བོད་རྔ་བ་ཀིརྟི་དགོན་གྱི་གྲ་ཞིག་ལ་ཁྲིམས་བཅད།

༄༅༎བོད་མདོ་སྨད་ཨ་མདོ་རྔ་བ་ཁུལ་གྱི་རྒྱ་མིའི་ཁྲིམས་ཁང་ཞིག་གིས་རྔ་བ་ཀིརྟི་དགོན་པའི་དགེ་འདུན་པ་ཞིག་ལ་ ད་ལོ་ཕྱི་ཟླ་༣པའི་ཚེས་༡༦ཉིན་རང་ལུས་མེར་བསྲེག་བཏང་ནས་འདས་གྲོངས་ཕྱིན་པའི་དགེ་འདུན་པ་ཕུན་ཚོགས་ལགས་སྨན་ཁང་དུ་མ་འཁྲིད་པར་སྦས་བསྐུམས་བྱས་པའི་ནག་ཉེས་བཙུགས་ཏེ། ལོ་༡༡རིང་དུས་བཀག་བཙོན་འཇུག་གི་ཉེས་ཆད་གཏོང་རྒྱུའི་ཁྲིམས་ཐག་བཅད་ཡོད་སྐོར་རྒྱ་ནག་གཞུང་འབྲེལ་ཤིན་ཧྭ་གསར་ལས་ཁང་གིས་དེ་རིང་གནས་ཚུལ་སྤེལ་བཞག།

འགྲོ་བ་མིའི་ཐོབ་ཐང་ཚོགས་པ་ཁང་གིས་གསུང་ན། དགེ་འདུན་པ་ཕུན་ཚོགས་ལགས་ཀྱིས་མདོ་སྨད་རྔ་བ་ཁུལ་རྒྱ་གཞུང་གིས་དམ་བསྒྲཌ་དང་དྲག་གནོན་ཤུགས་ཆེ་བྱེད་བཞིན་པར་ངོ་རྒོལ་གནང་ཆེད་ཁོང་གི་སྐུ་ལུས་མེར་བསྲེག་བཏང་གནང་ཡོད་པ་རེད། རྔ་བ་ཁྲིམས་ཁང་གིས་ དགེ་འདུན་པ་བརྩོན་འགྲུས་ལགས་སུ་ལོ་༡༡རིང་དུས་བཀག་བཙོན་འཇུག་གི་ཉེས་ཆད་གཏོང་དགོས་དོན་ནི། ཁོང་གིས་ལོ་ན་༡༦ཡིན་པའི་དགེ་འདུན་པ་ཕུན་ཚོགས་ལགས་ལ་རྨས་སྐྱོན་ཕོག་པ་ཤེས་བཞིན་དུ་སྨན་ཁང་ལ་སྨན་བཅོས་བྱེད་པར་མ་འཁྲིད་པར་སྦས་བསྐུམས་་བྱས་ཡོད་སྟབས་། སྨན་བཅོས་དུས་འགྱངས་བྱུང་བའི་རྐྱེན་གྱིས་གྲྭ་ཕུན་ཚོགས་ལ་སྲོག་སྐྱོན་བྱུང་ཡོད་ལུགས་སྐྱོན་འཛུགས་བྱས་འདུག། ཤིན་ཧྭ་གསར་ལས་ཁང་གིས་གནས་ཚུལ་སྤེལ་བའི་ནང༌། དགེ་འདུན་པ་བརྩོན་འགྲུས་ཀྱི་དགེ་ཕྲུག་དང་ཚ་བོ་ཕུན་ཚོགས་ཀྱིས་ད་ལོ་ཕྱི་ཟླ་༣ཚེས་༡༦ཉིན་རང་ལུས་མེར་བསྲེག་བཏང་བ་དང༌། དེ་རྗེས་ཆུ་ཚོད་༡༡རིང་སྦས་བསྐུམས་་བྱས་ནས་བཞག་ཡོད་སྟབས། དེའི་ཉིན་ཕྱི་མ་སྔ་དྲོ་ས་གནས་སྨན་ཁང་ཞིག་དུ་སྨན་བཅོས་བྱས་ཡོད་ཀྱང་སྨན་བཅོས་ལམ་ལྷོང་མ་བྱུང་བར་། ཕུན་ཚོགས་འདས་གྲོངས་ཕྱིན་ཡོད་ཚུལ་བཀོད་འདུག། ་ཤིན་ཧྭ་གསར་ལམ་གྱིས་ བདུན་སྔོན་མ་ དགེ་འདུན་པ་ཕུན་ཚོགས་ལགས་འདས་གྲོངས་ཕྱིན་པའི་གྱོད་གཞི་དང་འབྲེལ་བ་ཡོད་པའི་དགེ་འདུན་པ་གཞན་གཉིས་ལ་ཁྲིམས་ཁང་གིས་ནག་ཉེས་བཙུགས་ཡོད་པའི་གནས་ཚུལ་མུ་མཐུད་འགྲེལ་བརྗོད་བྱས་བཞག།