རྒྱ་ནག་གཞུང་གིས་༸གོང་ས་མཆོག་དང་བཀའ་མོལ་གནང་རྒྱུ།

༄༅༎ཕྱི་ཟླ་ ༤ ཚེས་ ༢༥ རེས་གཟའ་པ་སངས་ཀྱི་ཉིན་རྒྱ་ནག་གཞུང་གི་ཤིང་ཧྭ་གསར་འགྱུར་བརྒྱུད་ལམ་དང་རྒྱལ་ཡོངས་བརྙན་འཕྲིན་ཐོག་གནས་ཚུལ་སྤེལ་བར་གཞིགས་ན། རྒྱ་ནག་གཞུང་གིས་བོད་ཀྱི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱོགས་གཉིས་དབར་གྲོས་མོལ་སླར་གསོ་དགོས་པའི་དགོས་འདུན་ཐེངས་མང་བཏོན་པར་བསམ་ཞིབ་ཀྱིས་རྒྱ་ནག་གི་འབྲེལ་ཡོད་ལས་ཁང་གི་ནེ་བའི་ནང་༸གོང་ས་མཆོག་སྐུ་སྒེར་གྱི་སྐུ་ཚབ་དང་ལྷན་དུ་གྲོས་མོལ་གནང་རྒྱུར་ཡིན་པ་འཁོད་ཡོད་པ་རེད། རྒྱ་ནག་གཞུང་ནས་༸གོང་ས་མཆོག་ནས་དོན་དངོས་ཐོག་རྒྱལ་ཁ་བྲལ་གྱི་ལས་འགུལ་མཚམས་འཇོག་དགོས་པ་དང༌། པེ་ཅིང་ཨོ་ལིམ་པིཀས྄་རྩེད་འགྲན་ལ་འགོག་རྐྱེན་མི་བཟོ་རྒྱུའི་ལས་འགུལ་མཚམས་འཇོག་གནང་ནས་མ་འོངས་གྲོས་མོལ་མུ་མཐུད་ཡོང་རྒྱུར་ཆ་རྐྱེན་སྐྲུན་དགོས་སྐོར་ཡང་འཁོད་ཡོད་པ་རེད། འཛམ་གླིང་གི་དབུ་ཁྲིད་ཁག་ཅིག་ནས་བཟང་ཕྱོགས་ཀྱི་རྣམ་འགྱུར་དེ་ལ་དགའ་བསུ་ཞུས་ཡོད་པ་རེད༎