རྒྱ་གཞུང་གིས་བོད་རིཊ་ས་ཁུལ་དུ་ཡར་རྒྱས་གཏང་འཆར།

༄༅༎རྒྱ་ནག་གི་སྲིད་འཛིན་ཧུའུ་ཅིང་ཏའོ་མཆོག་གི་ངོས་ནས་རྒྱ་ནག་གི་ཞིང་ཆེན་ཁག་གི་ནང་དུ་ཡོད་པའི་བོད་རིགས་ས་ཁུལ་ནང་།ཁ་བྲལ་དང་ལྐོག་བཤམས་ཀྱི་ལས་དོན་འགོག་ཐབས་སུ་དཔལ་འབྱོར་གྱི་ཡར་རྒྱས་ལས་དོན་སྤེལ་དགོས་པའི་སྐོར་ནན་བརྗོད་གནང་བའི་གནས་ཚུལ་ཐོན་འདུག

ཉེ་སྔོན་རྒྱ་ནག་གི་ཆེས་མཐོའི་དཔོན་རིགས་མཉམ་ཞུགས་གནང་ནས་བོད་ཀྱི་ལས་དོན་ལྷན་ཚོགས་དེ་རྒྱལ་ས་པེ་ཅིང་དུ་བསྐོང་ཚོགས་གནང་ཡོད་ཅིང་།ལོ་ངོ་དགུའི་རྗེས་སུ་ཚོགས་པའི་བོད་ཀྱི་ལས་དོན་ལྷན་ཚོགས་དེའི་ནང་།རྒྱ་ནག་གིས་བོད་རང་སྐྱོང་ལྗོངས་ཟེར་བའི་བོད་ཀྱི་ས་ཁུལ་ཙམ་དུ་མིན་པའི་རྒྱ་ནག་གི་ཞིང་ཆེན་ཁག་བཞིིའི་ནང་དུ་ཟླ་བསྒྲིལ་བཏང་ཡོད་པའི་བོད་རིགས་ས་ཁུལ་ནང་དུ་ཡང་དཔལ་འབྱོར་གྱི་འཕེལ་རྒྱས་གཏོང་དགོས་པའི་སྐོར་ནན་བརྗོད་གནང་འདུག

རྒྱ་ནག་གི་ཆིང་ཧའི་དང་།ཟི་ཁྲོན་དང༌།ཀན་སུ་དང༌།ཡུ་ནན་བཅས་རྒྱ་ནག་གི་ཞིང་ཆེན་བཞིའི་ནང་དུ་ཡོད་པའི་བོད་རིགས་ས་ཁུལ་ནང་།ཁ་བྲལ་གྱི་ལས་འགུལ་དང་ལྐོག་བཤམས་ཀྱི་ལས་དོན་བཀག་འགོག་གི་ཆེད་དུ།ས་ཁུལ་ནང་ཡར་རྒྱལ་ཡོང་བར་འབད་བརྩོན་ཤུགས་ཆེ་བྱ་དགོས་པའི་སྐོར་ནན་བསྐུལ་གནང་འདུག

བོད་ཀྱི་ཨ་མདོ་དང་ཁམས་ཀྱི་ས་ཁུལ་མང་ཆེ་བ་རྒྱ་ནག་གིས་ཞིང་ཆེན་བཞིའི་ནང་བོད་རིགས་ས་ཁུལ་ཅེས་བརྗོད་ནས་ཟླ་བསྒྲིལ་བཏང་ཡོད་པ་དང་།ས་ཁུལ་དུ་ཡོད་པའི་བོད་རིགས་ཞིང་པ་དང་འབྲོག་མ་རྣམས་ཀྱི་ལོ་འཁོར་ཡོང་སྒོ་དེ།ཕྱི་ལོ་ཉིས་སྟོང་བཅུའི་ནང་ཚུད་རྒྱལ་ཡོངས་ཀྱི་ལོ་འཁོར་ཡོང་སྒོའི་ཚད་གཞི་དང་མཉམ་པ་བཟོ་རྒྱུ་ཡིན་པའི་སྐོར་སྲིད་འཛིན་ཧུའུ་ཅིང་ཏའོས་གསུངས་ཡོད་པ་རེད།

བོད་རིག་པའི་ཞིབ་འཇུག་ཁག་གི་འགོ་འཛིན་ལེན་ཞང་སྨིན་གྱིས་རྒྱ་ནག་གི་ཞིང་ཆེན་ནང་དུ་ཡོད་པའི་བོད་རིགས་ས་ཁུལ་ཁག་གི་གནད་དོན་ཐོག་དམིགས་བསལ་དོ་སྣང་བྱས་པ་དེ་སྲིད་བྱུས་ཀྱི་འགྱུར་བ་ཆེན་པོ་ཞིག་ཡིན་པའི་འགྲེལ་བརྗོད་བྱས་འདུག་ཕྱི་ལོ་ཉིས་སྟོང་བརྒྱད་ལོར་བོད་རིགས་ས་ཁུལ་དེ་ཚོའི་ནང་རྒྱ་ནག་གི་དབང་འཛིན་ལ་ཞི་བའི་ངོ་རྒོལ་གྱི་ལས་འགུལ་ཤུགས་ཆེ་སྤེལ་ཡོད་པ་བཅས་ཀྱི་གནས་ཚུལ་ཐོན་འདུག།