༸གོང་ས་མཆོག་ནས་མེལ་སྦོན་དུ་མི་མང་༥༥༠༠ལ་གསུང་བཤད།

༄༅༎སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། ཟླ་བ་འདིའི་ཚེས་ ༡༡ ཉིན། ཨོ་སི་ཀྲོ་ལི་ཡའི་གྲོང་ཁྱེར་མེལ་བོན་གྱི་ཚོགས་ཆེན་ལྟེ་གནས་ཁང་ནང་། མི་གྲངས་ ༥༥༠༠ ལྷག་ལ་གསུང་བཤད་བསྩལ་གནང་བ་དང་འབྲེལ། གསུང་བཤད་ཉན་མཁན་ཁག་ཅིག་གིས་གནད་དོན་བྱེ་བྲག་གི་ཐད་ལ་བཀའ་འདྲི་ཞུས་པར་བཀའ་ལན་བསྩལ་གནང་ཡོད་པ་རེད།

དེ་ཡང་༸གོང་ས་མཆོག་གི་གསུང་བཤད་མཛད་རིམ་གོ་སྒྲིག་ཞུ་མཁན་གསར་འགོད་པ་ཆའར་ལི་པི་ཀ་རིང་གིས། འཛམ་གླིང་གི་བར་སྣང་མཁའ་དབྱིངས་ནང་། དུ་བ་དང་རྫས་ངན་འཕེན་ཏེ་གནམ་གཤིས་འགྱུར་ལྡོག་འགྲོ་བའི་ཐོག་སྟངས་འཛིན་བྱ་རྒྱུར་ཨོ་སི་ཀྲོ་ལི་ཡའི་གཞུང་དང་། མི་མང་གིས་འགན་འཁུར་ལེན་དགོས་ཀྱི་ཡོད་དམ་ཞེས་ཞུས་པའི་བཀའ་ལན་དུ། ཨོ་སོ་ཀྲོ་ལི་ཡ་ཡང་འཛམ་གླིང་འདིའི་ཆ་ཤས་རེད། བྱས་ཙང་ཨོ་སོི་ཀྲོ་ལི་ཡའི་ངོས་ནས་ འཛམ་གླིང་གི་རྩ་དོན་སེམས་ནང་འཇོག་དགོས་ཀྱི་རེད་ཅེས། ༸གོང་ས་མཆོག་གིས་བཀའ་ལན་གནང་འདུག སྐབས་དེར་འཛམ་གླིང་གི་དཔལ་འབྱོར་དཀའ་ངལ་སེལ་ཐབས་དང་། བདེ་སྐྱིད་འཚོལ་སྟངས་སོགས་ཀྱི་སྐོར་ལའང་། མི་མང་གི་ཁྲོད་ནས་བཀའ་འདྲི་ཞུས་པར་། ༸གོང་ས་མཆོག་གིས་བཀའ་ལན་གནང་ཡོད་པ་དང༌། ཐུགས་དགྱེས་འཚོར་ཆེན་པོའི་ཐོག་ནས་བོད་ཀྱི་ཆབ་སྲིད་སྐུ་དབང་མི་མང་གིས་འོས་འདེམས་བྱས་པའི་དབུ་ཁྲིད་ལ་རིམ་པས་རྩིས་སྤྲོད་གནང་རྒྱུའི་ཐུགས་ཐག་བཅད་གནང་བའི་སྐོར་ལའང་གསལ་བཤད་གནང་འདུག