ཨཕ་ག་ནི་སི་ཐན་དུ་བསྐྱར་དུ་སྲིད་འཛིན་འོས་བསྡུ་བྱེད་འཆར།

༄༅༎ཨཕ་ག་ནི་སི་ཐན་ནང་རིང་མིན་སྲིད་འཛིན་གྱི་འོས་བསྡུ་བསྐྱར་དུ་གནང་རྒྱུའི་ལས་དོན་ནང་དེ་སྔོན་འོས་བསྡུ་ཐེངས་དང་པོའི་སྐབས་ནག་ཉེས་ཕོག་པའི་འོས་བསྡུའི་ལས་བྱེད་པ་རྣམས་འོས་བསྡུའི་ལས་འགུལ་གྱི་འགན་ཁུར་ནས་ཕྱིར་འབུད་གཏོང་རྒྱུ་ཡིན་པའི་གནས་ཚུལ་ཐོན་འདུག

དེ་སྔོན་ཕྱི་ཟླ་བརྒྱད་པའི་ཚེས་ཉི་ཤུ་ཉིན་ཨཕ་ག་ནི་སི་ཐན་གྱི་རྒྱལ་ཡོངས་སྲིད་འཛིན་གྱི་འོས་བསྡུའི་ནང་ལས་ཐོག་སྲིད་འཛིན་ཧ་མིརྡ་ཀར་ཛའེ་ལ་འོས་ཤོག་བརྒྱ་ཆ་ལྔ་བཅུ་ལྷག་ལོན་ཡོད་པར་གྲངས་བཤེར་བྱུང་སྟེ་སྲིད་འཛིན་གྱི་འོས་ཐོབ་ཡོད་པ་རེད། ཡིན་ཡང་སྲིད་འཛིན་གྱི་འོས་བསྡུའི་སྐབས་འོས་བསྡུ་སྐོང་ཚོགས་བྱ་ཡུལ་ས་ཁུལ་ཁག་ཏུ་འོས་བསྡུའི་ལས་བྱེད་པ་མང་པོས་སྲིད་འཛིནཀར་ཛའེ་ལ་འོས་བསྡུའི་རྒྱལ་ཁ་ཐོབ་ཐབས་ཆེད་འོས་ཤོག་རྫུན་བཟོ་བྱས་པ་དང་མི་མེད་འོས་ཤོག་འཕེན་པ་ཡང་འོས་སྒམ་རྐུ་འཁྱེར་བྱས་པ་སོགས་ཀྱི་སྐྱོན་འཛུགས་དུ་མ་བྱུང་ཡོད་པ་རེད། དེར་བརྟེན་ཉེ་སྔོན་ཨཕ་ག་ནི་སི་ཐན་ནང་མཉམ་འབྲེལ་རྒྱལ་ཚོགས་ཀྱིས་འོས་བསྡུ་ཞིབ་བཤེར་གནང་པའི་རྗེས་སྲིད་འཛིན་ཀར་ཛའེ་ལ་མང་མོས་འོས་ཤོག་བརྒྱ་ཆ་ལྔ་བཅུ་ལོན་མེད་པར་ར་སྤྲོད་བྱུང་སྟེ་མཐར་མཉམ་འབྲེལ་རྒྱལ་ཚོགས་ཀྱི་གནོན་ཤུགས་འོག་སྲིད་འཛིན་མཆོག་ནས་རིང་མིན་ཕྱི་ཟླ་བཅུ་གཅིག་པའི་ནང་འོས་བསྡུ་བསྐྱར་དུ་སྐོང་ཚོགས་གནང་རྒྱུའི་ཐག་གཅོད་གསལ་བསྒྲགས་བྱས་ཡོད་པ་རེད། ཨཕ་ག་ནི་སི་ཐན་ནང་མཉམ་འབྲེལ་རྒྱལ་ཚོགས་ཀྱི་དམིགས་བསལ་སྐུ་ཚབ་མཆོག་ནས་ཐེངས་འདིའི་འོས་བསྡུ་དེ་བཞིན་གང་ཡོང་དྲང་བདེན་དང་ཚུལ་མཐུན་གྱི་འོས་བསྡུ་འབྱུང་ཐབས་སུ་དེ་སྔོན་ནག་ཉེས་ཕོག་པའི་འོས་བསྡུའི་ལས་བྱེད་པ་རྣམས་འོས་བསྡུའི་ལས་འགུལ་ནས་ཕྱིར་འབུད་དགོས་པའི་སྐོར་སྲིད་འཛིན་ཀར་ཛའེ་ལ་སྐུལ་འདེད་ཤུགས་ཆེ་བྱས་ཡོད་པ་དང་ཁ་ས་ཨཕ་ག་ནི་སི་ཐན་གྱི་འོས་བསྡུ་ཚོགས་ཆུང་ཐོག་ནས་ཀྱང་དེ་ལྟར་ལག་བསྟར་གནང་རྒྱུའི་མོས་མཐུན་གསལ་བསྒྲགས་ཡང་བྱས་ཡོད་པ་རེད༎