རྒྱ་ནག་དང་ཡོ་རོབ་དབར་འགྲོ་བ་མིའི་ཐོབ་ཐང་ཐོག་གླེང་བ།

༄༅༎ཕྱི་ཚེས་༡༦ཉིན་ནས་ཉིན་གྲངས་གཉིས་རིང་རྒྱ་ནག་གི་རྒྱལ་ས་པེ་ཅིན་དུ་རྒྱ་ནག་དང་ཡོ་རོབ་མཉམ་འབྲེལ་སྒྲིག་འཛུགས་ཀྱི་དཔོན་རིགས་དབར་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་སྐོར་གྱི་གྲོས་མོལ་ཐེངས་༣༠དེ་གནང་ཡོད་པ་དང་། རྒྱ་ནག་གི་འགྲོ་བ་མིའི་ཐོབ་ཐང་གནད་དོན་ཐོག་གི་གྲོས་མོལ་དེ་བཞིན་ཡོ་རོབ་མཉམ་འབྲེལ་སྒྲིག་འཛུགས་ཀྱི་ཕྱི་འབྲེལ་ལས་ཁང་གི་ཨེ་ཤེ་ཡའི་སྡེ་ཚན་གྱི་འགན་འཛིན་ཇིམ་མོ་རེན་དང་རྒྱ་ནག་ཕྱི་སྲིད་ལས་ཁང་གི་རྒྱལ་སྤྱིའི་སྡེ་ཚན་གྱི་དཔོན་རིགས་གྲན་ཤུད་གཉིས་ཀྱིས་གཙོ་སྐྱོང་གནང་ཡོད་པ་རེད། ཕྱོགས་གཉིས་དབར་རྒྱ་ནག་གི་འགྲོ་བ་མིའི་ཐོབ་ཐང་གནད་དོན་སྐོར་གྱི་གྲོས་མོལ་གྲུབ་རྗེས་ཡོ་རོབ་མཉམ་འབྲེལ་སྒྲིག་འཛུགས་ཀྱིས་གསལ་བསྒྲགས་ཤིག་སྤེལ་བའི་ནང་རྒྱ་ནག་གི་དཔོན་རིགས་དང་ལྷན་དུ་བོད་ཀྱི་གནད་དོན་དང་། ཤིན་ཅང་ནང་སོག་གི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་གནད་དོན་སྐོར་ལ་གྲོས་མོལ་གནང་བ་རེད། རྒྱ་ནག་ནང་ཁྲིམས་ལུགས་སྲ་བརྟན་དང་སྨྲ་བརྗོད་རང་དབང་སྐོར་ཆོས་ལུགས་བྱེད་སྒོ་རང་དབང་ཐོག་ནས་སྤེལ་ཆོག་དགོས་པའི་སྐོར་སོགས་དང་། ཉེ་བའི་ཆར་རྒྱ་ནག་གཞུང་ཕྱོགས་དང་སྲིད་དོན་གྱི་ལྟ་སྤྱོད་མི་མཐུན་མཁན་མང་པོ་ཞིག་འཛིན་བཟུང་བྱས་པའི་གནད་དོན་སྐོར་སོགས་ཀྱི་ཐོག་བཀའ་བསྡུར་གནང་མ་ཟད་རྒྱ་ནག་གཞུང་གིས་བཙོན་འཇུག་བྱེད་བཞིན་པའི་ཆབ་སྲིད་བཙོན་པའི་གནས་སྟངས་སྐོར་ཡང་ཁ་གསལ་ཤེས་རྟོགས་བྱུང་བ་དང་། རྒྱ་ནག་གཞུང་གིས་ཀིརྟི་དགོན་པའི་དགེ་འདུན་པ་འཇུ་བཟུང་བྱས་པ་རྣམས་ཀྱི་གནས་ཚུལ་ཁ་གསལ་སྤྲོད་རྒྱུའི་དགོས་འདུན་ཡང་བཏོན་ཡོད་པའི་སྐོར་འཁོད་ཡོད་འདུག རྒྱ་ནག་གཞུང་འབྲེལ་ཤིན་ཧྭ་གསར་འགྱུར་རྒྱུད་ལམ་གྱིས་དེའི་སྐོར་གཟའ་པ་སངས་ཉིན་གནས་ཚུལ་སྤེལ་ཡོད་པའི་ནང་རྒྱ་ནག་གཞུང་གིས་ཡོ་རོབ་མཉམ་འབྲེལ་སྒྲིག་འཛུགས་ཀྱི་འགྲོ་བ་མིའི་ཐོབ་ཐང་གྲོས་མོལ་ཚོགས་པའི་དཔོན་རིགས་ཚོར་ཉེ་བའི་ཆར་རྒྱ་ནག་ནང་ཁྲིམས་ལུགས་སྲིད་ཇུས་སྲ་བརྟན་གཏོང་བཞིན་པ་དང་། མང་ཚོགས་ཀྱི་གནས་སྟངས་དང་སྤྱི་ཚོགས་འགན་ལེན་སྲིད་ཇུས་ཁག་ལེགས་བཅོས་བྱེད་བཞིན་པ་མ་ཟད་ གྲངས་ཉུང་མི་རིགས་ཀྱི་ས་གནས་ནང་མུ་མཐུད་འཕེལ་རྒྱས་ཡོང་རྒྱུར་འབད་བརྩོན་བྱེད་བཞིན་པའི་གནས་ཚུལ་ངོ་སྤྲོད་བྱས་ལུགས་འཁོད་འདུག།