གཏོར་བཤིག་མི་དགོས་པའི་འབོད་སྐུལ།

ནང་སྲིད་བཀའ་བློན་མཆོག་གིས་ཧི་མཱ་ཅལ་མངའ་སྡེའི་བློན་ཆེན་མཆོག་ལ་རྡ་སའི་བོད་མིའི་སྡོད་ཁང་གཏོར་བཤིག་མི་དགོས་པའི་འབོད་སྐུལ་ཞུས་འདུག

དེ་ཡང་ཟླ་༡༠ ཚེས་ ༡ ཉིན་བཙན་བྱོལ་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་Shri Virbhadra Singh མཆོག་དང་མཇལ་འཕྲད་གནང་ནས། རྡ་ས་མེག་གྷན་ཁུལ་བོད་ཀྱི་ཟློས་གར་ཚོགས་པ་དང་། བྷག་སུ་ལམ་ཟུར་དུ་ཡོད་པའི་བོད་མིའི་སྡོད་ཁང་ཁག་ ༢༡༠ ཙམ་ཡོད་པ་དེ་དག་བོད་མིའི་བདེ་སྡུག་གནས་སྟངས་ལ་གཞིགས་གཏོར་བཤིག་མི་དགོས་པའི་འབོད་སྐུལ་ཞུས་ཡོད་འདུག སྐབས་དེར་ད་དུང་གལ་སྲིད་སྡོད་ཁང་གཏོར་བཤིག་བཏང་བ་ཡིན་ན། བོད་མི་དེ་དག་གི་འཚོ་བའི་མདུན་ལམ་ལ་ཧ་ཅང་དཀའ་ངལ་འཕྲད་རྒྱུ་ཡིན་པ་སོགས་བདེ་སྡུག་གནས་སྟངས་ཡར་ཞུ་དང་། གང་ཐུབ་རོགས་རམ་ཡོང་བའི་འབོད་སྐུལ་ཤུགས་ཆེ་ཞུས་ཡོད་འདུག

སྤྱི་ཁྱབ་བློན་ཆེན་མཆོག་ནས་ཀྱང་རྫོང་དཔོན་མཆོག་ Deputy Commissioner དང་འབྲེལ་བ་གནང་སྟེ་ས་གནས་བོད་མིའི་གནས་སྟངས་སྐོར་ལས་བསྡོམས་ལ་གཟིགས་ཞིབ་གནང་སྟེ་བོད་མིའི་སྡོད་ཁང་དང་ལམ་ཟུར་ཁྲོམ་ས་སོགས་ཀྱི་དཀའ་ངལ་དེ་དག་སེལ་ཆེད་ཐབས་ཤས་གང་ཡོད་གནང་རྒྱུ་ཡིན་པའི་ཁས་ལེན་ཡང་གནང་ཡོད་འདུག