རྒྱ་ནག་གི་བྱེད་སྟངས་ལ་ཐེ་ཝན་གྱིས་སྐྱོན་བརྗོད་བྱས་འདུག

རྒྱ་ནག་གིས་ཐེ་ཝན་ལ་ཉེན་བརྡ་དང་དམག་སྦྱོང་བྱས་བའི་བྱེད་སྟངས་ལ་ཐེ་ཝན་གྱིས་སྐྱོན་བརྗོད་བྱས་འདུག
རྒྱ་ནག་གིས་ཐེ་ཝན་ལ་ཚོད་ཟིམ་དགོས་པའི་ཉེན་བརྡ་བཏང་བའི་རྗེས་སུ་འབར་མདེལ་ངོ་མ་ཅན་གྱི་མེ་ཤུགས་འཕུར་མདེལ་འཕེན་ནས་དམག་གི་སྦྱོང་བརྡར་བྱས་ཡོད་པ་རེད། ཐེ་ཝན་དང་ཉེ་སའི་རྒྱ་ནག་གི་ལྷོ་ཤར་གྱི་མཚོ་རྒྱུད་ནས་མཚོ་འགག་གཉིས་ཀྱི་ས་ཁུལ་དུ་རྒྱ་ནག་གི་དམག་གིས་ཐད་འཕུར་གནམ་གྲུ་ནས་མེ་ཤུགས་འཕུར་མདེལ་འཕེན་ནས་དམག་གི་སྦྱོང་བརྡར་བྱས་ཡོད་པ་དང༌། ད་རེས་གཟའ་ལྷག་པའི་ཉིན་རྒྱ་ནག་གི་གཞུང་འབྲེལ་གྱི་གསར་འགྱུར་བརྒྱུད་ལམ་ནང་རྒྱ་ནག་གི་དམག་གི་སྦྱོང་བརྡར་བྱེད་རྒྱུ་འདི་ནི་ཐེ་ཝན་གྱི་འགོ་ཁྲིད་ཚོས་ཐེ་ཝན་རང་བཙན་གྱི་ཕྱོགས་སུ་བསྐྱོད་བཞིན་པར་ཐད་ཀར་བརྡ་ལན་གྱི་ཚུལ་དུ་ཡིན་ལུགས་དྲིལ་བསྒྲགས་བྱས་ཡོད་པ་རེད།
ཐེ་ཝན་གྱི་རྒྱ་ནག་སྐམ་ས་ཆེན་པོའི་ལས་དོན་ལྷན་ཁང་གིས་གསལ་བསྒྲགས་ཤིག་སྤེལ་བའི་ནང་། རྒྱ་ནག་གིས་མཁའ་དམག་དཔུང་སྡེའི་སྦྱོང་བརྡར་དེ་ནི་ཐེ་ཝན་ལ་འཇིགས་བསྐུལ་བྱེད་པར་དམིགས་པའི་གཞི་རྒྱ་ཆེན་པོ་མིན་པའི་རྣམ་ཀུན་གྱི་བྱེད་ཕྱོགས་ཤིག་རེད་ཅེས་དང་། ང་ཚོའི་ཆོད་སེམས་ནི་དྲག་སྤྱོད་ཀྱི་ལམ་ནས་འཇིགས་བསྐུལ་དེ་རིགས་ལ་ནམ་ལ་མགོ་མོ་མི་སྒུར་བའི་ཐོག་མངའ་དབང་སྲུང་སྐྱོབ་བྱ་རྒྱུ་དེ་ཡིན་ཞེས་བརྗོད་འདུག

གསར་འགོད་པ་ཚེ་དབང་ནོར་བུ།