རྒྱ་གར་གྱི་སྔོན་རྩིས་ནང་བདེ་སྲུང་སྔོན་རྩིས་སྤར་ཆ་གནང་འདུག

རྒྱ་གར་གཞུང་གིས་དམག་དོན་ཡར་རྒྱས་བཏང་ནས་རྒྱ་ནག་གི་དམག་དོན་གནས་སྟངས་དང་མཚུངས་པ་ཞིག་གནང་ཐབས་གནང་རྒྱུ་ཡིན་འདུག
དེ་ཡང་རྒྱ་གར་གཞུང་གིས་འདི་ལོའི་དངུལ་རྩིས་ནང་བདེ་སྲུང་གི་ཐོག་སྔོན་རྩིས་འཆར་གཞི་ལ་བརྒྱ་ཆ་༧དང་གྲངས་ཆུང་༩སྤར་ཆ་གནང་རྒྱུ་ཡིན་པ་དང་། རིམ་པས་རྒྱ་གར་གཞུང་གིས་དམག་དོན་གནམ་དམག་གནམ་གྲུ་དང་། གྲུ་གཟིངས། དེ་བཞིན་མེ་སྒྱོགས་སོགས་ཡར་རྒྱས་བཏང་ནས་རྒྱ་ནག་གི་དམག་དོན་གནས་སྟངས་དང་མཚུངས་པ་ཞིག་གནང་ཐབས་གནང་རྒྱུ་ཡིན་འདུག ཟླ༢ཚེས༢༨ཉིན་རྒྱ་གར་གྱི་དཔལ་འབྱོར་བློན་ཆེན་Arun Jaitleyམཆོག་གིས་༢༠༡༥།༡༦ལོའི་སྔོན་རྩིས་འཆར་འབུལ་གསལ་བསྒྲགས་གནང་ཡོད་པ་དང་། འདི་ལོའི་སྔོན་རྩིས་དེ་ནི་ཚོང་ལས་ཡར་རྒྱས་གཏོང་ཐབས་དང་། ཉམས་ཐག་མི་མང་ལ་རོགས་སྐྱོར་བྱ་རྒྱུའི་སྔོན་རྩིས་ཆ་སྙོམས་ཅན་ཞིག་ཡིན་ལུགས་གསུངས་འདུག དཔལ་འབྱོར་བློན་ཆེན་མཆོག་གིས་ རྒྱ་གར་གྱི་གཞུང་ལམ་དང་། ཟམ་པ། མཚོ་ཁའི་གྲུ་ཁ་སོགས་ཉམས་གསོ་གནང་རྒྱུའི་ཆེད་ཨ་སྒོར་ཐེར་འབུམ་༡༡ལྷག་སྤར་ཆ་གནང་རྒྱུ་དང་། ཉམས་ཐག་མི་མང་ས་ཡ་མང་པོར་རྒན་ཡོལ་དང་། ཉེན་སྲུང་སྤྱི་ཚོགས་བདེ་འཇགས་གི་ལས་གཞི་སོགས་ཀྱི་ལས་གཞི་གསར་པ་ཁག་ཅིག་དང་། རྒྱུ་ཆེན་ཁག་གཅིག་གིས་དཔྱ་ཁྲལ་གཡོལ་ཐབས་ཆེད་དངུལ་ཕྱི་རྒྱལ་གྱི་དངུལ་ཁང་ནང་བཞག་བཞིན་པ་ཚོར་ཉེས་པ་ལྗིད་པོ་གཏོང་རྒྱུ་ཡིན་ལུགས་གསུངས་འདུག
འདི་ལོའི་སྔོན་རྩིས་ནང་རྒྱ་གར་གཞུང་གིས་གནས་སྐབས་ལེགས་བཅོས་ཀྱི་ལས་གཞི་རྣམས་མཚམས་འཇོགས་གནང་སྟེ། དཔལ་འབྱོར་ཡར་རྒྱས་གཏོང་ཐབས་དང་། ཉམས་ཐག་མི་མང་ལ་རོགས་སྐྱོར་གནང་རྒྱུའི་སྔོན་རྩིས་དེར་རྒྱ་གར་གྱི་གསར་འགྱུར་བརྒྱུད་ལམ་ཕལ་ཆེ་བས་བསྔགས་བརྗོད་ཞུས་འདུག

གསར་འགོད་པ་ཚེ་དབང་དངོས་གྲུབ།