ལྷ་སའི་བར་སྐོར་ལ་བསྐྱོད་པར་འགག་སྒོ་བཅུ་འགྲིམས་དགོས།

འདི་ག་རླུང་འཕྲིན་ཁང་ལ་གནས་ཚུལ་འབྱོར་དོན། དེང་སང་ལྷ་སའི་བར་སྐོར་དུ་འགྲོ་སྐབས་རྒྱ་ནག་གིས་གསར་དུ་བཙུགས་པའི་འགག་སྒོ་ ༡༠་ འགྲིམས་དགོས་ཀྱི་ཡོད་ཅིང་། འགག་སྒོ་དེ་དག་ཤག་གསར་སྒང་གི་འགག་སྒོ་དང་། ཁྲོམ་གཟིགས་སྒང་། ཤ་ཁྲོམ་བར་གྱི་འགག་སྒོ་སོགས་བཅུ་ཡོད་པ་རེད་འདུག་། བོད་མི་རྣམས་འགག་སྒོ་བརྒྱུད་ནས་འགྲོ་དུས་འཕྲུལ་ཆས་དཔར་ལེན་པ་དང་། ཡུལ་མིའི་ཐོབ་ཐང་ལག་འཁྱེར་སྟོན་དགོས་པ། བཅའ་དངོས་གང་ཡོད་པ་ཞིབ་བཤེར་བྱེད་པ་མ་ཟད་། མུ་ཟེ་དང་། མེ་སྤར་བྱེད་མེ་ལྕགས་སོགས་ཡོད་ན་བཙན་འཕྲོག་བྱེད་ཀྱི་ཡོད་འདུག

དེ་བཞིན་ལྷ་སའི་བར་སྐོར་ཁུལ་དུ་རྒྱ་ནག་གིས་ཆུ་ཚོད་ ༢༤་ རིང་བལྟ་སྲུང་ཚན་པ་ ༡༡༠་ སྡེ་ཚན་བདུན་དུ་ཆ་བགོས་བྱས་ནས་སྡེ་ཚན་རེ་རེའི་ནང་མི་གྲངས་ ༨་ ནས་ ༡༠་ ཡོད་པ་རྣམས་ཀྱིས་ཉིན་མཚན་མེད་པར་བལྟ་སྲུང་བྱེད་ཀྱི་ཡོད་པ་རེད་འདུག མ་ཟད་བར་སྐོར་དང་ཉེ་བའི་གྲོང་མི་ཨུ་ཡོན་ལྷན་ཁང་ཁག་དྲུག་ཡོད་པ་དང་། དེ་དག་སོ་སོའི་འགོ་འདོམས་པ་རྒྱ་དམག་གཉིས་ནས་གསུམ་གྱིས་ཆུ་ཚོད་ ༢༤་ རིང་བལྟ་སྲུང་བྱེད་ཀྱི་ཡོད་པ་ཤེས་རྟོགས་བྱུང་འདུག་། ད་དུང་བར་བསྐོར་གཡས་གཡོན་གྱི་ཐོག་ཁའི་སྟེང་ནས་རྒྱང་ཤེལ་བཙུགས་ཏེ་བར་བསྐོར་ནང་སོ་བལྟ་བྱེད་མཁན་དྲུག་བཙུགས་ཡོད་པ་དང་། བར་སྐོར་ཁྱོན་ཡོངས་སུ་དམག་ཆས་མ་གྱོན་་པའི་རྒྱ་མིའི་དམག་མི་ཁྱུ་དང་ཁྱུ་གང་ས་གང་དུ་མཐོང་རྒྱུ་ཡོད་པའི་དམ་བསྒྲཌ་དང་འཇིགས་བསྐུལ་གྱི་ཁོར་ཡུག་ཞིག་གི་ནང་དུ་བོད་མི་རྣམས་བསྡད་ཡོད་པ་བོད་ནས་གནས་ཚུལ་འབྱོར།