རླངས་འཁོར་སུམ་བརྒྱ་ལྷག་ནས་སྐུ་གདུང་ལ་ཕེབས་བསུ།

༄༅།    །འདི་ག་རླུང་འཕྲིན་ཁང་དུ་གནས་ཚུལ་འབྱོར་གསལ་ལྟར་ན། ཕྱི་ཚེས་༢༧ཉིན་བོད་ནང་གི་ཆུ་ཚོད་༩ཙམ་ལ་ཞིང་གཤེགས་དམ་པ་བཀའ་ཟུར་ཨ་ལགས་འཇིགས་མེད་ལྷུན་གྲུབ་མཆོག་གི་གདུང་རུས་ཟི་ལིང་གནམ་ཐང་བརྒྱུད་རེབ་གོང་དུ་འབྱོར་ཡོད་པ་དང་། སྐབས་དེར་རེབ་གོང་ནས་རླངས་འཁོར་སུམ་བརྒྱ་ལྷག་གིས་ཞིང་གཤེགས་དམ་པ་བཀའ་ཟུར་ཨ་ལགས་འཇིགས་མེད་མཆོག་གི་སྐུ་གདུང་ལ་ཕེབས་བསུ་ཞུས་འདུག།

བཀའ་ཟུར་ཨ་ལགས་འཇིགས་མེད་ལྷུན་གྲུབ་རིན་པོ་ཆེ་ནི།    སྤྱི་ལོ་༡༩༣༨ལོར་མདོ་སྨད་རེབ་གོང་རྒྱལ་བོ་དཔོན་ཚང་དུ་འཁྲུངས། དགུང་ལོ་༧ཐོག་རེབ་གོང་རོང་པོ་དགོན་ཆེན་གྱི་འཇིགས་མེད་རིན་པོ་ཆེའི་ཡང་སྲིད་དུ་ངོས་འཛིན་བྱས་ཡོད་པ་རེད།  རིན་པོ་ཆེ་ནས་བཙན་བྱོལ་དུ་ཕེབས་རྗེས་བོད་མི་མང་སྤྱི་འཐུས་སྐབས་༣།༤།༥།༦པ་བཅས་སྤྱི་འཐུས་སྐབས་བཞིའི་ལས་རྒྱུན་ལོ་༡༣རིང་གནང་ཡོད་ཅིང། དེ་སྔོན་༧གོང་ས་མཆོག་གི་སྐུ་ཚབ་ཐེངས་བཞི་པ་བོད་དུ་ཕེབས་སྐབས་སྐུ་ཚབ་ཚོགས་པའི་ཚོགས་གཞོན་གནང་མྱོང་པ་དང་།  ༡༩༨༦ལོར་ནང་སྲིད་བཀའ་བློན་ལས་རོགས་སུ་བསྐོ་བཞག་བྱུང་ཡོད་པ་དང༌། དེ་རྗེས་བདེ་སྲུང་བཀའ་བློན་གྱི་མཚན་གནས་ཐུགས་འཁུར་ལོ་བཞིའི་རིང་གནང་ཡོད་པ་རེད།  ལོ་འདིའི་ཕྱི་ཟླ་༧པའི་ཚེས་༢༦ཉིན་རིན་པོ་ཆེའི་སྙུང་གཞི་ཇེ་སྡུག་ཏུ་ཕྱིན་ནས་དགོངས་པ་རྫོགས་ཡོད་པ་རེད།   །