སར་ཀོ་ཛི་ཡིས་༸གོང་ས་མཆོག་མཇལ་འཕྲད་གནང་རྒྱུ།

༄༅༎ཡོ་རོབ་མནའ་འབྲེལ་གྱི་རེས་འཁོར་གཙོ་འཛིན་ཕ་རན་སིའི་སྲིད་འཛིན་སར་ཀོ་ཛི་ཡིས་པོ་ལནྜ་ལ་ཟླ་བཅུ་གཉིས་པའི་ཚེས་དྲུག་ཉིན་༸གོང་ས་མཆོག་དང་མཇལ་འཕྲད་གནང་རྒྱུ་ཡིན་པའི་གསལ་བསྒྲགས་གནང་ཡོད་པ་དང་སྐབས་དེ་དུས་ཁོང་རྣམ་པ་པོ་ལནྜ་ལ་་དེ་སྔ་མཐུན་སྒྲིལ་བཟོ་ཚོགས་ཀྱི་ལས་འགུལ་སྐུལ་སྤེལ་གནང་མཁན་སྲིད་འཛིན་ཟུར་པ་བ་བན་སར་ནོའོ་བའེ་ཞི་བའི་བྱ་དགའ་ཐོབ་ནས་ལོ་ཉིས་ཤུ་ལྔ་འཁོར་བའི་དྲན་གསོར་ཕེབས་ཞུགས་གནང་གི་ཡོད་ཅིང་སྲིད་འཛིན་སར་ཀོ་ཛི་ནས་༸གོང་ས་མཆོག་ནི་གཞན་སུ་ལས་ལྷག་པའི་ཆེ་ཐོངས་ཧ་ཅང་ཆེན་པོ་ཞུ་འོས་པ་ཞིག་ཡིན་པ་དང་བོད་མིར་གཉའ་གནོན་བཏང་ན་མི་འགྲིག་ཅིང་མི་ཚང་མ་དང་འདྲ་བ་བོད་མི་ཚོ་ལའང་རང་དབང་ལོངས་སུ་སྤྱོད་པའི་དབང་ཆ་ལྡན་ཡོད་ཅེས་གསུང་གླེང་གནང་འདུག  འདི་ལོ་ཟླ་བརྒྱད་པའི་ནང་པེ་ཅིན་དུ་ཨོ་ལིམ་པིཀས྄་རྩེད་འགྲན་སྐབས་སུ་སྐབས་དེར་ཕ་རན་སིར་འཚམས་འདྲིར་ཕེབས་པའི་༸གོང་ས་མཆོག་ལ་ཕ་རན་སིའི་ཕྱི་སྲིད་བློན་ཆེན་དང་སྲིད་འཛིན་གྱི་ལྕམ་ནས་མཇལ་འཕྲད་ཞུས་པ་ལས་སྲིད་འཛིན་སར་ཀོ་ཛི་ནས་མཇལ་འཕྲད་ཞུས་མེད་པར་བརྟེན་སྲིད་འཛིན་སར་ཀོ་ཛི་ནས་རྒྱ་ནག་གི་གནོན་ཤུགས་ལ་ལྟོས་ནས་བོད་ཀྱི་གནད་དོན་རྐྱེན་ལས་པེ་ཅིན་ཨོ་ལིམ་པིཀས྄་རྩེད་འགྲན་ལ་བཀག་འགོག་བྱེད་ཐུབ་མེད་པར་ཕྱི་ཕྱོགས་ནས་སྐྱོན་བརྗོད་བྱུང་ཡོད་པ་རེད༎