གྲོས་མོལ་སླར་གསོ་ཆེད་དམིགས་བསལ་སྐུ་ཚབ་བསྐོ་བཞག་གནང་བ།

རྒྱ་དཀར་ནག་བར་གྱི་ས་མཚམས་ཀྱི་རྩོད་རྙོག་ཐད་གྲོས་མོལ་སླར་གསོི་ཡོང་བའི་སླད་རྒྱ་གར་གྱིས་དམིགས་བསལ་སྐུ་ཚབ་བསྐོ་བཞག་གནང་འདུག
དེ་ཡང་རྒྱ་གར་གཞུང་གིས་རྒྱ་དཀར་ནག་དབར་གྱི་ས་མཚམས་ཀྱི་རྩོད་རྙོག་ཐད་གྲོས་མོལ་སླར་གསོི་ཡོང་བའི་སླད། རྒྱ་གར་གྱི་སྲིད་བློན་མཆོག་གིས་རྒྱ་གར་གྱི་བདེ་འཇགས་སྲུང་སྐྱོབ་སློབ་སྟོན་པ་སྐུ་ཞབས་Ajit Dovalདམིགས་བསལ་སྐུ་ཚབ་ཏུ་དེ་རིང་བསྐོ་བཞག་གནང་ཡོད་པ་དང་། སྐུ་ཞབས་Ajit Dovalནི་རྒྱ་གར་གྱི་སྲིད་བློན་Narendra Modiམཆོག་དང་འབྲེལ་བ་ཉེ་པོ་ཅན་དང་། དབང་ཚད་མཐོ་ཞིང་། ནུས་ལྡན་ཅན་གྱི་གཞུང་ཞབས་ཤིག་ཡིན་པ་རེད། ཁོང་གིས་རྒྱ་ནག་གི་རྒྱལ་སྲུང་སློབ་སྟོན་པ་ཡང་ཇི་ཅི་ལྷན་དུ་ས་མཚམས་ཐད་གྲོས་མོལ་བསྐྱར་གསོ་གནང་སྟེ་རྩོད་རྙོག་དེ་ཐག་གཅོད་གནང་ཐབས་གནང་རྒྱུ་ཡིན་པ་རེད།
རྒྱ་གར་དང་རྒྱ་ནག་དབར་གྱི་ས་མཚམས་ཐད་ཀྱི་རྩོད་རྙོག་དེ་བཞིན་ཐག་གཅོད་ཡོང་བའི་ཆེད་དུ། འདས་པའི་ལོ་རབས་ཀྱི་སྔོན་དང་དེ་རྗེས་སུ་རྒྱལ་ཁབ་གཉིས་ཀའི་ཆེས་མཐོའི་དཔོན་རིགས་དབར་གྲོས་མོལ་ཐེངས་༡༧གནང་ཀྱང་གྲུབ་འབྲས་ཐོན་མེད་ཙང་ད་ཆ་སླར་ཡང་གྲོས་མོལ་བསྐྱར་གསོ་བརྒྱུད་ཐག་གཅོད་གནང་རྒྱུའི་ཁས་ལེན་གནང་གི་ཡོད་པ་རེད། རྒྱ་ནག་གི་ངོས་ནས་རྒྱ་གར་ཤར་ཕྱོགས་ཁུལ་གྱི་ས་ཁྱོན་སྤྱི་ལེ་ཁྲི་༩ཙམ་རྒྱ་ནག་ལ་བདག་དབང་ཡོད་ལུགས་གླེང་གི་ཡོད་པ་དང་། རྒྱ་ནག་གིས་བདག་བཟུང་བྱས་པའི་ནུབ་ཕྱོགས་Aksai Chinཞེས་པའི་ས་ཁུལ་གྱི་ས་ཁྱོན་སྤྱི་ལེ་སུམ་ཁྲི་བརྒྱད་སྟོང་ཙམ་རྒྱ་གར་ལ་བདག་དབང་ཡོད་ལུགས་རྒྱ་གར་གྱི་ཕྱོགས་ནས་བརྗོད་ཀྱི་ཡོད་པ་རེད། ད་ལོའི་ཕྱི་ཟླ་༩པའི་ནང་རྒྱ་ནག་གི་སྲིད་འཛིན་ཞི་ཅི་ཕིན་གྱིས་རྒྱ་གར་དུ་གཞུང་འབྲེལ་གཟིགས་བསྐོར་ཐོག་མར་གནང་བར་ཕེབས་པའི་སྐབས། རྒྱ་ནག་མི་མང་བཅིངས་བཀྲོལ་དམག་མིས་ལ་དྭགས་ཁུལ་དུ་སིམ་འཛུལ་བྱས་ཏེ་ཡུལ་གཉིས་དབར་གྱི་དམག་མིའི་དབར་གདོང་ཐུག་ཕྲན་བུ་བྱུང་ཡོད་པ་རེད། གང་ལྟར་ཡང་རྒྱ་གར་གྱི་སྲིད་འཛིན་ལས་ཁུངས་ཀྱིས་དེ་རིང་གཏམ་བཤད་འགྲེམས་སྤེལ་གནང་བའི་ནང་གསལ་ལྟར་ན། རྒྱ་གར་གྱི་བདེ་འཇགས་སྲུང་སྐྱོབ་སློབ་སྟོན་པ་སྐུ་ཞབས་Ajit Doval གྱིས་རྒྱ་ནག་གི་རྒྱལ་སྲུང་སློབ་སྟོན་པ་ཡང་ཇི་ཅི་ལྷན་དུ་ས་མཚམས་ཐད་གྲོས་མོལ་བསྐྱར་གསོ་གཙོས་པའི་ཡུལ་གཉིས་དབར་གྱི་འབྲེལ་བའི་གནད་དོན་ཐད་འཐབ་ཇུས་ལྡན་པའི་བཀའ་མོལ་གནང་རྒྱུ་ཡིན་པ་རེད།     

གསར་འགོད་པ་འབེན་པ་སྟོབས་རྒྱལ།