རྒྱ་ནག་གི་འབྲེལ་མཐུད་འགན་འཛིན་ཐའེ་ལྦན་དུ་ཕེབས་གཏན།

༄༅༎རྒྱ་ནག་གི་ཐའེ་ལྦན་འབྲེལ་མཐུད་འགན་འཛིན་གཙོ་བོ་ཁྲེན་ཡུན་ལིན་གྱིས་རིང་མིན་ཐའེ་ལྦན་དུ་ཕེབས་གཏན་འཁེལ་ཡོད་པ་ལྟར་དེའི་སྔ་རོལ་ཐའེ་ལྦན་གཞུང་གི་ཆེས་མཐོའི་འགན་འཛིན་ཁོངས་ནས་རྒྱ་ནག་དང་འབྲེལ་འཐུད་གནང་མཁན་ལའེ་ཧྲིན་ཡོན་མཆོག་གིས་དེ་རིང་སྔ་དྲོ་རྒྱལ་ཡོངས་ལ་གསལ་བསྒྲགས་གནང་གསལ་ལྟར་ན་རྒྱ་ནག་གི་ཆེས་མཐོའི་སྐུ་ཚབ་མཉམ་དུ་ཡུལ་གཉིས་དབར་གྱི་འབྲེལ་བའི་ཐད་བཀའ་མོལ་ག་རེ་གནང་བ་ཡོངས་རྫོགས་ཕྱི་གསལ་ནང་གསལ་གནང་རྒྱུ་ཡིན་པས་མ་ཟད་ཐའེ་ལྦན་གྱི་མི་མང་ཚོའི་རང་ཐག་རང་གཅོད་ཀྱི་རང་དབང་ལ་ཉེན་ཁ་བཟོ་གི་མ་རེད་ཅེས་ཁས་ལེན་གནང་ཡོད་པ་རེད། རྒྱ་ནག་དང་འབྲེལ་འཐུད་གནང་མཁན་ལའེ་ཧྲིན་ཡོན་མཆོག་གིས་དེ་རིང་སྔ་དྲོ་རྒྱལ་ཡོངས་ལ་གསལ་བསྒྲགས་གནང་སྐབས་རྒྱ་ནག་དང་མཉམ་དུ་གྲོས་མཐུན་ག་འདྲ་ཞིག་བཞག་པ་ཡིན་ནའང་ངས་ཐའེ་ལྦན་གྱི་གྲོས་ཚོགས་ལ་སྙན་སེང་ཞུ་གི་ཡིན་པས་གྲོས་མཐུན་གྱི་ནང་དོན་ཡོངས་རྫོགས་དཀར་ཆ་ལྡན་པའི་ཉི་མའི་འོད་ཀྱི་འོག་ལ་གསལ་ཞིང་གསལ་བ་ཞིབ་འཇུག་གནང་ཐུབ་ཀྱི་རེད་ཅེས་གསལ་བཤད་གནང་ཡོད་པ་རེད། རྒྱ་ནག་དང་ཐའེ་ལྦན་དབར་གྱི་ཚོང་འབྲེལ་ཐེ་བས་གང་ཅིའི་འབྲེལ་བའི་ཐད་བཀའ་མོལ་གནང་རྒྱུའི་མཛད་འཆར་དེ་བཞིན་བདུན་ཕྲག་རྗེས་མའི་ནང་གནང་གཏན་འཁེལ་ཡོད་པ་རེད།