བོད་དོན་སྐོར་བསྒྲགས་གཏམ་ཤིག་སྤེལ་གནང་འདུག

༄༅།    །བོད་མི་མང་སྤྱི་འཐུས་ལྷན་ཚོགས་ཀྱི་རྒྱ་གར་བྱང་ཕྱོགས་ཁུལ་གྱི་ཞུ་གཏུག་ཚོགས་ཆུང་གིས་Bihar མངའ་སྡེའི་ནང་ཞུ་གཏུག་ལས་འགུལ་སྤེལ་བཞིན་པ་ལྟར་ཕྱི་ཚེས་ ༡༨ ཉིན་ (Lokjan shakti party)ཡི་ཚོགས་གཙོ་དང་། རྒྱལ་ཡོངས་གྲོས་ཚོགས་འཐུས་མི་(Ramvillas paswan) མཆོག་ལ་བོད་དོན་ཞུ་གཏུག་གནང་སྐབས།  ཁོང་གིས་ གསར་འགོད་པ་ཉི་ཤུ་ལྷག་གི་འདུ་འཛོམས་སར་བོད་དོན་སྐོར་བསྒྲགས་གཏམ་ཤིག་སྤེལ་གནང་འདུག ཁོང་གིས་གསུང་ན། བོད་དོན་ཞུ་གཏུག་ལས་འགུལ་བ་རྣམས་ངའི་རྩར་སླེབས་སྟེ། ཁོང་ཚོས་བོད་ནང་གི་ཛ་དྲག་དཀའ་ངལ་སྐོར་བཤད་བྱུང་། ཁོང་ཚོས་བཤད་པ་དེ་དངོས་འབྲེལ་རེད། བོད་ཀྱི་དཀའ་ངལ་དེ་ནི།    བོད་པ་གཅིག་བུའི་གནད་དོན་ཞིག་མིན་པར་རྒྱ་གར་གྱི་དཀའ་ངལ་དང་འབྲེལ་བ་ཡོད་པ་ཞིག་རེད། ང་ཚོའི་ཚོགས་པ་དང་། རྒྱ་གར་གཞུང་མང་གིས་སྔོན་ནས་བོད་དོན་ལ་རྒྱབ་སྐྱོར་ཡོད། ད་རེས་ཀྱི་ཞུ་དོན་ཁག་ཕྱི་ཟླ་གཉིས་པར་རྒྱ་གར་གྱི་གྲོས་ཚོགས་ནང་གླེང་སློང་དང་བོད་དོན་གྲོས་ཆོད་འཇོག་ཐུབ་པར་འབད་བརྩོན་བྱ་རྒྱུ་ཡིན། དེ་བཞིན་རྒྱ་གར་སྲིད་བློན་མཆོག་ལ་བོད་ཀྱི་ཛ་དྲག་དཀའ་ངལ་ཐོག་དམིགས་བསལ་ཐུགས་ཁུར་བཞེས་དགོས་པའི་འབོད་སྐུལ་ཡང་ཞུ་རྒྱུ་ཡིན་ཞེས་གསུང་འདུག དེ་བཞིན་Ram Villas Paswan ཡིས་ཕྱི་ཟླ་༢པའི་ཚེས་ ༢ ཉིན་ཁོང་ལྡི་ལིར་ཕེབས་ཀྱི་འདུག་པས་སྐབས་དེར་སྤྱི་འཐུས་རྣམ་པ་ཚོ་དང་བསྐྱར་ཏུ་མཇལ་འཕྲད་གནང་རྒྱུའི་དུས་ཚོད་བཟོས་གནང་འདུག།

དེ་བཞིན་སྤྱི་འཐུས་རྣམ་པ་ཚོས་གསར་འགོད་པའི་དྲི་བ་ཁག་ལ་ལན་འདེབས་གསལ་བཤད་ཀྱིས་གསར་འགྱུར་བརྒྱུད་ལམ་ཁག་ཏུ་བོད་དོན་དྲིལ་བསྒྲགས་ཡག་པོ་བྱུང་ཡོད་པའི་སྐོར། བོད་མི་མང་སྤྱི་འཐུས་རྨོག་རུ་བསྟན་པ་ལགས་ཀྱིས་གནས་ཚུལ་བཏང་གནང་འདུག།