རྒྱ་ནག་ནང་ཐན་པ་ཚབས་ཆེ་བཏང་སྟེ་འཐུང་ཆུའི་དཀའ་ངལ།

༄༅༎རྒྱ་ནག་བྱང་ཕྱོགས་ས་ཁུལ་དུ་ཐན་པ་ཚབས་ཆེ་བཏང་སྟེ་མི་དང་སྒོ་ཕྱུགས་སེམས་ཅན་ས་ཡ་མང་པོར་འཐུང་ཆུ་མ་འདེངས་པའི་དཀའ་ངལ་ཆེན་པོ་འཕྲད་བཞིན་ཡོད་འདུག་པ་དང་གཞུང་ཕྱོགས་ནས་ཞིང་པ་ཚོའི་ཐོན་སྐྱེས་ཉམས་ཉེས་ཕྱིན་པར་གུན་གསབ་ཆེད་ཌོ་ལར་ཐེར་འབུམ་མང་པོའི་རོགས་རང་འགྲོ་འགྲེམ་བྱ་རྒྱུའི་ལས་གཞིའི་མགྱོགས་ཚད་མྱུར་དུ་གཏང་རྒྱུ་ཡིན་པ་བརྗོད་འདུག

རྒྱ་ནག་གཞུང་འབྲེལ་བརྙན་འཕྲིན་གྱི་ཐོག་བརྗོད་པར་གཞིགས་ན་ཐན་པ་བཏང་པའི་རྐྱེན་གྱིས་མི་གྲངས་ས་ཡ་བཞི་དང་ཚག་ཞི་དང་སྒོ་ཕྱུགས་སེམས་ཅན་གྲངས་ས་ཡ་གཉིས་དང་ཚག་གཅིག་ཙམ་ལ་འཐུང་ཆུ་མ་འདེང་པའི་དཀའ་ངལ་འཕྲད་བཞིན་ཡོད་འདུག་ལ་གཞུང་འབྲེལ་གསར་ལས་ཁང་གིས་གནས་ཚུལ་སྤེལ་བར་གཞིགས་ན་འདི་ནི་རྒྱ་ནག་བྱང་ཕྱོགས་ཁུལ་གྱི་ལོ་ལྔ་བཅུའི་ནང་གི་ཐན་པ་ཚབས་ཆེ་ཤོས་ཡིན་འདུག

རྒྱ་ནག་གཞུང་ཕྱོགས་ནས་ཐན་པའི་རྐྱེན་གྱིས་སྟོན་འབྲས་ལག་ཐོབ་མ་བྱུང་བ་དང་དེ་མིན་ཐན་པའི་རྐྱེན་གྱིས་གོད་ཆགས་ཕོག་པའི་ཞིང་པ་ཚོར་རྒྱ་ནག་གཞུང་གིས་རྒྱ་མིའི་སྒོར་མོ་ཐེར་འབུམ་བརྒྱད་བཅུ་གྱ་དྲུག་ཙམ་འགོ་འགྲེམ་བྱ་རྒྱུར་བཀའ་ཁྲོལ་བཏང་ཡོད་འདུག གནད་དོན་དབྱེ་ཞིབ་པ་ཚོས་ཞིང་པའི་ས་ཁུལ་གྱི་དཔལ་འབྱོར་ཡོང་ཁུངས་ལ་དོ་ཕོག་ཚབས་ཆེ་མི་འགྲོ་བའི་སྔོན་འགོག་བྱེད་བཞིན་པ་དེའི་རྒྱུ་མཚན་གཙོ་བོ་གཅིག་ནི་སྤྱི་ཚོགས་བདེ་འཇགས་ཐད་ཟངས་ཟིན་མི་ཡོང་བའི་ཆེད་ཡིན་པ་འགྲེལ་བརྗོད་བྱེད་བཞིན་ཡོད་ཅིང་རྒྱ་ནག་གི་དཔལ་འབྱོར་ཉམ་རྒུད་འགྲོ་བཞིན་པའི་རྐྱེན་གྱིས་རྒྱ་ནག་ཞིང་པའི་ས་ཁུལ་ནས་ཡིན་པའི་མི་གྲངས་ས་ཡ་མང་པོ་ལས་ཀ་བྱེད་ཡུལ་གྱི་བཟོ་གྲྭ་སྟོང་ཕྲག་མང་པོ་སྒོ་བརྒྱབ་དགོས་པ་ཆགས་སྟབས་ད་ཆ་ཞིང་པའི་ས་ཁུལ་ཁག་གི་ནང་ལས་མེད་མིའི་གྲངས་འབོར་ཇེ་ཆེར་འགྲོ་བཞིན་ཡོད་པ་རེད།

རྒྱ་ནག་གི་ཞིང་ཆེན་ཆེ་ཁག་བརྒྱད་ཙམ་གྱི་ནང་ཐན་པ་བཏང་བཞིན་ཡོད་པ་དང་ཞིང་ཆེན་འདི་དག་ནི་རྒྱ་ནག་གི་གྲོའི་ཐོན་ཁུངས་རྩ་འབོར་གྱི་ཕྱེད་ཀ་ཙམ་འབྱུང་ཡུལ་ཡིན་ཞིང་རྒྱ་ནག་གཞུང་གི་སོ་ནམ་ལས་དོན་ལྷན་ཁང་གིས་གཟའ་པ་སངས་བར་གྲོ་འདེབས་ཡུལ་གྱི་ཞིང་ཆེན་དེ་དག་ནང་གི་ས་ཆ་ཧེཀ་ཊར་ས་ཡ་བཅུ་གཅིག་མ་ཟིན་ཙམ་ལ་ཐན་པའི་གོད་ཆགས་ཕོག་ཡོད་པ་འགྲེལ་བརྗོད་བྱས་འདུག།