ཧུ་ཅིན་ཐའོ་ལ་ནག་ཉེས་འདུག

རྒྱ་ནག་གི་སྲིད་འཛིན་ཟུར་པ་ཧུ་ཅིན་ཐའོ་ལ་བོད་མི་རིགས་རྩ་མེད་བཟོ་ཐབས་ཀྱི་ཁྲིམས་འགལ་ནག་ཉེས་ཡོད་པའི་ཁྲིམས་གཏུགས་གྱོད་གཞི་དེར་ཉན་ཞིབ་བྱེད་རྒྱུའི་མོས་མཐུན་གནང་ཡོད་པ་རེད།

དེ་ཡང་ཟླ་བ་འདིའི་ཚེས༤ཉིན་སི་པིན་རྒྱལ་ཁབ་ཀྱི་ཡུལ་མིའི་ཆབ་འབངས་ཡིན་པའི་བོད་རིགས་དགེ་འདུན་ཐུབ་བསྟན་དབང་ཆེན་ལགས་ཀྱིས། ཉེ་སྔོན་ནས་སྔ་རྗེས་སུ་རྒྱ་ནག་གི་དཔོན་རིགས་ཚོས་བོད་ནང་བོད་མི་རིགས་རྩ་མེད་བཟོ་བའི་སྲིད་ཇུས་སོགས་ཁྲིམས་མཐུན་མིན་པའི་དྲག་གནོན་སྡུག་རྩུབ་གྱི་བྱ་སྤྱོད་རིམ་པ་ལག་བསྟར་བྱས་བ་དང་། དེ་བཞིན་ད་ཕན་བོད་མི་༡༢༡་ཙམ་གྱིེས་བོད་དོན་ཆེད་རང་ལུས་མེར་བསྲེགས་བཏང་བའི་གནད་དོན་དེ་ཚོ་ཡོང་རྐྱེན་ནི་རྒྱ་ནག་གི་དཔོན་རིགས་དེ་ཚོའི་ཁྲིམས་འགལ་གྱི་བྱ་སྤྱོད་ལས་བྱུང་བ་དང་། དེའི་འོས་འགན་ཚང་མ་རྒྱ་ནག་གི་སྲིད་འཛིན་དང་དཔོན་རིགས་ཚོར་ཡོད་པ་སི་པིན་རྒྱལ་ཁབ་ཀྱི་རྒྱལ་ཡོངས་ཁྲིམས་ཁང་ལ་ཁྲིམས་གཏུགས་རིམ་པར་རྒྱབ་ཡོད་པ་དང་། ཟླ་བ་འདིའི་ཚེས༤ཉིན་སི་པན་རྒྱལ་ཡོངས་ཁྲིམས་ཁང་གིས་ཁྲིམས་གཏུགས་གྱོད་གཞི་དེར་ཉན་ཞིབ་བྱེད་རྒྱུའི་མོས་མཐུན་གནང་ཡོད་པ་རེད།

དེའི་ཐད་འདི་གའི་རླུང་འཕྲིན་ཁང་གིས་སི་པིན་བོད་ཁང་གི་དབུ་འཛིན་ཐུབ་བསྟན་དབང་ཆེན་ལགས་སུ་བཅར་འདྲིའི་སྐབས་བརྗོད་དོན། ངའི་མིང་ཐོག་ཁྲིམས་གཏུགས་རིམ་པ་བྱས་སྐབས་ད་བར་རྒྱ་ནག་གཞུང་གིས་སི་པན་གཞུང་ལ་གནོན་ཤུགས་སྤྲད་ནས་དོན་འབྲས་མ་སོན་པའི་ཐོག་ཁྲིམས་གཏུགས་ཕྱིར་འཐེན་ཡོང་ཐབས་བྱས་ཡོད། འོན་ཀྱང་ངའི་ངོས་ནས་སི་པན་རྒྱལ་ཁབ་ཀྱི་མི་སེར་ཡིན་པ་བེད་སྤྱོད་དང་། སེམས་ཤུགས་མ་ཆག་པར་ཡང་ཡང་ཁྲིམས་གཏུགས་བྱས་མཐར་། ཉིན་ཤས་གོང་ཁྲིམས་ཁང་གི་ངོས་ནས་གསར་འགོད་གསལ་བསྒྲགས་གནང་བ་བརྒྱུད། ཁྲིམས་དཔོན་དྲུག་གིས་ཞིབ་འཇུག་རིམ་པ་བྱས་རྗེས་བོད་ནང་གི་བོད་མི་ཚོས་རྒྱ་ནག་གི་དཔོན་རིགས་ཚོའི་བྱ་སྤྱོད་ལ་བརྟེན་ནས་སྡུག་སྦྱོང་ཚད་མེད་མྱོང་བཞིན་པ་དང་། གནས་སྟངས་དེའི་ཁྲོད་བོད་མི་༡༢༡ཙམ་གྱིས་རང་ལུས་མེར་བསྲེགས་བཏང་ཡོད་པ་སོགས་ར་སྤྲོད་བྱུང་ཚུལ་དང་།  རྒྱ་ནག་གི་སྲིད་འཛིན་ཟུར་བ་ཧོ་ཅིན་ཐའོ་ལ་ནག་ཉེས་ཡོད་པ་ཁྲིམས་ཐོག་ནས་གསལ་བསྒྲགས་གནང་པ་རེད་ཅེས་དང་། ཡང་ཁོང་གིས། ང་ཙམ་མ་ཡིན་པར་རྒྱལ་ཁབ་གཞན་པའི་མི་སེར་ཆགས་པའི་བོད་མི་ཚོས་ཐོབ་ཐང་སོགས་བེད་སྤྱད་ནས་བོད་མི་གཞན་ཚོས་བོད་དོན་སྤེལ་ཕྱོགས་ཐད་ཞུ་གཏུགས་སོགས་ཀྱི་ཐབས་ལམ་འདྲ་མིན་ཡོད་པ་ཡང་ཤེས་དགོས་བ་དང་། བསམ་བློ་གཏོང་དགོས་བ་འདུག་གསུངས་ཡོད།

སི་པན་རྒྱལ་ཁབ་ཀྱི་ཁྲིམས་ཁང་ནི་རྒྱལ་སྤྱིའི་གྱོད་དོན་རིགས་ཐག་གཅོད་དང་། ལྷག་པར་དུ་རྒྱལ་སྤྱིའི་ཁྲིམས་དང་། ཡོངས་ཁྱབ་འགྲོ་བ་མིའི་ཐོབ་ཐང་གི་རྩ་འཛིན་ཡིག་ཆ་གཞིར་བཞག་སྟེང་། ཁྲིམས་འགལ་ཉེས་དོན་རིགས་ཐག་གཅོད་བྱེད་སའི་ཁྲིམས་ཁང་ཞིག་ཡིན།