བཀའ་ཁྲི་བློ་བཟང་སེང་གེས་བརྒྱུད་ལམ་བཅའ་དྲིར་ལན་འདེབས།

༄༅༎བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་གིས་ བོད་ནང་གི་དཀའ་སྡུག་རྣམས་དངོས་གསུམ་འཛེམས་མེད་ཀྱིས་ཐོག་ནས་གསུང་གི་ཡིན་ལ་ རྒྱ་ནག་གཞུང་གིས་ཕྱི་ལོ་༡༩༥༠གོང་དུ་ བོད་དེ་སྤྱི་ཚོགས་རིང་ལུགས་ཀྱི་བདེ་སྐྱིད་ལྡན་པའི་ཡུལ་ཞིག་བཟོ་རྒྱུའི་ཞལ་བཞེས་གནང་ཡོད་ཀྱང་ མི་ལོ་༦༠རྗེས་སུའང་ཞལ་བཞེས་གནང་བ་དེ་ལག་ལེན་རྩ་བ་ནས་མ་གནང་བའི་ཐོག བོད་དེ་ཡ་ང་བའི་ཡུལ་ཞིག་བཟོས་ཡོད་པ་རེད་ཅེས་སི་ཨེན་ཨེན་(CNN)གསར་འགྱུར་ལས་ཁང་ལ་གསུང་བཞག། 
དེ་བཞིན་བཀའ་བློན་ཁྲི་པ་མཆོག་གིས་རྒྱ་ནག་གཞུང་གིས་བོད་མིར་དྲག་གནོན་བྱེད་རྒྱུ་དེ་མཚམས་འཇོགས་མ་གནང་བར་ བོད་མི་ཚོས་རྒྱ་ནག་གཞུང་ལ་ཆེ་ཐོངས་ཞུ་གི་མ་རེད་ གལ་སྲིད་རྒྱ་ནག་གཞུང་ལ་ཆེ་ཐོངས་དང་བརྩི་བཀུར་དགོས་ན་ རྒྱལ་སྤྱིའི་འགྲོ་བ་མིའི་ཐོབ་ཐང་དང་ རང་དབང་གཞི་ལ་བཞག་པའི་ཐོག་ནས་ བོད་མི་ཚོར་འགྲོ་བ་མིའི་ཐོབ་ཐང་དང་རང་དབང་སྤྲོད་དགོས་པ་རེད་ཅེས་གསུང་བཞག།
ཡང་བཀའ་བློན་ཁྲི་པ་བློ་བཟང་སེང་གེ་མཆོག་གིས་ རྒྱ་བོད་གཉིས་ཀྱིས་ གྲོས་མོལ་གྱི་ལམ་ནས་དཀའ་རྙོགས་སེལ་ཐབས་གནང་བ་ཡིན་ན་ མ་འོངས་བོད་མིའི་མདུན་ལམ་བཟང་པོ་ཞིག་ཡོང་བ་རེ་བ་ཡོད་ལུགས་ཡང་གསུང་བཞག། ཡང་བཀའ་བློན་ཁྲི་པ་མཆོག་གིས་ ཨ་རབ་ཡུལ་གྲུ་མང་པོའི་ནང་ དེ་སྔ་བསམ་ཡུལ་ལའང་མེད་པའི་འགྱུར་བ་ཆེན་པོ་ཕྱིན་ཡོད་པ་རེད་ བྱས་ཙང་རྒྱལ་སྤྱིའི་གནས་སྟངས་ལ་འགྱུར་བ་གཏན་གཏན་འགྲོ་གི་རེད་ཅེས་གསུང་བཞག། དེ་བཞིན་ཁོང་གིས་ ང་ལ་ཆ་བཞག་ན་ ངས་མུ་མཐུད་ནས་དབུ་མའི་ལམ་གྱི་མཛད་ཇུས་ཐོག་ཤར་བསྐྱོད་བྱས་ཏེ་ བོད་ཀྱི་དཀའ་རྙོགས་དེ་སེལ་ཐབས་བྱེད་ཀྱི་ཡིན་ རྒྱ་བོད་གཉིས་ཀར་ཁེ་ཕན་ཡོད་པའི་ བོད་ལ་རང་སྲིད་རང་སྐྱོང་ཚད་ལྡན་ཞིག་རག་ཐབས་སུ་འབད་བརྩོན་ཞུ་གི་ཡིན་ འོན་ཀྱང་ཕྲན་བུ་མི་འདྲ་བ་ཞིག་ལ་ ངས་བོད་ནང་གི་དངོས་ཡོད་གནས་སྟངས་དེ་འཛེམས་མེད་ཀྱི་ཐོག་ནས་གསལ་པོར་བཤད་ཀྱི་ཡིན་ དལྟའི་བོད་ཀྱི་གནས་སྟངས་ནི་ཡ་ང་བའི་གནས་སྟངས་ཤིག་འོག་གནས་ཡོད་པ་རེད་ལ་ བོད་དེ་མི་སེར་སྤེལ་ཡུལ་ཞིག་མ་གཏོགས་ སྤྱི་ཚོགས་རིང་ལུགས་དེ་འདྲ་ཡོད་པ་མ་རེད་ཅེས་གསུང་བཞག།