ཇོ་མོ་གླང་མའི་སྟེང་འཛེགས་ཡུལ་གྱི་འགྲོ་ལམ་བརྗེ་པོ་རྒྱག་རྒྱུ།

ན་ནིང་གི་གངས་རུད་ལ་བརྟེན་བལ་ཡུལ་གྱིས་ཇོ་མོ་གླང་མའི་སྟེང་འཛེགས་ཡུལ་གྱི་འགྲོ་ལམ་བརྗེ་པོ་རྒྱག་རྒྱུ་ཡིན་ལུགས་གསུངས་འདུག
དེ་ཡང་སྔ་ལོ་གངས་རི་ཇོ་མོ་གླང་མར་རི་འཛེགས་མཁན་གྱི་སྣེ་ཤན་པ་བལ་པོའི་ཡུལ་མི་༢༥གངས་རུད་འོག་རྐྱེན་འདས་སུ་ཕྱིན་པར་བརྟེན་། དེ་རིང་ཟླ་༢ཚེས༡༨ཉིན་བལ་ཡུལ་གྱིས་ཇོ་མོ་གླང་མའི་སྟེང་འཛེགས་ཡུལ་གྱི་འགྲོ་ལམ་བརྗེ་པོ་རྒྱག་རྒྱུ་ཡིན་ལུགས་གསུངས་ཡོད་པ་དང་། འགྲོ་ལམ་གསར་པ་དེ་བཞིན་ཇོ་མོ་གླང་མའི་དབུས་ཕྱོགས་ནས་བཟོས་ཏེ་སྔ་ལོ་གངས་རུད་ཆེན་པོ་རྒྱབ་ཡུལ་གཡོན་ཕྱོགས་ཀྱི་འགྲོ་ལམ་དེ་གཡོལ་ཐབས་གནང་རྒྱུ་ཡིན་འདུག དེ་ཡང་བལ་ཡུལ་གྱི་Sagarmathaམཁའ་རླུང་སྦག་བཙོག་སྟངས་འཛིན་ཚོགས་པ་ཞེས་པའི་གངས་འཛེགས་འགྲོ་ལམ་ཐག་ཆོད་བྱ་རྒྱུའི་དབང་ཆ་ཡོད་པའི་ལས་ཁང་དེའི་དཔོན་རིགས་Yangee Sherpaཞུ་བས། ང་ཚོས་ཇོ་མོ་གླང་མའི་སྟེང་འཛེགས་རྒྱུའི་འགྲོ་ལམ་དེ་བཞིན་དབུས་ཕྱོགས་ནས་བཟོ་དགོས་དོན་ནི། གངས་རུད་ཀྱི་ཉེན་ཁ་ཆུང་བ་དང་། གོད་ཆགས་ཀྱི་གནས་ཚུལ་མི་ཡོང་བའི་ཆེད་དུ་ཡིན་ལ་ཁུལ་དེ་ནས་འཛེགས་རྒྱུའི་ཡོ་ཆས་དང་གྲ་སྒྲིག་སོགས་བྱས་ཟིན་པ་ཡིན་ཞེས་གསུངས་འདུག
བཀྲིས་ཤར་པ་ཞུ་བ་གངས་རི་མཐོ་པོའི་སྟེང་ཐེངས་བརྒྱད་ཙམ་འཛེགས་མྱོང་ཡོད་པ་ཁོང་གིས་ དབུས་ཕྱོགས་ཀྱི་འགྲོ་ལམ་དེ་ཕྲན་བུ་དཀའ་ལས་ཁག་པ་ཡོད་ཀྱང་། གངས་དང་འཁྱགས་པ་སོགས་མར་གཟར་ཡོང་བའི་ཉེན་ཁ་མེད་པ་དང་། ལྷག་པར་དུ་འཁྱག་རོམ་དང་། གཡང་གཟར་ཅན་གྱི་འཁྱགས་པའི་གྲོག་རོང་སོགས་མེད་སྟབས་ཉེན་ཁ་ཆུང་བ་ཡོད་པ་རེད་ཅེས་གསུངས་འདུག འཛམ་གླིང་ནང་གི་གངས་རི་མཐོ་ཤོས་༡༤ནས་བརྒྱད་བལ་ཡུལ་ནང་ཡོད་པ་དང་། ལོ་ལྟར་ཕྱི་ནས་གངས་འཛེགས་པ་བརྒྱ་ཕྲག་མང་པོ་བལ་ཡུལ་ནང་ཡོང་གི་ཡོད་པ་རེད་ལ་གངས་འཛེགས་ནི་བལ་ཡུལ་གྱི་དཔལ་འབྱོར་ཡོང་འབབ་གལ་ཆེ་ཞིག་ཀྱང་ཡིན་པ་རེད།  

གསར་འགོད་པ་ཚེ་དབང་དངོས་གྲུབ།