རྒྱ་མིའི་ཚོང་པ་ཁག་ཅིག་ལྷ་ས་ནས་ཕྱིར་ལོག་བྱ་རྒྱུའི་རྣོ་བསམ།

༄༅༎བོད་ནང་སྔར་ལོ་བོད་མིའི་ངོ་རྒོལ་གྱི་ལས་འགུལ་ནང་རྒྱ་མིས་དབང་བའི་ཚོང་ཁང་སོགས་མེར་བསྲེགས་བཏང་བའི་དོན་རྐྱེན་དང་རྗེས་སུ་སྤྱི་ཡོངས་སུ་བོད་ནང་ཡུལ་བསྐོར་སྤྲོ་འཆམ་ཡོང་མི་ཉུང་དུ་ཕྱིན་པ་དང་བོད་མིས་རྒྱ་རིགས་ཐད་འཛིན་པའི་ཁོང་ཁྲོའི་རྣམ་འགྱུར་བཅས་ཀྱིས་རྒྱུ་རྐྱེན་རིམ་པ་ཞིག་ལ་བརྟེན་བོད་ཀྱི་རྒྱལ་ས་ལྷ་སའི་ནང་ཡོད་པའི་རྒྱ་མིའི་ཚོང་པ་ཁག་ཅིག་རྒྱ་ནག་ལ་ཕྱིར་ལོག་བྱ་རྒྱུའི་རྣོ་བསམ་གཏོང་གི་ཡོད་སྐོར་ཁ་ས་རོའུ་ཀྲར་གསར་འགྱུར་ལས་ཁང་གིས་བོད་ཀྱི་རྒྱལ་ས་ལྷ་ས་ནས་གནས་ཚུལ་ཞིག་སྤེལ་ཡོད་པ་རེད།

དེ་ཡང་བོད་ཀྱི་རྒྱལ་ས་ལྷ་སའི་ནང་ཚོང་ལས་གཉེར་མཁན་རྒྱ་མིའི་ཁ་ཆེ་ཞིག་གིས་རོའུ་ཀྲར་གསར་འགོད་པར་གསུང་ན་ཚོང་ཡག་པོ་གཏན་ནས་མེད་པ་དང་མི་མང་ལ་དངུལ་དེ་སྔ་ནང་བཞིན་མེད་པའི་ཁར་འདི་ལོ་བོད་མི་མང་ཆེ་བས་ལོ་གསར་ཡང་གཏང་རྒྱུའི་འཆར་གཞི་བྱེད་ཀྱི་མེད་པས་སྔར་རྒྱུན་བཞིན་ཉོ་ཆ་ཡང་རྒྱབ་ཀྱི་མིན་འདུག་ཅེས་བོད་ཀྱི་ས་ཁུལ་ལ་ཚོང་ལས་གཉེར་བཞིན་པའི་རྒྱ་མིའི་ཚོང་པ་ཚོར་ཚོང་མེད་པའི་དཀའ་ངལ་གང་ཆེ་སྤྲད་བཞིན་པའི་གནས་སྟངས་ཤིག་ངོ་སྤྲོད་བྱས་ཡོད་པ་རེད།

རྒྱ་ནག་གཞུང་གིས་སྔར་ལོ་བོད་མིའི་ཞི་བའི་ངོ་རྒོལ་གྱི་ལས་འགུལ་ལ་དྲག་གནོན་བྱས་ཏེ་བོད་མི་ཆེས་མང་པོ་ཞིག་གི་ཚེ་སྲོག་བཅད་པ་དང་བརྒྱ་ཕྲག་མང་པོར་རྨས་སྐྱོན་དང་སྟོང་ཕྲག་མང་པོ་འཛིན་བཟུང་གིས་བཙོན་བཅུག་བྱས་པར་སོང་དྲག་གནོན་ཕོག་པའི་རང་གི་མི་མང་ལ་མྱ་ངན་ཞུ་ཆེད་རྒྱ་ནག་གཞུང་གིས་ཇི་ཙམ་བཙན་བཀའ་བཏང་ཡང་འདི་ལོ་བོད་ཀྱི་ལོ་གསར་སྲུང་བརྩི་བྱ་རྒྱུ་མིན་པའི་རྣམ་འགྱུར་ཤུགས་ཆེ་གསལ་སྟོན་གནང་བཞིན་ཡོད་པ་རེད།

དེ་ཡང་གོང་ཞུས་བོད་ཀྱི་རྒྱལ་ས་ལྷ་སའི་ནང་ཚོང་ལས་གཉེར་བཞིན་པའི་རྒྱ་ཁ་ཆེའི་ཚོང་པ་འདིས་རོའུ་ཀྲར་གསར་འགོད་པར་གསུང་ན་དེ་སྔ་ཡིན་ན་བོད་མི་ཚོས་དངོས་ཟོག་ཉོ་བར་ཡོང་སྐབས་མཐུན་ལམ་ཡག་པོ་བྱེད་ཀྱི་ཡོད་པ་དང་ད་ཆ་དངོས་ཟོག་ཉོ་དགོས་ན་ཚོང་དང་འབྲེལ་བའི་སྐད་ཆ་མ་གཏོགས་གཞན་རྒྱུན་ལྡན་གྱི་སྐད་ཆ་ཤོད་རེས་ཀྱང་བྱེད་ཀྱི་མེད་པའི་གནས་སྟངས་ཤིག་ངོ་སྤྲོད་བྱས་ཡོད་པ་རེད།།