བརྟན་བཞུགས་བསྟར་འབུལ་གསལ་བསྒྲགས།

༄༅།།བརྟན་བཞུགས་གོ་སྒྲིག་ཚོགས་ཆུང་ནས་ཕྱི་ལོ་ ༢༠༢༣ ཟླ་ ༡ ཚེས་ ༤ ཉིན་ཡོངས་ཁྱབ་གསལ་བསྒྲགས་ཞུས་པ་བཞིན། ད་ཆ་བོད་རྒྱལ་ལོ་ ༢༡༥༠ བོད་ཟླ་ ༡ ཚེས་ ༢༣ ཕྱི་ལོ་ ༢༠༢༣ ཟླ་ ༣ ཚེས་ ༡༥ གཟའ་ཚེས་དགེ་བའི་ཉིན་འཕགས་ཡུལ་དྷ་རམ་ས་ལ་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་སྒྲིག་འཛུགས་ཀྱི་ངོས་ནས་བོད་གཞིས་བྱེས་ལྷ་སྡེ་མི་སྡེ་ཡོངས་ཀྱི་ཚབ་ཞུས་ཏེ། བོད་མིིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་སྐུ་གེགས་ཀྱི་མཚན་མ་ཅི་མཆིས་རྨེག་མེད་དུ་ཞི་ནས་སྐུ་ཚེ་ཡུན་དུ་བརྟན་པ་དང་། ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་ཆེད་དུ་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་བསྟར་འབུལ་ཞུ་གཏན་འཁེལ་བ་ལྟར། གཞུང་བསྟེན་དགྲ་ལྷ་གནས་ཆུང་ཆོས་རྒྱལ་ཆེན་པོར་ཞབས་རིམ་བཀའ་ལུང་ཞུས་པའི་ཕེབས་སྒོར། འཕགས་པའི་བསྟོད་ཆེན་དང་འབྲེལ་མ་ཎི་ཡིག་དྲུག་མ་དུང་ཕྱུར་དང་། ཏཱ་རེའི་བསྟོད་པ་དང་འབྲེལ་སྒྲོལ་མའི་གཟུངས་སྔགས་འབུམ་ཐེར། ༸རྒྱལ་བཀའ་དག་ཐོན། ༸རྒྱལ་བ་ཚེ་དཔག་མེད་ཀྱི་གཟུངས་སྔགས། པཎ་གྲུབ་བཅུ་བདུན་གྱི་གསོལ་འདེབས། སྲོག་བླུ་གང་མང་། ཞེས་བསྩལ་འདུག་ན། དགོན་སྡེ་གྲྭ་ཚང་དང་། གཞུང་འབྲེལ་དང་གཞུང་ཁོངས་མིན་པའི་ཚོགས་སྡེ། མི་སྒེར་བ་བཅས་ནས་རང་ནུས་གང་ལྕོགས་ཀྱིས་སྨིན་སྒྲུབས་གྱིས་པའི་སྒྲུབ་ཐོ་ཕྱི་ལོ་ ༢༠༢༣ ཟླ་ ༣ ཚེས་ ༡༣ འགྱངས་མེད་ཆོས་རིག་ལས་ཁུངས་སུ་ཕུལ་འབྱོར་ཡོང་བའི་གསལ་བསྒྲགས་སུ། བརྟན་བཞུགས་གོ་སྒྲིག་ཚོགས་ཆུང་ནས་ཕྱི་ལོ་ ༢༠༢༣ ཟླ་ ༢ ཚེས་ ༣ ལ།།

གསར་འགོད་པ། དོན་གྲུབ་རྣམ་རྒྱལ།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲྭ་ཐོག་སྤེལ་མཁན། ཡེ་ཤེས་བཀྲ་ཤིས།