བོད་ནང་གནམ་ཐང་ལྔ་པ་འཛུགས་བསྐྲུན་བྱེད་འཆར།

༄༅༎རྒྱ་ནག་གཞུང་གིས་བོད་ནང་ཡུལ་བསྐོར་སྤྲོ་འཆམ་པའི་འགྲིམ་འགྲུལ་མང་དུ་གཏོང་ཐབས་ཆེད་བོད་ནང་འགྲུལ་པ་སྐྱེལ་འདྲེན་གྱི་གནམ་ཐང་ལྔ་པ་འཛུགས་བསྐྲུན་འགོ་འཛུགས་བྱས་ཡོད་པའི་སྐོར་རྒྱ་ནག་གི་གཞུང་འབྲེལ་གསར་ལས་ཁང་གིས་གནས་ཚུལ་སྤེལ་འདུག

དེ་ཡང་རྒྱ་ནག་གི་གཞུང་འབྲེལ་ཤིན་ཧཱ་གསར་འགྱུར་ལས་ཁང་གིས་སྤེལ་བའི་གནས་ཚུལ་ནང་གསལ་ལྟར་ན་རྒྱ་ནག་གཞུང་གིས་བོད་ཀྱི་གྲོང་ཁྱེར་ཆེ་ཤོས་གཉིས་པ་གཞིས་ཀ་རྩེའི་ནང་ཞི་བདེ་གནམ་ཐང་ཞེས་པའི་གནམ་ཐང་གསར་པ་ཞིག་འཛུགས་བསྐྲུན་སླད་མ་གནས་ཨ་སྒོར་ས་ཡ་བདུན་ཅུ་ལྷག་གི་འགྲོ་གྲོན་འཆར་འགོད་བྱས་ཡོད་པ་དང་གནམ་ཐང་གསར་བསྐྲུན་གྱི་ལས་འཆར་དེ་ལོ་གཉིས་ཙམ་རིང་འགོར་སྲིད་པ་དང་གནམ་ཐང་དེའི་རྒྱུད་ལོ་རེར་འགྲུལ་པ་༢༣༠༠༠༠ཙམ་འགྲུལ་སྐྱེལ་ཐུབ་པའི་སྔོན་དཔག་བྱེད་བཞིན་ཡོད་འདུག ཤིན་ཧཱ་གསར་ལས་ཁང་གིས་གཞིས་ཀ་རྩེ་ས་གནས་རྒྱ་ནག་གཞུང་གི་འབྲེལ་ཡོད་མཐོ་རིམ་ལས་བྱེད་པས་གཏམ་བཤད་ལུང་འདྲེན་བྱས་པར་གཞིགས་ན་གནམ་ཐང་གསར་པ་དེའི་རྒྱུད་གཞིས་ཀ་རྩེ་གྲོང་ཁྱེར་དང་ཕྱིའི་ཡུལ་ཁག་དབར་མཐུན་འབྲེལ་གྱི་བརྒྱུད་ལམ་གསར་པ་ཞིག་བསྐྲུན་རྒྱུ་མ་ཟད་ལས་གཞི་དེའི་ཐོག་ནས་ས་གནས་ཀྱི་སྤྱི་ཚོགས་དང་དཔལ་འབྱོར་གྱི་ཐད་ལ་གོ་སྐབས་དང་ནུས་པ་གསར་བསྐྲུན་ཐུབ་རྒྱུ་ཡིན་སྐོར་འགྲེལ་བརྗོད་བྱས་འདུག གཞིས་ཀ་རྩེ་དང་ལྷ་ས་གྲོང་ཁྱེར་དབར་ད་ལྟ་ནས་རི་ལིའི་བརྒྱུད་ལམ་བཟོ་འཆར་ཡིན་ལ་རྒྱ་ནག་གཞུང་གིས་བོད་ནང་གནམ་ཐང་དང་རི་ལི་དེ་བཞིན་གཞུང་ལམ་གསར་འཛུགས་ཀྱི་ལས་གཞི་དེ་ཚོས་བོད་ནང་འཚོ་བའི་གནས་སྟངས་ལ་ཡར་རྒྱས་འགྲོ་རྒྱུ་ཡིན་སྐོར་བརྗོད་ཀྱི་ཡོད་ཀྱང་ཕྱི་ཕྱོགས་ནས་བོད་མི་དང་འགྲོ་བ་མིའི་ཐོབ་ཐང་ཚོགས་པ་ཁག་གིས་རྒྱ་ནག་གི་བོད་ནང་འཛུགས་བསྐྲུན་ལས་གྲྭ་དེ་ཚོས་རྒྱ་རིགས་མི་འབོར་བོད་ནང་གཞིས་སྤོས་སྟབས་བདེ་ཆགས་རྒྱུ་དང་ཆབས་ཅིག་ཐུན་མོང་མ་ཡིན་པའི་བོད་ཀྱི་རིག་གཞུང་དང་བོད་མིའི་ངོ་བོ་རྩ་བརླག་འགྲོ་ཉེན་ཡིན་སྐོར་སྐྱོན་འཛུགས་དང་སྐྱོན་བརྗོད་བྱེད་བཞིན་ཡོད་པ་རེད།