པད་ནོར་རིན་པོ་ཆེའི་ཡང་སྲིད་འཁྲུངས་འདུག

སྔ་འགྱུར་རྙིང་མའི་བླ་ཆེན་ཞིང་གཤེགས་དམ་པ་གྲུབ་དབང་པད་ནོར་རིན་པོ་ཆེའི་ཡང་སྲིད་བོད་ཀྱི་དག་པོ་ས་གནས་སུ་འཁྲུངས་ཡོད་འདུག

དེ་ཡང་རྒྱ་གར་ལྷོ་ཕྱོགས་མེ་སོར་ཡོད་པའི་སྔ་འགྱུར་རྙིང་མའི་དཔལ་ཡུལ་རྣམ་གྲོལ་གླིང་ཆོས་སྒར་གྱིས་ཟླ་བ་འདིའི་ཚེས་༥ཉིན་སྤྱི་བསྒྲགས་སྤེལ་བའི་ནང་། བྱ་བྲལ་སངས་རྒྱས་རྡོ་རྗེ་འཆང་གི་ལུང་བསྟན་ནང་། སྙིང་ཐིག་ཡ་བཞིའི་གཏེར་གནས་ལེ་ལེན་ཁྲ་མོ་བྲག་གི་ཉེ་འདབས་སུ། ཞིང་གཤེགས་དམ་པ་གྲུབ་དབང་པདྨ་ནོར་བུ་རིན་པོ་ཆེ་མཆོག་གི་ཡང་སྲིད་འཁྲུལ་བྲལ་ཞེས་གསུངས་པའི་ཐོག དཔལ་ཡུལ་རྣམ་རྒྱལ་བྱང་ཆུབ་ཆོས་གླིང་གི་སྤྲུལ་སྐུ་ཐུབ་བསྟན་དཔལ་བཟང་རིན་པོ་ཆེས་ཉམས་སྣང་གཙོ་བོར་མཛད་ནས། བོད་དབུས་ཕྱོགས་དག་པོའི་ཡུལ་དུ་རྙེད་སོན་བྱུང་བ་ངོས་འཛིན་ཐག་གཅོད་གནང་འདུག

ཉེ་སྔོན་ལྷ་བབས་དུས་ཆེན་སྐབས་འབྲེལ་ཡོད་དཔལ་ཡུལ་ཆོས་བརྒྱུད་ཀྱི་བསྟན་བདག་ས་གནས་དངོས་སུ་ཕེབས་ནས་ན་བཟའ་གསོལ་བ་དང་མཇལ་དར་སྒྲོན་གནང་འདུག ཕྱི་ལོ་༢༠༡༤ལོའི་ཕྱི་ཟླ་༧པའི་ཚེས་༣༡ཉིན་དེ་ཆོས་འཁོར་དུས་ཆེན་ཉིན་བོད་ནང་གི་དཔལ་ཡུལ་མ་དགོན་དུ་ཁྲི་འདོན་མངལ་གསོལ་གནང་རྒྱུའི་ཐག་གཅོད་གནང་འདུག སྐྱབས་རྗེ་གྲུབ་དབང་པདྨ་ནོར་བུ་རིན་པོ་མཆོག་རྒྱ་གར་ལྷོ་ཕྱོགས་ན་ཡོད་པའི་རྣམ་གྲོལ་གླིང་གདན་ས་ཆེན་མོ་རུ་ཕྱི་ལོ་༢༠༠༩ལོའི་ཕྱི་ཟླ་གསུམ་པའི་ཚེས་༢༧ཉིན་དགོངས་པ་ཆོས་འབྱིངས་སུ་འཐིམ་ཡོད་པ་རེད།

གསར་འགོད་པ་ཀརྨ་རྡོ་རྗེ་དང་ལྕགས་མོ་འཚོ།