སི་པེན་ཁྲིམས་ཁང་ལ་བསྐྱེལ་བའི་ཞུ་གཏུག་རྩིས་མེད་བཏང་འདུག

རྒྱ་ནག་གི་འགོ་ཁྲིད་ཟུར་བ་ཁག་གཅིག་གིས་བོད་མི་རིགས་རྩ་མེད་བཟོ་ཐབས་བྱས་བའི་ཁྲིམས་གཏུག་སི་པེན་ཁྲིམས་ཁང་གིས་རྩིས་མེད་བྱས་འདུག
གཟའ་ཟླ་བའི་མཚན་མོ་སེ་པེན་གྱི་ཆེས་མཐོའི་ཁྲིམས་ཁང་ནས་རྒྱ་ནག་གི་འགོ་ཁྲི་ཟུར་པ་ཁག་གཅིག་གིས་བོད་ནང་མི་རིགས་རྩ་མེད་བཟོ་ཐབས་ཀྱི་སྲིད་བྱུས་ལག་བསྟར་བྱས་པའི་གྱོད་གཞི་སེ་པེན་གྱི་ཁྲིམས་ཁང་ནང་ཞུ་གཏུག་བྱེད་བཞིན་ཡོད་པ་དེ་རྩིས་མེད་གཏོང་རྒྱུའི་ཐག་གཅོད་གསལ་བསྒྲགས་བྱས་འདུག
དེ་ཡང་ཞུ་གཏུག་པ་སེ་པེན་དུ་བཅའ་ཞུགས་སྐུ་ཞབས་ཐུབ་བསྟན་དབང་ཆེན་ལགས་ཀྱིས་སྤྱི་ལོ་༢༠༠༦ལོར་སེ་པེན་རྒྱལ་ཁབ་ཀྱི་ཀུན་ཁྱབ་ཁྲིམས་ལུགས་ཟེར་བ་འཛམ་གླིང་གི་ས་ཕྱོགས་གང་ཞིག་ན་འགྲོ་བ་མིའི་ཐོབ་ཐང་བརྡལ་བཤིག་བཏང་པ་དང་། རྡུང་རྡེག་མནར་གཅོད་བཏང་པ། མི་རིགས་རྩ་མེད་བཟོ་ཐབས་སོགས་ཀྱི་བྱ་སྤྱོད་སྤེལ་མཁན་གྱི་ཐོག་ཁྲིམས་བཤེར་བྱེད་ཆོག་པའི་ཁྲིམས་ལུགས་དེ་བརྒྱུད་རྒྱ་ནག་གི་འགོ་ཁྲིད་ཟུར་པ་ཅང་ཙེ་མིན་དང་། ལེ་ཕིན་ལ་སོགས་པས་འགྲོ་བ་མིའི་ཐོབ་ཐང་བརྡལ་བཤིག་བཏང་པ་དང་མི་རིགས་རྩ་མེད་བཟོ་ཐབས་ཀྱི་སྲིད་བྱུས་ལག་བསྟར་བྱས་པའི་སྐྱོན་བཙུགས་གནང་ཡོད་ཅིང་། འདི་ལོ་ཕྱི་ཟླ་གཉིས་པའི་ནང་སེ་པེན་གྱི་ཁྲིམས་ཁང་ཞིག་གིས་གྱོད་བཙུགས་བྱ་ཡུལ་རྒྱ་ནག་གི་འགོ་ཁྲིད་ཟུར་པ་དེ་དག་འཛིན་བཟུང་བྱ་དགོས་པའི་དཔྱད་ཁྲ་བཏང་ཡོད་པ་རེད།  རྒྱ་ནག་གཞུང་གིས་སེ་པེན་ཁྲིམས་ཁང་གི་ཐག་གཅོད་དེར་སྐྱོན་བརྗོད་ཤུགས་ཆེ་བྱས་པ་མ་ཟད། ཡུལ་གྲུ་གཉིས་ཀྱི་འབྲེལ་བའི་འཕེལ་རིམ་ལ་དོ་ཕོག་ཆེན་པོ་བཟོ་རྒྱུའི་ཉེན་བརྡ་རིམ་པ་བཏང་རྗེས་སེ་པེན་གཞུང་ཕྱོགས་ནས་སེ་པེན་རྒྱལ་ཁབ་ཀྱི་ཀུན་ཁྱབ་ཁྲིམས་ལུགས་ཟེར་བ་དེར་འགྱུར་བ་གཏོང་ཐབས་ཀྱི་ལས་འགུལ་འགོ་བརྩམས་པ་དང་། མཐར་སེ་པེན་གྲོས་ཚོགས་ནས་སེ་པེན་རྒྱལ་ཁབ་ཀྱི་ཀུན་ཁྱབ་ཁྲིམས་ལུགས་ཟེར་བ་དེའི་ཁྱབ་ཡུལ་འགྲོ་བ་མིའི་ཐོབ་ཐང་འགལ་འཛོལ་དང་མི་རིགས་རྩ་མེད་བཟོ་ཐབས་ཀྱི་ལས་དོན་སྤེལ་མཁན་ངེས་པར་སེ་པེན་གྱི་མི་སེར་ཞིག་དགོས་རྒྱུར་འགྱུར་བ་བཏང་ཡོད་པ་རེད།  དེར་བརྟེན་ཁ་སང་སྤྱི་ཚེས༢༣ཉིན་སི་པེན་གྱི་ཆེས་མཐོའི་ཁྲིམས་ཁང་གི་ཁྲིམས་དཔོན་དགུ་ཡོད་པ་ནས་བདུན་གྱིས་རྒྱ་ནག་གི་འགོ་ཁྲིད་ཟུར་པ་ཚོའི་ཐོག་བསྐྱལ་བའི་གྱོད་གཞི་རྩིས་མེད་གཏོང་རྒྱུ་དེ་གཙོ་བོ་ཁྲིམས་ལུགས་གསར་པ་དེ་དང་འགལ་འཛོལ་དུ་འགྲོ་གི་ཡོད་པའི་རྒྱུ་མཚན་གྱི་ཐོག་ནས་ཐག་གཅོད་བྱས་པ་ཞིག་ཡིན་འདུག   
གསར་འགོད་པ་སྐལ་ལྡན་བློ་གྲོས།