རྒྱ་ནག་གཞུང་གིས་དྲ་རྒྱའི་སྟངས་འཛིན་ལ་རང་སྲུང་བྱ་ཐབས།

༄༅༎རྒྱ་ནག་གཞུང་གིས་དྲ་རྒྱའི་ཐོག་སྟངས་འཛིན་བྱེད་ཀྱི་ཡོད་པ་སྐྱོན་བརྗོད་ལ་རང་སྲུང་བྱ་ཐབས་ཤུགས་ཆེ་རུ་གཏོང་བཞིན་ཡོད་འདུག

དེ་ཡང་གཟའ་འཁོར་གཉིས་ཙམ་གྱི་གོང་དྲ་རྒྱའི་ཐོག་གནས་ཚུལ་འཚོལ་ཞིབ་བྱ་རྒྱུའི་ཚོང་དོན་ཁང་ཆེ་ཤོས་གུའུ་གལ་ཡིས་ཚོང་ལས་ཁང་དེའི་རྒྱ་ནག་ནང་གི་དྲ་རྒྱའི་ལས་དོན་ཐོག་རྒྱ་ནག་གཞུང་གིས་སྟངས་འཛིན་དང་དེ་བཞིན་དྲ་རྒྱའི་ཐོག་གི་མི་སྒེར་གྱི་ཡིག་འགྲུལ་ཁ་བྱང་རྐུ་འཁྱེར་གྱི་གནས་ཚུལ་བྱུང་བའི་སྐོར་ཕྱིར་བཏོན་གནང་སྟེ་རྒྱ་ནག་གིས་དྲ་རྒྱ་དེའི་ཐོག་སྟངས་འཛིན་བྱ་རྒྱུ་མཚམས་ཇོག་དགོས་པའི་ཉེན་བརྡ་བཏང་བའི་རྗེས་ཨ་རི་དང་རྒྱ་ནག་དབར་དྲ་རྒྱའི་གནད་དོན་ཐོག་རྩོད་གླེང་ཤུགས་ཆེ་བྱུང་ཡོད་ཅིང་ད་རེས་གཟའ་ཟླ་བའི་ཉིན་རྒྱ་ནག་གཞུང་གིས་སླར་ཡང་ཨ་རི་གཞུང་གིས་རྒྱ་ནག་ནས་དྲ་རྒྱའི་ཐོག་སྟངས་འཛིན་བྱེད་ཀྱི་ཡོད་པའི་བྱ་སྤྱོད་ལ་བསྐྱར་དུ་རང་སྲུང་བྱ་ཐབས་ཀྱི་གཏམ་བཤད་སྤེལ་ཏེ་རྒྱ་ནག་གཞུང་གིས་དྲ་རྒྱའི་ཐོག་དམ་བསྒྲགས་བཀག་སྡོམ་གྱི་ཡོ་ཆས་བྱེད་སྤྱོད་བྱ་ཡི་མེད་ལུགས་བརྗོད་ནས་དྲ་རྒྱའི་གནད་དོན་ཐོག་རྒྱ་ནག་གིས་རང་སྲུང་བྱ་ཐབས་ཀྱི་ལན་འདེབས་བྱེད་ཤུགས་ཆེ་རུ་གཏོང་བཞིན་ཡོད་པ་དང་དེས་རྐྱེན་པས་ཉེ་བའི་ཆར་རྒྱ་ནག་དང་ཨ་རིའི་དབར་ཨ་རིའི་ཐའེ་ལྦན་ལ་གོ་མཙོན་ཕྱིར ཚོང་གི་གནད་དོན་དང་དེ་བཞིན་རྒྱལ་ཁབ་གཉིས་དབར་ཚོང་དོན་གྱི་དཀའ་རྙོག་སོགས་ཀྱི་ཐོག་རྩོད་གླེང་ཡོད་མུས་ཐོག་ད་རེས་དྲ་རྒྱའི་གནད་དོན་དེས་རྒྱལ་ཁབ་གཉིས་དབར་གྱི་འབྲེལ་ལམ་དཀའ་ངལ་དེ་བཞིན་ཇེ་ཆེར་བསྐྱོད་བཞིན་ཡོད་པ་རེད། པེ་ཅིང་ནང་རྟེན་གཞི་བྱས་པའི་གསར་འགྱུར་དང་ཁ་པར་འཕྲུལ་རིག་འབྲེལ་མཐུད་ལས་ཁང་ལྦུལྥ་གུ་རུཔ་ཞེས་པའི་སློབ་སྟོན་ཌེ་ལྦི་ཌི་ལྦུལྥ་ཡིས་རྩོད་རྙོག་དེ་རིགས་རྒྱ་ནག་གཞུང་གི་ཆེས་མཐོའི་ཆབ་སྲིད་ལས་དོན་ཐོག་གལ་འགངས་ཆེན་པོ་ཞིག་ཏུ་རྩིས་ཀྱི་ཡོད་པ་དང་རྒྱ་ནག་གཞུང་གིས་གཞི་རྩའི་གནད་དོན་དེ་རིགས་ཐོག་ཕྱིར་བཤོལ་བྱེད་མི་སྲིད་པའི་དགོངས་ཚུལ་གསུངས་འདུག