ཨ་མི་རི་ཀས་ཐའེ་ལྦན་ལ་མཚོན་ཆའི་རིགས་ཚོང་འགྲེམས་གནང་རྒྱུ།

༄༅༎ཨ་མི་རི་ཀས་ཐའེ་ལྦན་གྱི་སྲུང་སྐྱོབ་ལ་མཁོ་བའི་ཌོ་ལར་ཐེར་འབུམ་དྲུག་དང་གྲངས་ཆུང་ལྔ་ཙམ་གནད་པའི་ཚད་མཐོའི་སྤུས་ཚད་ལྡན་པའི་མཚོན་ཆའི་རིགས་ཚོང་འགྲེམས་གནང་རྒྱུའི་ཐག་གཅོད་དེར་ཐའེ་ལྦན་གཞུང་གིས་དགའ་བསུ་ཆེན་པོ་ཞུས་ཡོད་པ་རེད་

འོན་ཀྱང་ཨ་མི་རི་ཀའི་གཞུང་གི་སྲིད་བྱུས་དེར་རྒྱ་ནག་གཞུང་དང་མི་མང་གིས་ངོ་རྒོལ་བྱེད་ཀྱི་ཡོད་ལ་དེ་ལ་ཁས་ལེན་ཞུ་གི་མིན་ཞེས་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པ་ལིའུ་ཅན་ཁྲའོས་གཞུང་འབྲེལ་གཏམ་བཤད་ཅིག་ལྷན་ཁང་གི་དྲ་རྒྱའི་ཐོག་འགྲེམས་སྤེལ་བྱས་ཡོད་པ་དང་ཨ་མི་རི་ཀའི་གཞུང་གི་སྲིད་བྱུས་དེ་ཡིས་ཨ་མི་རི་ཀ་དང་རྒྱ་ནག་དབར་གྱི་འབྲེལ་བར་གནོད་སྐྱོན་གཏང་གི་རེད་ཅེས་ཀྱང་རྒྱ་ནག་གི་ཕྱི་སྲིད་བློན་ཆེན་ལས་རོགས་ཧོ་ཡ་ཕེ་ཡིས་རྒྱ་ནག་ནང་གི་ཨ་མི་རི་ཀའི་གཞུང་ཚབ་ལས་ཁང་གི་ཆབ་སྲིད་ལས་བྱེད་པ་ཕྱི་སྲིད་ལྷན་ཁང་དུ་བཀའ་འགུགས་ཀྱིས་གཞུང་འབྲེལ་སྐྱོན་བརྗོད་ཞུས་ཡོད་ལུགས་ཀྱང་གནས་ཚུལ་ཐོན་ཡོད་པ་རེད་ ཐའེ་ལྦན་གྱི་སྲུང་སྐྱོབ་ཆེད་དུ་མཁོ་གནད་ཆེ་བའི་མཚོན་ཆའི་ཁོངས་ནས་དཔེར་ན་ཨ་པ་ཆི་ཟེར་བའི་ཐད་འཕུར་གནམ་གྲུ་དང་པེ་ཀྲོཡོཏ་ཟེར་བའི་མེ་ཤུགས་འཕུར་མདེལ་སོགས་ཚུད་པའི་ཚད་མཐོའི་མཚོན་ཆའི་རིགས་ཚོང་འགྲེམས་གནང་རྒྱུ་ཡིན་སྐོར་ཨ་མི་རི་ཀའི་སྲིད་འཛིན་གྱི་ལས་ཁུངས་ཀྱིས་ཉེ་ཆར་གཟའ་པ་སངས་ཉིན་གྲོས་ཚོགས་ལ་བརྡ་ཐོ་ཞིག་གཏོང་གནང་ཡོད་པ་དང་གྲོས་ཚོགས་ཀྱི་ཚོགས་མི་རྣམ་པ་ཚོའི་ཁྲོད་ནས་ཉི་མ་སུམ་བརྒྱ་དགུའི་ནང་ཚུད་ལ་སྲིད་འཛིན་གྱི་ཐག་གཅོད་དེར་ཁས་ལེན་ཡོད་པའི་གྲོས་ཆོད་བཞག་ཚེ་མཚོན་ཆ་དེ་ཚོའི་རིགས་ཐའེ་ལྦན་ལ་དངོས་སུ་ཚོང་འགྲེམས་གནང་ཡག་འགོ་བཙུགས་གནང་གི་རེད་ཅེས་ཨ་མི་རི་ཀའི་ཕྱི་སྲིད་ལྷན་ཁང་གིས་གསུངས་ཡོད་པ་རེད་ རྒྱ་ནག་གིས་བཙན་འཛུལ་བྱས་པའི་ཉེན་ཁ་ལས་ཐའེ་ལྦན་གྱིས་སོ་སོ་སྐྱོབ་ཐུབ་པའི་ཆེད་དུ་ཨ་མི་རི་ཀས་ཁྲིམས་མཐུན་དགོས་དབང་གཞིར་བཟུང་ཐའེ་ལྦན་ལ་མཚོན་ཆ་འཚོང་དགོས་ཀྱི་ཡོད༎