རྒྱ་གཞུང་ཉེན་རྟོག་པས་རྔ་བ་ཀིརྟི་དགོན་པའི་གྲྭ་བསོད་ནམས་དཔལ་ལྡན་བཙན་ཁྲིད་བྱས་ཡོད་པ།

༄༅།།གནས་ཚུལ་འདི་ཕྱི་ཟླ་ ༡༠ ཚེས་ ༤ ཉིན་བཞུགས་སྒར་རྡ་རམ་ས་ལའི་ཀིརྟི་བྱེས་པ་གྲྭ་ཚང་གི་བོད་གནས་ཉམས་ཞིབ་པ་ཀ་ཉག་ཚེ་རིང་ལགས་ཀྱི་མཚན་ཐོག་ནས་ཕྱིར་བསྒྲགས་གནང་ཞིང་། ཁོང་གིས་གནས་ཚུལ་བོད་ནས་༢༠༡༩ ཟླ་ ༡༠ ཚེས་ ༣ ཉིན་འབྱོར་བ་དང་། དེ་གཞིར་བཟུང་ལྟར་ན་འདི་ལོའི་ཕྱི་ཟླ་ ༩ ཚེས་ ༡༩ ཉིན་རྔ་བ་ཀིརྟི་དགོན་གྱི་གྲྭ་བསོད་ནམས་དཔལ་ལྡན། རང་ལོ་ ༢༢ ཡིན་པ་ཁོང་རྒྱ་གཞུང་གི་ཉེན་རྟོག་པས་དགོན་པའི་ནང་ནས་བཙན་ཁྲིད་བྱས་འདུག  འོན་ཀྱང་ཁོང་ད་བར་གང་དུ་བཀག་ཉར་བྱས་ཡོད་མེད་ཤེས་རྟོགས་མེད་པ་རེད་འདུག་ལ། ཁོང་འཛིན་བཟུང་བྱེད་དགོས་པའི་རྒྱུ་མཚན་ཅི་ཡིན་ཡང་གསལ་པོ་ཤེས་རྟོགས་མེད་པ་འགྲེལ་བརྗོད་གནང་འདུག  འོན་ཀྱང་འཛིན་བཟུང་བྱས་པའི་གྲྭ་བསོད་ནམས་དཔལ་ལྡན་ལགས་ངོ་ཤེས་མཁན་བོད་ནང་ཡོད་པའི་བོད་མི་ཞིག་གིས། བསོད་ནམས་དཔལ་ལྡན་ལགས་ཀྱི་སྐད་འཕྲིན་བར་སྟོང་ལ་བོད་ཀྱི་སྐད་ཡིག་གི་ཉམ་ང་བའི་གནས་སྟངས་སོགས་ཀྱི་རྩོམ་ཐུང་རེ་བྲིས་ནས་བཞག་ཡོད་པ་དེས་ཡིན་སྲིད་པའི་ཚོད་དཔག་གནང་འདུག
ཀིརྟི་བྱེས་པ་གྲྭ་ཚང་གི་བོད་གནས་ཉམས་ཞིབ་ཁང་གི་གནས་ཚུལ་སྤེལ་བ་དེའི་ནང་། བསོད་ནམས་དཔལ་ལྡན་ལགས་ནི་ཆུང་ཆུང་སྐབས་ནས་རྔ་བ་ཀིརྟི་དགོན་པར་ཆོས་ཞུགས་གནང་པ་དང་། ཕ་ཡུལ་རྔ་བ་རྫོང་གཅའ་ཡུལ་ཚོ་ནག་ཚང་མའི་སྡེ་བ་ནས་ཡིན་ཞིང་། མ་མིང་ལ་སྐལ་ཁོ་ཡིན་འདུག།