བོད་གཞུང་གི་ཁོར་ཡུག་སྲུང་སྐྱོབ་ཚན་པའི་འགན་འཛིན་གྱིས་རྒྱ་གར་ཧི་མ་ཅལ་མངའ་སྡེའི་གྲོང་ཁྱེར་པཱ་ལམ་པུར་ནང་རྒྱལ་སྤྱིའི་གནམ་གཤིས་འགྱུར་ལྡོག་སྐོར་གྱི་ལྷན་ཚོགས་ཐོག་བོད་ནང་གནམ་གཤིས་འགྱུར་ལྡོག་ཆེན་པོ་འགྲོ་བཞིན་པའི་གནས་བབ་ཀྱི་སྐོར་གནས་ལུགས་ངོ་སྤྲོད་ཀྱི་གསུང་བཤད་གནང་ཡོད་འདུག

ལྷན་ཚོགས་འདི་ནི་འཛམ་གླིང་ཁོར་ཡུག་གི་ཐེབས་རྩས་གཙོས་རྒྱལ་སྤྱིའི་ཚོགས་སྡེ་ཁག་ཅིག་གིས་གོ་བསྒྲིགས་ཞུས་པ་ཞིག་ཡིན་པ་དང་འདི་ཚེས་བཅུ་གཉིས་ནས་བཅུ་བཞི་བར་གྱི་ཉིན་གསུམ་གྱི་རྒྱལ་སྤྱིའི་ལྷན་ཚོགས་དེར་ཚན་རིག་པ་དང་བཟོ་གྲྭ་ཁག་གི་སྐུ་ཚབ།སྲིད་ཞུའི་ལས་བྱེད།གཞན་ཡང་སྤྱི་ཚོགས་ཀྱི་ལས་འཁུར་བུའི་གཙོས་མི་གྲངས་མང་པོ་ཞིག་ཕེབས་ཡོད་པ་དང་ལྷན་ཚོགས་ཀྱི་ཐོག་བཙན་བྱོལ་བོད་གཞུང་ཕྱི་འབྲེལ་ལས་ཁུངས་ཀྱི་ཁྱབ་ཁོངས་ཁོར་ཡུག་དང་འཛུགས་བསྐྲུན་ཚབ་པའི་འགན་འཛིན་བསྟན་འཛིན་ནོར་བུ་ལགས་ཀྱིས་བོད་ནང་གནམ་གཤིས་འགྱུར་ལྡོག་གི་སྐོར་ཉམས་ཞིབ་གནང་བའི་སྙན་ཐོ་ཞིག་འགྲེམས་སྤེལ་གྱིས་བོད་ནང་གནམ་གཤིས་འགྱུར་ལྡོག་ཤུགས་ཆེ་འགྲོ་བཞིན་པའི་གནས་བབ་ཀྱི་སྐོར་གསུང་བཤད་གནང་ཡོད་འདུག

དེ་ཡང་བསྟན་འཛིན་ནོར་བུ་ལགས་ཀྱིས་བཙན་བྱོལ་བོད་གཞུང་གི་དྲ་རྒྱར་རྒྱལ་སྤྱིའི་ལྷན་ཚོགས་ཀྱི་ཐོག་བོད་དང་བོད་ནང་ཉམས་ཉེས་འགྲོ་བཞིན་པའི་ཁོར་ཡུག་གི་གནས་བབ་ཀྱི་ངོ་སྤྲོད་བྱ་རྒྱུའི་གོ་སྐབས་ཡག་པོ་ཞིག་བྱུང་ཞེས་དགོངས་ཚུལ་གསུངས་ཡོད་པ་དང་ཁོང་ལ་ལྷན་ཚོགས་གོ་སྒྲིག་གནང་མཁན་ནས་བོད་ནང་གནམ་གཤིས་འགྱུར་ལྡོག་སྐོར་གྱི་སྙན་ཐོ་དེ་བཞིན་འབྲེལ་ཡོད་ལྷན་ཚོགས་གཞན་ཁག་གི་ཐོག་ཏུའང་འགྲེམས་སྤེལ་གནང་རྒྱུར་མགྲོན་ཤོག་ཕུལ་ཡོད་པའི་སྐོར་བཙན་བྱོལ་བོད་གཞུང་གི་བོད་གནས་དྲ་རྒྱས་གནས་ཚུལ་སྤེལ་འདུག