རྒྱ་གཞུང་གི་འཐུས་མིས་ནང་པའི་ལྷན་ཚོགས་ནས་ཕྱིར་འཐེན།

༄༅༎ཕྱི་ལོ་ཉིས་སྟོང་བཅུ་གཉིས་པའི་ཕྱི་ཟླ་དྲུག་པའི་ཚེས་༡༡ཉིན་ལྷོ་ཀུ་རི་ཡའི་གྲོང་ཁྱེར་ཡིཨོ་སུའུ་ནང་རྒྱལ་སྤྱིའི་ནང་པའི་ལྷན་ཚོགས་ཞེས་པ་དེར་ རྒྱ་ནག་གཞུང་གི་སྐུ་ཚབ་འཐུས་མི་རྒྱ་མིའི་དགེ་འདུན་པ་དང་ལས་བྱེད་བཅས་ཁྱོན་མི་གྲངས་༡༧ཚོགས་བཅར་དུ་སླེབས་པ་རྣམས་ཕྱི་ཚེས་༡༣གཟའ་ལྷག་པའི་ཉིན་གློ་བུར་དུ་ལྷན་ཚོགས་ནས་ཕྱིར་འཐེན་བྱས་ཡོད་འདུག ལྷན་ཚོགས་གོ་སྒྲིག་ཚོགས་ཆུང་གིས་བརྗོད་དོན་ལྟར་ན་  ལྷན་ཚོགས་དེར་བོད་མིའི་སྐུ་ཚབ་གསུམ་ཕེབས་ཡོད་པ་དེས་རྐྱེན་པས་ཡིན་ཚུལ་གསུངས་ཡོད་ཅིང་ སྤྱིར་རྒྱ་ནག་གཞུང་གི་སྐུ་ཚབ་འཐུས་མི་རྣམས་ཀྱིས་གཟའ་མིག་དམར་ཉིན་བོད་མིའི་སྐུ་ཚབ་གསུམ་པོ་ལྷན་ཚོགས་ནས་ཕྱིར་བུད་མ་བྱས་ཚེ་ རྒྱ་མིའི་སྐུ་ཚབ་ཚོས་ཚོགས་འདུ་ནས་ཕྱིར་འཐེན་བྱེད་རྒྱུ་ཡིན་པའི་སྡིག་ར་བཏང་བར་བརྟེན་ ཚོགས་འདུ་གོ་སྒྲིག་ཚོགས་ཆུང་གིས་སྤྱི་ཁྱབ་དྲུང་ཆེས་ལྷན་ཚོགས་མུ་མཐུད་ཚོགས་ཆེད་དེ་ལྟར་ཁས་ལེན་བྱས་ཡོད་ཀྱང་ བོད་མིའི་སྐུ་ཚབ་གསུམ་པོ་མུ་མཐུད་ལྷན་ཙོགས་སུ་ལྷན་ཞུགས་གནང་སྟབས་དེ་རིང་གཟའ་ལྷག་པའི་ཉིན་རྒྱ་ནག་གི་སྐུ་ཚབ་འཐུས་མི་རྣམས་ཀྱིས་ལྷན་ཚོགས་ནས་འཕྱིར་འཐེན་བྱས་ཡོད་པ་རེད་ ལྷན་ཚོགས་དེ་བཞིན་ཕྱི་ཚེས་༡༡ནས་༡༥བར་འཚོགས་ཀྱི་ཡོད་པ་དང་ སྐབས་དེར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་ཞུས་ཏེ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་པད་མ་ཆོས་འབྱོར་ལགས་ཀྱང་ལྷན་ཞུགས་གནང་ཡོད་ཅིང་ དེ་བཞིན་ལྷན་ཚོགས་སྐབས་རྒྱལ་ཁབ་༣༠ཙམ་ནས་ནང་པའི་དབུ་ཁྲིད་༤༠༠ཙམ་ལྷན་འཛོམས་གནང་ཡོད་པ་དང་ ལྷན་ཚོགས་འདི་བཞིན་ལོ་གཉིས་རེའི་མཚམས་སུ་ཐེངས་རེ་འཚོགས་བཞིན་ཡོད་པ་རེད་