ཀི་ལིན་ཊོན་མཆོག་ནས་རྒྱ་ནག་ལ་འབོད་སྐུལ་ཤུགས་ཆེ་གནང་བ།

༄༅༎རྒྱ་ནག་གི་སྲིད་འཛིན་ཨ་མི་རི་ཀར་གཞུང་འབྲེལ་འཚམས་གཟིགས་ཆེད་འབྱོར་རྒྱུར་ཉིན་གྲངས་འགའ་ཤས་ལས་མེད་པའི་སྔོན་ཏེ་ ཕྱི་ཟླ་༡ཚེས་༡༤གཟའ་པ་སངས་ཉིན་ཨ་མི་རི་ཀའི་ཕྱི་སྲིད་དྲུང་ཆེ་ལྕམ་ཧི་ལ་རི་ཀིལན་ཊན་མཆོག་གིས་ཨ་མི་རི་ཀའི་ངོས་ནས་རྒྱ་ནག་དང་མི་མཐུན་པ་ཡོད་པའི་གནད་དོན་ཁག་སྦས་གསང་བྱས་ཏེ་ཐོག་བཞག་གནང་རྒྱུ་མིན་པ་གསུངས་པ་དང་ རྒྱ་ནག་ནང་གི་སྲིད་དོན་གྱི་བཙོན་པ་ཚོ་གློད་གྲོལ་དགོས་པ་དང་གྲངས་ཉུང་མི་རིགས་ཚོའི་ཐོག་ལག་བསྟར་བྱེད་པའི་སྲིད་བྱུས་ཡར་རྒྱས་གཏོང་དགོས་པའི་འབོད་བསྐུལ་ཤུགས་ཆེ་གནང་འདུག།

གཟའ་པ་སངས་ཉིན་ལྕམ་ཧི་ལ་རི་ཀིལན་ཊན་མཆོག་ནས་རྒྱ་ནག་དང་འབྲེལ་བའི་སྲིད་བྱུས་ཀྱི་ཐོག་འདི་ག་རྒྱལ་ས་ལྦ་ཤིང་ཊོན་དུ་གལ་ཆེའི་གསུང་བཤད་ཅིག་གནང་པའི་སྐབས་ཨ་མི་རི་ཀ་དང་རྒྱ་ནག་གཉིས་ཀྱི་འབྲེལ་ལམ་རང་བཞིན་འགག་རྩའི་གནས་བབས་ཤོག་གི་ཐོག་སླེབས་ཡོད་པ་གསུངས་པ་དང་ ཨ་མི་རི་ཀའི་ངོས་ནས་རྒྱ་ནག་གི་ནུས་སྟོབས་རྒྱས་བཞིན་པར་འགོག་ཐབས་གང་ཡང་གནང་གི་མེད་པ་གསུངས་འདུག།

ལྕམ་ཧི་ལ་རི་ཀིལན་ཊན་མཆོག་ནས་དེ་སྔོན་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་བཀའ་མོལ་ཤུགས་ཆེ་མ་གསུངས་པར་སྐྱོན་བརྗོད་ཆེན་པོ་ཕོགས་ཡོད་ན་ཡང་གཟའ་པ་སངས་ཉིན་གྱི་གསུང་བཤད་དེའི་སྐབས་ རྣམ་ཀུན་དང་མི་འདྲ་བར་རྒྱ་ནག་གི་ངོས་ནས་འགྲོ་བ་མིའི་ཐོབ་ཐང་ཡར་རྒྱས་གཏོང་དགོས་སྐོར་གྱི་བཀའ་མོལ་ཤུགས་ཆེ་གནང་ཡོད་ཅིང་ ལྷག་པར་དུ་ལྕམ་ཧི་ལ་རི་ཀིལན་ཊན་མཆོག་གིས་རྒྱ་ནག་གཞུང་གིས་ ནོ་བེལ་ཞི་བདེའི་བྱ་དགའ་བཞེས་མཁན་ལིའུ་ཤའོ་བོ་གཙོས་གཞུང་དང་ལྟ་བ་མི་མཐུན་མཁན་གྱི་སྲིད་དོན་གྱི་བཙོན་པ་ཡོངས་རྫོགས་གློད་གྲོལ་གཏོང་དགོས་པ་གསུངས་འདུག།

ལྕམ་ཧི་ལ་རི་ཀིལན་ཊན་མཆོག་ནས་རྒྱ་ནག་ནང་མི་མང་པོ་ཞིག་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་དོན་གཉེར་བྱ་མཁན་དེ་དག་ནི་ རྒྱ་ནག་གི་ནང་སྲིད་ལ་ཐེ་བྱུས་དང་མངའ་དབང་གཅིག་འགྱུར་མེད་པ་བཟོ་ཐབས་བྱ་མཁན་དུ་ངོས་འཛིན་བྱེད་མཁན་ཡོད་ཀྱང་ རྒྱ་ནག་ནི་འཛམ་གླིང་མཉམ་འབྲེལ་རྒྱལ་ཚོགས་ཐོག་བཙུགས་མཁན་གྱི་ཡུལ་གྲུའི་གྲས་ཤིག་ཡིན་སྟབས་ རྒྱ་ནག་གི་ངོས་ནས་རྒྱལ་སྤྱིའི་ནང་ཡོངས་ཁྱབ་ངོས་འཛིན་བྱེད་པའི་འགྲོ་བ་མི་ཡོངས་ཀྱི་ཐོབ་ཐང་ལ་བརྩི་བཀུར་དགོས་ཀྱི་རེད་ཅེས་གསུངས་འདུག།