ཨེ་ཤེ་ཡའི་ཡུལ་གྲུས་བོད་དོན་རྒྱབ་སྐྱོར།

༄༅༎ཕྱི་ཟླ་བརྒྱད་པའི་ཚེས་ཉི་ཤུ་དྲུག་ཉིན་རྒྱ་གར་གྱི་རྒྱལ་ས་ལྡི་ལིའི་ནང་། ཨེ་ཤེ་ཡའི་ཡུལ་གྲུའི་ནང་གི་བོད་དོན་རྒྱབ་སྐྱོར་བ་དང་། བོད་མི་བརྒྱ་ཕྲག་འགའ་ཤས་ཀྱིས་བོད་དོན་གྱི་ལས་འགུལ་གཞི་རྒྱ་ཆེན་པོ་ཞིག་སྤེལ་ཡོད་པ་དེའི་ནང་། ཆབ་སྲིད་མི་སྣ་དང་། སློབ་ཕྲུག སྤྱི་ཚོགས་ཞབས་ཞུ་བ། དམག་ཞབས་ཟུར་པ་སོགས་མང་པོ་ཞིག་མཉམ་ཞུགས་གནང་ཡོད་འདུག ལྷག་པར་དུ་ལས་འགུལ་གྱི་འདུ་འཛོམས་སར་མ་ཡན་མར་རམ་དེ་སྔ་བྷར་མ་ཞེས་འབོད་པའི་རྒྱལ་ཁབ་ཀྱི་གྲོས་ཚོགས་འཐུས་མི་ཟུར་པ་སྐུ་ཞབས་Tint Swe མཆོག་དང་། དེ་སྔ་ཕྱི་ལོ་ ༡༩༦༢ ལོར་རྒྱ་དཀར་ནག་གཉིས་དབར་དམག་འཁྲུགས་བྱུང་བའི་སྐབས་དམག་ཞབས་གནང་མྱོང་མཁན་Abdul Rasool Khan ཞུ་བའང་མཉམ་ཞུགས་གནང་བ་ཡོད་པ་མ་ཟད་ཁོང་གིས་བོད་ཀྱི་བདེན་མཐའ་སེལ་ཐབས་སུ་རྒྱ་གར་གྱི་ངོས་ནས་རོགས་རམ་བྱེད་རྒྱུར་འགན་ཡོད་རེད་ཅེས་གསུངས་འདུག དེ་དང་ཕྱོགས་མཚུངས་ཨ་རུ་ན་ཅལ་མངའ་སྡེ་དང་བལ་ཡུལ་ནས་ཀྱང་བོད་དོན་རྒྱབ་སྐྱོར་བའི་ཚོགས་མི་ཁག་ཅིག་ནས་གཏམ་བཤད་སྤེལ་གནང་ཡོད་པ་རེད།
ཡང་ལས་འགུལ་སྐབས་ལོ་ངོ་མང་པོའི་རིང་བོད་དོན་རྒྱབ་སྐྱོར་གནང་མཁན་གསར་འགོད་པ་དང་། པར་པ་སྐུ་ཞབས་Vijay Kranti མཆོག་ནས་ཀྱང་གསུང་བཤད་གནང་བའི་ནང་། ཕྱི་ལོ་ ༡༩༤༩ ལོའི་སྔོན་ལ་རྒྱ་དཀར་ནག་གཉིས་ཟེར་བའི་ས་མཚམས་ཡོད་མ་རེད་ཅེས་གསུང་བ་སོགས། གང་ལྟར་དེར་ཕེབས་པའི་གནད་ཡོད་མི་སྣ་ཚོས་བོད་དོན་རྒྱབ་སྐྱོར་མཚོན་ཆེད་གསུང་བཤད་གནང་བ་དང་། རྒྱ་གར་གཞུང་ལ་བོད་དོན་ཐོག་ཆབ་སྲིད་ཀྱི་རྒྱབ་སྐྱོར་ཤུགས་ཆེ་ཙམ་གནང་དགོས་པའི་འབོད་སྐུལ་དང་། རྒྱ་ནག་གཞུང་ནས་བོད་ནང་གི་བོད་མི་ཚོའི་ཐོག་སྡུག་སྦྱོར་མནར་གཅོད་ཀྱི་སྲིད་བྱུས་ལ་འགྱུར་བ་གཏོང་དགོས་པའི་འབོད་སྐུལ་གནང་ཡོད་པ་རེད། ལས་འགུལ་འདི་བཞིན་བོད་དོན་རྒྱབ་སྐྱོར་ཚོགས་པའི་ཚོགས་ཆེན་སྐབས་གྲོས་ཆོད་བྱུང་བའི་ཁོངས་ཀྱི་ཆ་ཤས་ཤིག་ཡིན་འདུག།