སྐུ་ཞབས་བན་ཁུའུ་མུན་བསྐྱར་དུ་རྒྱལ་ཚོཌ་དྲུང་ཆེར་བདམས།

༄༅༎འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་བན་ཁུའུ་མུན་མཆོག་བསྐྱར་དུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེར་འདེམས་ཐོན་བྱུང་བ་གཟའ་མིག་དམར་ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱིས་ཕྱིར་བསྒྲགས་གནང་འདུག དགུང་གྲངས་༦༧ལ་ཕེབས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཐོག་སྤྱི་ཁྱབ་དྲུང་ཆེ་བན་ཁུའུ་མུན་མཆོག་བསྐྱར་དུ་སྤྱི་ཁྱབ་དྲུང་ཆེར་འདེམས་ཐོན་བྱུང་ནས་དུས་སང་ཕྱི་ཟླ་དང་པོའི་ཚེས་གཅིག་ཉིན་དམ་འབུལ་གནང་ཏེ་ཕྱི་ལོ་ཉིས་སྟོང་བཅུ་དྲུག་དབར་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེའི་ཐུགས་འགན་མུ་མཐུད་བཞེས་རྒྱུ་ཡིན་འདུག འཛམ་གླིང་མཉམ་འབྲེལ་རྒྱལ་ཚོགས་ཀྱི་ཚོགས་བཞུགས་ཡུལ་གྲུ་༡༩༢ཡོད་པས་གཟའ་པ་སངས་ཉིན་འོས་ཤོག་དབྱུགས་ནས་སྐབས་རྗེས་མའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེར་བན་ཁུའུ་མུན་མཆོག་བསྐྱར་དུ་འོས་འདེམས་བྱས་ཡོད་ཅིང་ ཨ་རི་དང་ལྷོ་ཀུ་རི་ཡ་ཕ་རན་སི་རྒྱ་ནག་སོགས་ཡུལ་གྲུ་ཁག་གིས་བན་ཁུའུ་མུན་བསྐྱར་དུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་གནང་རྒྱུར་རྒྱབ་སྐྱོར་གནང་ཡོད་པ་དང་ རྒྱབ་སྐྱོར་གནང་མཁན་ཡུལ་གྲུ་ཁག་གིས་སྐུ་ཞབས་བེན་ཁུའུ་མུན་གྱིས་ཕྱི་ལོ་ཉིས་སྟོང་བདུན་ལོར་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེའི་ཐུགས་འགན་བཞེས་པའི་རྗེས་ཧད་དི་དང་ པ་ཀི་སི་ཐན་ འབར་མ་སོགས་ཡུལ་ཁག་གི་གནད་དོན་ཐོག་ཡར་རྒྱས་ལྡན་པའི་ཕྱག་ལས་གནང་ཡོད་པར་བསྔགས་བརྗོད་ཞུས་ཡོད་པ་རེད་ བསྐྱར་དུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེར་འོས་འདེམས་བྱུང་བ་སྐུ་ཞབས་བེང་ཁུའུ་མུན་གྱིས་མ་འོངས་སྤྱི་ཁྱབ་དྲུང་ཆེའི་ཐུགས་འགན་བཞེས་པའི་རིང་ སའི་གོ་ལའི་གནམ་གཤིས་འགྱུར་ལྡོག་དང་ དེ་བཞིན་རྒྱལ་སྤྱིའི་ནང་རྡུལ་ཕྲན་གྱི་གོ་མཚོན་མེད་པ་བཟོ་རྒྱུ་ ལྷག་དོན་དཀྱིལ་ཤར་ཡུལ་གྲུའི་ཞི་བདེའི་གནད་དོན་ཐོག་ཕྱག་ལས་གཙོ་བོ་གནང་རྒྱུའི་དམ་བཅའ་འཇོག་གནང་ཡོད་འདུག