ན་གཞོན་ཚོས་འབྲུག་ཡུལ་རང་བཙན་གྱི་རིན་ཐང་ཤེས་དགོས།

འབྲུག་ཡུལ་གྱི་སྲིད་བློན་ཚེ་རིང་སྟོབས་རྒྱལ་མཆོག་གིས་འབྲུག་ཡུལ་དེ་བཞིན་རང་དབང་རང་བཙན་གཙང་མའི་རྒྱལ་ཁབ་ཅིག་ཡིན་པའི་གཏམ་བཤད་གནང་བ།   
དེ་ཡང་ཚེས༧ཉིན་ཀུན་གསལ་ཞེས་པའི་འབྲུག་ཡུལ་གྱི་གསར་ལས་ཁང་གིས་གནས་ཚུལ་སྤེལ་དོན་ལྟར་ན། སློབ་པ་མཐར་སོན་པའི་འབྲུག་རྒྱལ་ཡོངས་སློབ་ཕྲུག་གི་ཟབ་སྦྱོང་མཇུག་སྒྲིལ་བའི་ཉིན་མཐའ་མར་སྲིད་བློན་ཚེ་རིང་སྟོབས་རྒྱལ་མཆོག་ནས། སློབ་པ་མཐར་སོན་པའི་སློབ་ཕྲུག་རྣམས་ཀྱིས་བསམ་ཚུལ་ཁག་གསན་པའི་རྗེས་སུ་འབྲུག་ཡུལ་གྱི་མ་འོངས་པའི་དམིགས་ཡུལ་སྐོར་བཀའ་སློབ་གནང་བ་མ་ཟད། དེང་སྐབས་རྒྱ་ནག་དང་འབྲུག་གཉིས་དབར་ས་མཚམས་ཀྱི་རྩོད་རྙོག་ཡོད་བཞིན་པའི་སྐོར་ནས་འབྲུག་ཡུལ་དེ་བཞིན་རང་དབང་རང་བཙན་གཙང་མའི་རྒྱལ་ཁབ་ཅིག་ཡིན་པ་དང་། འབྲུག་པའི་ན་གཞོན་ཚོས་ཡུལ་དེ་རང་དབང་རང་བཙན་གཙང་མའི་རྒྱལ་ཁབ་ཅིག་ཡིན་པའི་རིན་ཐང་ངེས་པར་དུ་ཤེས་དགོས་པ་དང་། འབྲུག་ཡུལ་རང་བཙན་གཙང་མའི་རྒྱལ་ཁབ་ཡིན་པ་དེ་རང་བཞིན་གྱིས་བྱུང་བ་ཞིག་མ་ཡིན་པར་ཡུལ་དེའི་མེས་པོ་རྣམས་དང་། འབྲུག་རྒྱལ་པོ་རྣམས་ཀྱིས་སྐུ་ལས་བསྐྱོན་པའི་བཀྲིན་ལ་བརྟེན་ནས་བྱུང་སྟབས་ཁོང་རྣམས་པའི་བཀྲིན་རྗེས་དྲན་ཞུ་དགོས་པའི་བཀའ་སློབ་གནང་འདུག
ཡང་ཁོང་ནས་འབྲུག་གི་མང་གཙོའི་ལམ་ལུགས་དེ་ཡང་འབྲུག་རྒྱལ་མཆོག་གིས་མི་མང་ལ་ཕྱག་རྟགས་གནང་བ་ཞིག་ཡིན་སྟབས་འབྲུག་ཡུལ་གི་ཐུན་མོང་མ་ཡིན་པའི་མང་གཙོའི་ལམ་ལུགས་སྲུང་སྐྱོབ་གནང་སྟེ་འབྲུག་གི་རང་བཙན་སྲུང་སྐྱོབ་བྱེད་དགོས་པའི་ལས་འགན་ཡུལ་དེའི་གཞོན་སྐྱེས་ཚོར་ཡོད་སྐོར་གསུངས་འདུག
སྲིད་བློན་མཆོག་ནས་ད་དུང་འབྲུག་རྒྱལ་རྣམས་ཀྱིས་ཁྱིམ་མཚེས་རྒྱལ་ཁབ་རྒྱ་གར་དང་འབྲེལ་ལམ་དམ་ཟབ་གཏོང་ཐབས་ཀྱིས་འབད་བརྩོན་ཆེན་པོ་གནང་སྟབས་ཡུལ་གྲུ་གཉིས་དབར་འབྲེལ་ལམ་བཟང་པོ་ཡོད་པ་དང་། ཡུལ་གྲུ་འདི་གཉིས་ནང་ཤེས་ཡོན་དང་འཕྲོད་བསྟེན་ལ་རིན་སྤྲོད་མི་དགོས་པའི་ཐོག་ནས་ཐོབ་ཀྱི་ཡོད་སྐོར་སོགས་བཀའ་སློབ་གནང་འདུག
གོང་ཞུས་ཟབ་སྦྱོང་ནང་བསླབ་པ་མཐར་སོན་པའི་སློབ་ཕྲུག་༢༧༠༠་ལྷག་མཉམ་ཞུགས་ཡོད་པ་རེད།

གསར་འགོད་པ་སེང་གེ་རི་བསོད་ནམས་ལྷ་མོ།