ཨ་རིའི་སྙན་ཐོར་རྒྱ་ནག་གིས་མི་འདོད་པའི་སྐྱོན་བརྗོད།

༄༅༎ཨ་རི་དང་རྒྱ་ནག་དབར་དཔལ་འབྱོར་དང་བདེ་འཇགས་གནད་དོན་ལྟ་ཞིབ་གནང་མཁན་གྱི་ཨ་རིའི་གྲོས་ཚོགས་ཀྱི་འབྲེལ་ཡོད་ཚོགས་ཚུང་ནས་ཕྱི་ལོ་ཉིས་སྟོང་དགུ་ལོིའི་སྙན་ཐོ་གཟའ་འཁོར་སྔོན་མ་འདོན་སྤེལ་གནང་བའི་ནང་ རྒྱ་ནག་གཞུང་གིས་གློག་ལས་འཕྲུལ་ཆས་འབྲེལ་ལམ་བརྒྱུད་ནས་ཨ་རིའི་གསང་བའི་གནས་ཚུལ་རྐུ་འཁྱེར་གྱིས་རྒྱ་ནག་གི་དམག་དང་དཔལ་འབྱོར་གྱི་སྟོབས་ཤུགས་ཆེ་རུ་གཏོང་གི་ཡོད་པའི་སྐོར་འཁོད་ཡོད་པར་  ད་རེས་ཕྱི་ཚེས་༢༣ཉིན་རྒྱ་ནག་ཕྱི་སྲིད་ལས་ཁང་གི་མགྲིན་ཚབ་པ་ཇིང་ཀང་གིས་བསྐྱོན་བརྗོད་ལན་འདེབས་བྱས་པ་ཞིག་རྒྱ་ནག་ཕྱི་སྲིད་ལས་ཁང་གི་དྲ་རྒྱའི་ཐོག་འཁོད་ཡོད་ཅིང་ དེའི་ནང་གོང་ཞུས་སྙན་ཐོ་དེ་བཞིན་རྒྱ་ནག་ཐོག་ཆེད་མངགས་སྐྱོན་བརྗོད་བྱེད་ཡས་ཀྱི་ཆེད་དུ་སྟོན་པ་ཞིག་ལས་གཞི་རྩའི་བདེན་པ་གང་ཡང་མེད་ལུགས་དང་ལྷག་པར་དུ་ཨ་རིའི་གྲོས་ཚོགས་ཀྱི་རྒྱ་ནག་དང་ཨ་རིའི་དབར་གྱི་དཔལ་འབྱོར་དང་བདེ་འཇགས་གནད་དོན་ཐོག་ལྟ་ཞིབ་བྱེད་མཁན་གྱི་ཚན་པ་དེ་བཞིན་ཐོག་མ་ནས་རྒྱ་ནག་ཐོག་དྲང་བདེན་མིན་པའི་རྣམ་འགྱུར་འོག་རྒྱ་ནག་གི་ནང་སྲིད་ལ་ཐེ་བྱུས་བྱེད་མཁན་གྱི་ཚན་པ་ཞིག་ཡིན་ལུགས་སོགས་ཀྱི་སྐྱོན་བརྗོད་བྱས་ཡོད་པ་རེད་ ཚོགས་མི་བཅུ་གཉིས་ལས་གྲུབ་པའི་ཨ་རིའི་གྲོས་ཚོགས་ཀྱི་རྒྱ་ནག་དང་ཨ་རིའི་དབར་དཔལ་འབྱོར་དང་བདེ་འཇགས་ལྟ་ཞིབ་ཚོགས་ཆུང་དེ་བཞིན་ཕྱི་ལོ་ཉིས་སྟོང་ལོར་གསར་བཙུགས་གནང་བ་ཞིག་ཡིན་པ་དང་ ཕྱི་ལོ་ཉིས་སྟོང་དགུ་ལོའི་སྙན་ཐོ་དེར་ཤོག་གྲངས་༣༦༧ཙམ་ཡོད་ཅིང་ དེ་ཡང་ཨ་རིའི་སྲིད་འཛིན་ཨོ་སྦ་མ་མཆོག་རྒྱ་ནག་ནང་རྒྱལ་དོན་འཚམས་གཟིགས་སྒྲུབ་མ་ཐག་ཕྱིར་བསྒྲགས་གནང་བ་ཞིག་ཡིན་པ་དང་   སྙན་ཐོ་དེའི་ནང་རྒྱ་ནག་གི་སོ་པས་ཨ་རིའི་གལ་ཆེའི་གསང་བའི་གནས་ཚུལ་རྐུ་འཁྱེར་བྱ་རྒྱུའི་ལས་དོན་ཤུགས་ཆེ་རུ་བཏང་ནས་རྒྱ་ནག་གི་དམག་དོན་དང་དཔལ་འབྱོར་གྱི་སྟོགས་ཤུགས་ཆེ་རུ་གཏོང་ཐབས་བྱེད་ཀྱི་ཡོད་པའི་ཁར་   རྒྱ་ནག་གཞུང་གིས་དྲ་རྒྱའི་སོ་པ་བེད་སྤྱོད་བྱས་སྟེ་ཨ་རིའི་ཨིན་དྲའི་དྲ་རྒྱའི་ལས་དོན་ཐོག་གནོད་ཚབས་ཇེ་ཆེར་བཟོ་བཞིན་པའི་སྐོར་སོགས་འཁོད་ཡོད་པ་རེད།