ཆུང་མ་གློད་གྲོལ་དང་ས་གནས་སུ་དམ་དྲག

རྒྱ་ནག་གིས་འཛིན་བཟུང་བྱས་བའི་དཀོན་མཆོག་ཚེ་བརྟན་ལགས་ཀྱི་ཆུང་མ་གློད་གྲོལ་བཏང་ཡོད་ཀྱང་ས་གནས་སུ་མུ་མཐུད་དམ་དྲག་བྱས་བསྡད་ཡོད་པ་རེད་འདུག

དེ་ཡང་འདི་གའི་གསར་འགོད་པས་གནས་ཚུལ་བཏང་དོན། ཉེ་སྔོན་ཕྱི་ཟླ་༡༢་པའི་ཚེས་༣་ཉིན་རྔ་བ་རྗོང་ཁོངས་གི་རྨེ་རུ་མའི་གྲོང་ཚོར་། བོད་དོན་ཆེད་རང་ལུས་མེར་བསྲེགས་བཏང་ནས་འདས་གྲོངས་སུ་ཕྱིན་པའི་དཀོན་མཆོག་ཚེ་བསྟན་ལགས་ཀྱི་བཟའ་ཟླ་རྣམ་སྣང་ལགས། ཉིན་དེར་རྒྱ་ནག་གི་འབྲེལ་ཡོད་ཚན་པས་འཛིན་བཟུང་བྱས་ཡོད་ཀྱང་། ཉིན་ཤས་རྗེས་སུ་གློད་གྲོལ་བཏང་ཡོད་པ་རེད། འོན་ཀྱང་རྨེ་རུ་མ་ཞང་ཐོག་ཏུ་རྒྱ་ནག་གི་དམག་མིས་བོད་མིའི་རླངས་འཁོར་དང་། འཕྲུལ་རྟ་མང་པོ་བཙན་འཕྲོག་གིས་བོད་མི་ཚོར་གཅར་རྡུང་དང་མུ་མཐུད་དམ་དྲག་བྱེད་བཞིན་པ་གནས་ཚུལ་ངོ་སྤྲོད་པས་བརྗོད་ཡོད།

དཀོན་མཆོག་ཚེ་བརྟན་ལགས་ཀྱིས་རྔ་བ་རྫོང་གི་རྨེའུ་རུ་ཞང་དུ་རང་ལུས་མེར་བསྲེགས་གནང་སྐབས། ༧གོང་ས་སྐྱབས་མགོན་ཆེན་པོ་མཆོག་བོད་ནང་གདན་འདྲེན་དང་། བོད་གཞིས་བྱེས་ལྷན་འཛོམས་ཞེས་སྐད་འབོད་གནང་ཡོད་པ་རེད། སྐབས་དེ་དུས་ཁོང་རྒྱ་མིའི་ལག་ཏུ་མ་ཤོར་བའི་ཆེད་བོད་མི་དང་། ཉེན་རྟོག་པའི་དབར་འཁྲུགས་འཛིང་བྱུང་སྐབས་ཁོང་གི་བཟའ་ཟླ་རྣམ་སྣང་དང་བོད་མི་ཁག་ཅིག་འཛིན་བཟུང་བཙན་འཁྲིད་བྱས་པ་ཡིན་པ་རེད་། དེ་ནས་རྒྱ་མིའི་ཉེན་རྟོག་པས་ཁོང་འབར་ཁམས་ཕྱོགས་སུ་བཙན་ཁྱེར་བྱེད་བཞིན་པའི་ལམ་ཁར་འདས་གྲོངས་སུ་ཕྱིན་པ་རེད་།

གནས་ཚུལ་དེ་བྱུང་མ་ཐག་མདོ་སྨད་རྔ་བ་རྫོང་གི་རྨེའུ་རུ་མ་ཞང་ཐོག་ཏུ། རྒྱ་ནག་གཞུང་གི་དྲག་ཆས་ཉེན་རྟོག་པ་འབོར་ཆེན་འབྱོར་ཏེ། བོད་མི་མང་པོར་གང་བྱུང་གིས་གཅར་རྡུང་དང་། འཛིན་བཟུང་བྱས་ཡོད་པ་མ་ཟད། རྨེ་རུ་མ་ཞང་ཐོག་ཏུ་ད་རུང་ཡང་དམ་དྲག་ཧ་ཅང་ཆེན་པོ་བྱས་ཏེ། ས་གནས་བོད་མི་རྣམས་ས་ཆ་གཞན་གང་དུའང་འགྲོ་བསྐྱོད་མི་ཐུབ་པར་བཟོས་ཡོད་པ་མ་ཟད། ས་གནས་གཞན་གྱི་མི་རྨེའུ་རུ་མའི་ནང་དུ་ཡོང་མི་ཐུབ་པར་བཟོས་ཡོད་པ་དང་། གནས་ཚུལ་དངོས་སུ་མཐོང་མཁན་ཅིག་གིས་བརྗོད་དོན། དཀོན་མཆོག་ཚེ་བརྟན་གྱིས་རང་ལུས་མེར་སྲེག་སྐབས་ལུས་ཡོངས་སྲིང་བལ་དཀྲིས་ཐོག་ལྕགས་སྐུད་བསྡམས་ཏེ། སྐུ་ལུས་ལ་ན་ཟུག་ཙམ་ཡང་མེད་པའི་རྣམ་པའི་སྒོ་ནས་ངོ་རྒོལ་གནང་བ་མཐོང་བྱུང་ཅེས་འགྲེལ་བརྗོད་གནང་འདུག

གསར་འགོད་པ་ཀརྨ་རྡོ་རྗེ།