རྒྱ་ནག་ཧྲན་ཤིའི་ཞིང་ཆེན་ནང་ས་རུད་རྐྱེན་པས་མི་༡༧༨ཤི་བ།

༄༅༎རྒྱ་ནག་ཧྲན་ཤིའི་ཞིང་ཆེན་ནང་གང་བྱུང་གིས་གཏེར་བསྔོགས་འདོན་བྱེད་མཁན་ཤུགས་ཆེན་པོ་ཡོད་པའི་རྐྱེན་གྱིས་ཚེས་༨ཉིན་ཞིང་ཆེན་དེའི་ཐའོ་ཧྲེ་གྲོང་ཚོའི་བརྒྱུད་དུ་ས་རུད་ཤུགས་ཆེན་པོ་བྱུང་ནས་དེའི་རྒྱུད་ཀྱི་ཚོང་ར་ཞིག་དང་གྲོང་ཚོ་ཁ་ཤས་ས་བརྡེབས་འོག་ཤོར་ནས་ད་བར་མི་གྲངས་༡༧༨ཙམ་གྱི་ཚེ་སྲོག་ཤོར་ཡོད་པ་དང༌། མི་གྲངས་སུམ་ཅུ་སོ་གྲངས་ལ་རྨས་སྐྱོན་ཕོག་ཡོད་པ་རེད།

རྒྱ་ནག་གཞུང་འབྲེལ་གསར་འགྱུར་བརྒྱུད་ལམ་ཐོག་དེའི་སྐོར་གནས་ཚུལ་འཁོད་པར་གཞིགས་ན། ཚེ་སྲོག་ཤོར་བའི་ཕུང་པོ་༣༨ཙམ་ནང་མི་ཚོས་ངོ་རྟགས་ཆེད་ནས་རྩིས་ལེན་བྱས་ཟིན་པ་དང༌། གཞུང་ཕྱོགས་ནས་མི་ཤི་པོའི་ནང་མིར་སྐྱོན་ཚབ་སྤྲོད་དངུལ་མི་མང་ཤོག་སྒོར་ཁྲི་༢༠ཙམ་སྤྲོད་རྒྱུ་ཡིན་པ་འཁོད་འདུག ཧྲན་ཤིའི་ཞིང་ཆེན་གྱི་རྫོང་དང་གྲོང་ཚོ་ཁག་ནང་ས་གནས་གཞུང་དང་ཚོང་དོན་ཁེ་ལས་པ་ཚོའི་དབར་ལྐོག་འབྲེལ་བྱས་ནས་གཏེར་བསྔོགས་འདོན་བྱེད་ཆོག་པའི་ཁྲིམས་མཐུན་ལག་འཁྱེར་སོགས་གང་ཡང་མེད་པའི་འོག་གང་བྱུང་གི་གཏེར་ཁ་བསྔོགས་འདོན་བྱེད་མཁན་ཧ་ཅང་མང་པོ་ཡོད་པ་དང༌། གང་སར་གཏེར་ཁ་བསྔོགས་འདོན་གྱིས་ས་དྲུས་པའི་རྐྱེན་གྱིས་ས་ཁུལ་དེའི་ནང་ས་རུད་ཐེབས་རྒྱུའི་ཉེན་ཚབས་ཡོད་མུས་ཡིན་ཡང༌། གནད་དོན་དེར་གཞུང་ཕྱོགས་ནས་ཐག་གཅོད་མ་བྱས་སྟབས་ད་རེས་ཀྱི་དོན་རྐྱེན་དེ་བྱུང་བ་ཞིག་ཡིན་ཞིང༌། དེའི་ཐོག་ཧྲན་ཤིའི་ཞིང་ཆེན་གྱི་སྤྱི་ཁྱབ་འགན་འཛིན་ནས་ཞིང་ཆེན་གྱི་ལྷན་ཚོགས་ཐོག་ས་རུད་ཀྱི་གནོད་འཚེའི་ནང་ཚེ་སྲོག་ཤོར་བའི་མི་དེ་དག་གི་ནང་མི་ཚོར་དགོངས་སེལ་ཞུས་ཡོད་པ་རེད།