ཁེ་ཎ་ཌ་ཕྱི་འབྲེལ་ལས་དོན་ཚོགས་ཆུང་གི་འགྲོ་བ་མིའི་ཐོབ་ཐང་ཚན་པས་བོད་ནང་གི་གཏན་འཇགས་སློབ་གྲྭ་དང་འབྲེལ་བའི་སྐོར་ལ་ཉན་ཞིབ་ཞིག་གནང་འདུག

ཟླ་འདིའི་ཚེས་དགུ་ཉིན་ཁེ་ཎ་ཌ་ཕྱི་འབྲེལ་ལས་དོན་ཚོགས་ཆུང་གི་འགྲོ་བ་མིའི་ཐོབ་ཐང་ཚན་པའི་འཐུས་མི་ཁག་བརྒྱད་ལས་གྲུབ་པའི་སྐུ་ཚབ་དང་ལྷན་དུ་འབུམ་རམས་པ་རྒྱལ་ལོ་ལགས་དང་། བོད་དོན་ལས་འགུལ་བ་འཆི་མེད་ལྷ་མོ་ལགས་བཅས་ཨོ་ཏྲ་ལྦ་རྒྱལ་སའི་ཁུལ་དུ་རྒྱ་གཞུང་གི་སྲིད་བྱུས་འོག་བོད་ནང་གི་གནས་སྟངས་སྤྱི་དང་བོད་ཕྲུག་སློབ་མ་རྣམས་གཏན་འཇགས་སློབ་གྲྭར་བཀག་ཉར་བྱེད་བཞིན་པའི་སྐོར་ལ་ཉན་ཞིབ་ཞིག་གནང་རྒྱུ་ཡིན་པ་བོད་དོན་ལས་འགུལ་བ་འཆི་མེད་ལྷ་མོ་ལགས་ནས་ཞལ་པར་བརྒྱུད་འབྲེལ་བརྗོད་གནང་བྱུང་།
རྩ་བའི་འདི་ཚེས་བདུན་ཉིན་བོད་དོན་ལས་འགུལ་བསྟི་གནས་ཁང་གི་ལྷ་སྒྲོན་བཀྲེས་མཐོང་ལགས་དང་། འབུམ་རམས་པ་རྒྱལ་ལོ་ལགས། བོད་དོན་ལས་འགུལ་བ་འཆི་མེད་ལྷ་མོ་ལགས་བཅས་ཁེ་ཎ་ཌའི་རྒྱལ་ས་ཨོ་ཌ་ཝ་རུ་ཆེད་བཅར་གནང་ནས་ཁེ་ཎ་ཌ་བོད་ཀྱི་གྲོགས་པོ་ཚོགས་པའི་ཚོགས་གཙོ་སྐུ་ཞབས་Arif Virani ལགས་དང་། ཚོགས་གཞོན་སྐུ་ཞབས་James Maloney ལགས་ཀྱི་གཙོས་པའི་འཐུས་མི་བཅོ་བརྒྱད་ལྷག་ཙམ་ཞིག་དང་ལྷན་དུ་བོད་ནང་གི་གཏན་འཇགས་སློབ་གྲྭ་དང་འབྲེལ་བའི་སྐོར་ལ་ཕན་ཚུལ་གོ་བསྡུར་དང་དེ་དག་གི་གནས་སྟངས་རྒྱུས་ལོན་གནང་ཡོད་པ་གསུངས་བྱུང་།
དེ་རིང་ཚེས ༡༠ཉིན་ལྷ་སྒྲོན་བཀྲས་མཐོང་ལགས་དང་། འབུམ་རམས་པ་རྒྱལ་ལོ་ལགས། བོད་དོན་ལས་འགུལ་བ་འཆི་མེད་ལྷ་མོ་ལགས་བཅས་ཁེ་ཎ་ཌའི་རྒྱལ་ས་ཨོ་ཌ་ཝ་རུ་ཆེད་བཅར་གནང་ནས་ཁེ་ཎ་ཌ་ཕྱི་འབྲེལ་ལས་དོན་ཚོགས་ཆུང་གི་འགྲོ་བ་མིའི་ཐོབ་ཐང་ཚན་པས་བོད་ནང་གི་གཏན་འཇགས་སློབ་གྲྭ་དང་འབྲེལ་བའི་སྐོར་ལ་ཉན་ཞིབ་ཞིག་གནང་ཡོད་པ་རེད།
ཁེ་ཎ་ཌ་དབུས་གྲོས་ཚོགས་བོད་ཀྱི་གྲོགས་པོ་ཚོགས་པའི་ཚོགས་གཙོ་སྐུ་ཞབས་Arif Virani ལགས་ཀྱིས་གཙོས་པའི་འཐུས་མི་ཁག་གཅིག་དང་ལྷན་དུ་བོད་རིགས་སྤྱི་མཐུན་ཚོགས་པ་ཁག་ཅིག་གི་མགྲིན་ཚབ་པ། དེ་བཞིན་གོང་བརྗོད་བོད་མི་གསུམ་བཅས་ཐུན་མོང་གིས་བོད་ཀྱི་ལོ་གསར་སྲུང་བརྩི་གནང་ནས་གྲོས་ཚོགས་ནང་བོད་དོན་དང་རིག་གཞུང་། བོད་ཟས་བཅས་ལ་གོ་རྟོགས་སྤེལ་རྒྱུའི་གོ་སྐབས་བྱུང་ཡོད་པ་ཨོན་ཏྲེ་རི་ཡོ་བོད་རིགས་སྤྱི་མཐུན་ཚོགས་པའི་ཆབ་སྲིད་འབྲེལ་མཐུད་པ་གཡུ་འབྲུང་བསྟན་འཛིན་ལགས་ནས་ངོ་སྤྲོད་གནང་བྱུང་།
ད་ཐེངས་ཁེ་ཎ་ཌ་རྒྱལ་སའི་དབུས་གྲོས་ཚོགས་ཀྱི་ཚོགས་ཁང་ནང་དུ་བོད་དོན་དང་བོད་པའི་ལོ་གསར་སྔ་སྣུར་ཀྱི་སྲུང་བརྩི་ཞུས་པ་བཞིན་འཐུས་མི་ཁག་གཅིག་དང་གོ་བསྡུར་བྱུང་བ་བཞིན་ཁེ་ཎ་ཌའི་བོད་མི་ཚོས་ཆབ་སྲིད་མི་སྣ་ཁག་ལ་འབྲེལ་བ་བཞག་ནས་བོད་དོན་སྐོར་གླེང་དགོས་པའི་ཞུ་ཡིག་དང་འབྲེལ་བ་གནང་ཚེ་ཕན་ཐོག་རླབས་ཆེན་ཡོང་དུས་ས་ཕྱོགས་གང་སར་བཞུགས་པའི་བོད་མི་ཚོས་འབད་བརྩོན་གནང་དགོས་པ་གསུངས་བྱུང་། མཐའ་དོན་བོད་ནང་གཏན་འཇགས་སློབ་གྲ་དང་འབྲེལ་བའི་སྐོར་ཁེ་ཎ་ཌ་ཙམ་མ་ཡིན་པར་ཡུ་རོབ་ཁག་གི་གཞུང་དང་ཨ་རིའི་རྒྱལ་ཁབ་བཅས་ལ་ཞུ་གཏུགས་ལས་འགུལ་སྤེན་ནས་རྒྱ་གཞུང་གིས་བོད་པའི་ངོ་བོ་དང་། རིག་གཞུང་། སྐད་ཡིག་ མི་རིགས་རྩ་མེད་ཀྱི་སྲིད་བྱུས་མཚམས་འཇོག་དགོས་པའི་གནོན་ཤུགས་དང་རྒྱབ་སྐྱོར་དགོས་པའི་ལས་འགུལ་མུ་མཐུད་སྤེལ་བཞིན་ཡོད་པ་གསུངས་བྱུང་།།

གསར་འགོད་པ། ཨོ་རྒྱན།

རྩོམ་སྒྲིག་པ། དཔལ་ལྡན་རྒྱལ།

དྲ་ཐོག་སྤེལ་མཁན། རྟ་མགྲིན་དབང་ཕྱུག