ནོ་བེལ་ཞི་བདེའི་གཟེངས་རྟགས་སྤྲོད་ཡུལ་འོས་མི་ལིའུ་ཤའོ་ཕུའོ།

༄༅༎རྒྱ་ནག་གཞུང་ཕྱོགས་དང་ཆབ་སྲིད་ཀྱི་ལྟ་སྤྱོད་མི་མཐུན་མཁན་རྒྱ་ནག་གི་བཙོན་འཇུག་བྱེད་བཞིན་པའི་རྩོམ་པ་པོ་ལིའུ་ཤའོ་ཕུའོ་ནོ་བེལ་ཞི་བདེའི་གཟེངས་རྟགས་ཀྱི་འོས་མིའི་གྲས་ནས་རིམ་པ་མཐོ་གྲས་སུ་སླེབས་ཡོད་འདུག 

དེ་ཡང་རྡ་སི་ཀྲའར་ཞེས་པའི་དྲ་རྒྱའི་གསར་འགྱུར་བརྒྱུད་ལམ་ཐོག་དེ་རིང་གནས་ཚུལ་སྤེལ་བའི་ནང་ ཕྱི་ཟླ་བཅུ་པའི་ཚེས་༨ཉིན་ནོ་བེལ་ཞི་བདེའི་གཟེངས་རྟགས་འབུལ་ཡུལ་མིང་ཐོ་དངོས་སུ་ཕྱིར་བསྒྲགས་གནང་གི་ཡོད་པ་དང་ ད་ལོའི་ནོ་བེལ་ཞི་བདེའི་གཟེངས་རྟགས་འབུལ་སའི་འོས་མིའི་མིང་གཞུང་ནང་ནས་རྒྱ་ནག་གཞུང་དང་ཆབ་སྲིད་ལྟ་སྤྱོད་མི་མཐུན་མཁན་རྒྱ་ནག་ཏུ་བཙོན་འཇུག་བྱེད་མུས་ཡིནཔ་རྩོམ་པ་པོ་ལིའུ་ཤའོ་ཕུའོ་ཨང་ཐོ་གྲས་སུ་སླེབས་ཡོད་པར་བརྟེན་ གནད་དོན་དབྱེ་ཞིབ་པ་དང་ཕྱི་རྒྱལ་གྱི་གསར་འགྱུར་བརྒྱུད་ལམ་མང་པོ་ཞིག་གི་ཐོག་ད་ལོའི་ནོ་བེལ་ཞི་བདེའི་གཟེངས་རྟགས་དེ་བཞིན་རྒྱ་ནག་གཞུང་དང་ཆབ་སྲིད་ཀྱི་ལྟ་སྤྱོད་མི་མཐུན་མཁན་རྒྱ་ནག་གི་བཙོན་ཁང་ནང་བཙོན་འཇུག་བྱེད་བཞིན་པའི་རྩོམ་པ་པོ་ལིའུ་ཤའོ་ཕུའོ་ལ་གནང་སྲིད་པའི་ཚོད་རྩིས་བྱེད་ཀྱི་ཡོད་པ་རེད་

གལ་སྲིད་ད་ལོའི་ནོ་བེལ་ཞི་བདེའི་གཟེངས་རྟགས་དེ་ལིའུ་ཤའོ་ཕུའོ་ལ་ཐོབ་ཚེ་དེ་ནི་རྒྱ་མི་རིགས་ལ་ནོ་བེལ་ཞི་བདེའི་གཟེངས་རྟགས་ཐོབ་པ་ཐོག་མ་དེ་ཆགས་ཀྱི་ཡོད་ཅིང་ ཡིན་ནའི་ནོ་བེལ་ཞི་བདེའི་གཟེངས་རྟགས་ཉམས་ཞིབ་ལས་ཁང་གི་དབུ་ཁྲིད་ནས་ཉེ་ཆར་ནོ་བེལ་བརྙན་འཕྲིན་ལས་ཁང་གི་དྲི་བར་ལན་འདེབས་གནང་བའི་སྐབས་ རྒྱ་ནག་ཕྱི་སྲིད་ལས་ཁང་གི་བློན་ཆེན་གཞོན་པ་གྲོན་བའོ་ཡིས་ད་ལོ་ཕྱི་ཟླ་དྲུག་པའི་ནང་ནོ་བེལ་དུ་འཚམས་གཟིགས་གནང་བའི་སྐབས་དམིགས་བསལ་ཁོང་དང་ཐུག་ཕྲད་གནང་བའི་དགོས་འདུན་བཏོན་ནས་ གལ་སྲིད་ནོ་བེལ་ཞི་བདེའི་གཟེངས་རྟགས་ཚོགས་ཆུང་གིས་ད་ལོའི་ནོ་བེལ་ཞི་བདེའི་གཟེངས་རྟགས་དེ་ལིའུ་ཤའོ་ཕུའོ་ལ་སྤྲད་པ་ཡིན་ཚེ་ དེས་རྐྱེན་པས་རྒྱ་ནག་དང་ནོར་ལྦེ་རྒྱལ་ཁབ་ཀྱི་འབྲེལ་ལམ་ལ་ཤུགས་རྐྱེན་ངན་པ་ཐེབས་སྲིད་པའི་ཉེན་བརྡ་བཏང་བའི་སྐོར་གསུང་ཡོད་པ་དང་ དེ་བཞིན་ལིའུ་ཤའོ་ཕུའོ་ཡི་བཟའ་ཟླ་ལིའུ་ཞའ་ཡིས་རྡ་སི་ཀྲའར་དྲ་གནས་གསར་འགྱུར་བརྒྱུད་ལམ་གྱི་དྲི་བར་ལན་འདེབས་གནང་བའི་སྐབས་ལ་ཡང་ ལིའུ་ཤའོ་ཕུའོ་ནོ་བེལ་ཞི་བདེའི་གཟེངས་རྟགས་གནང་སའི་འོས་མིའི་ནང་ནས་མིང་ཐོ་གྲས་འགོར་སླེབས་ཡོད་ན་ཡང་ རྒྱ་ནག་གཞུང་གིས་གནོན་ཤུགས་འོག་ཁོང་ལ་དངོས་སུ་གཟེངས་རྟགས་དེ་ཐོབ་རྒྱུར་ཁོང་གིས་ཡིད་ཆེས་དེ་ཙམ་གནང་གི་མེད་པ་གསུང་འདུག 

རྩོམ་པ་པོ་ལིའུ་ཤའོ་ཕུའོ་ཡིས་ ཉིས་སྟོང་བརྒྱད་ཀྱི་རྩ་འཛིན་ཞེས་པ་རྒྱ་ནག་གི་ཆབ་སྲིད་ལམ་ལུགས་ལ་བསྒྱུར་བཅོས་ཀྱི་དགོས་འདུན་ཡི་གེ་ཐོག་མར་བཏོན་གནང་བའི་རྐྱེན་གྱིས་རྒྱ་ནག་གཞུང་གིས་ན་ནིང་ཁོང་ལ་རྒྱལ་ཁབ་ཀྱི་གསང་བ་ཕྱིར་གྱར་བྱས་ལུགས་ཀྱི་ཉེས་བཙུགས་ཐོག་ནས་བཙོན་འཇུག་ལོ་བཅུ་གཅིག་གི་ལོ་ཚད་ཁྲིམས་ཐག་བཅད་ཡོད་པ་རེད་