གྲོས་ཚོགས་ཀྱི་ལས་བྱེད་དང་གཞོན་སྐྱེས་ལ་བཀའ་སློབ།

༧གོང་ས་མཆོག་ཨ་རིའི་རྒྱལ་སར་ཕེབས་ནས་གྲོས་ཚོགས་ཀྱི་ལས་བྱེད་དང་གཞོན་སྐྱེས་ཁག་ཅིག་ལ་བཀའ་སློབ་བསྩལ་རྒྱུ་ཡིན་པ་རེད་འདུག
ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱེད་པའི་American Enterprise Institute ཞེས་པའི་ཆབ་སྲིད་དང་དཔལ་འབྱོར་ཚོང་ལས་ཞིབ་འཇུག་ཁང་གིས་ཇི་ལྟར་གསོལ་འདེབས་ཞུགས་པ་ལྟར། བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་རིང་མིན་ཨ་རིའི་རྒྱལ་ས་ཝ་ཤིང་ཊོན་དུ་ཆིབས་བསྒྱུར་བསྐྱངས་ཏེ་གྲོས་ཚོགས་ཀྱི་ལས་བྱེད་དང་གཞོན་སྐྱེས་ཁག་ཅིག་ལ་བཀའ་སློབ་སྩལ་གཏན་འཁེལ་འདུག
དེ་ནི་ཟླ་བ་འདིའི་ཚེས་༡༨ཉིན་༧གོང་ས་སྐྱབས་མགོན་ཆེན་པོ་མཆོག ཨ་རིའི་རྒྱལ་ས་ཝ་ཤིན་ཊོན་དུ་༧ཞབས་སོར་འཁོད་རྗེས་ཕྱི་ཚེས་༡༩ཉིན་༧གོང་ས་༧སྐྱབས་མགོན་ཆེན་པོ་མཆོག་གི་ཆིབས་བསྒྱུར་གོ་སྒྲིག་ཞུ་མཁན་ American Enterprise Institute ཞེས་པའི་ཚོང་ལས་སྒྲིག་འཛུགས་ཀྱི་ཉམས་ཞིབ་པ་དང་ཚོགས་མི། དེ་བཞིན་གྲོས་ཚོགས་ཀྱི་ལས་བྱེད་སོགས་ལ་འགོ་ཁྲིད་ཀྱིས་འཛམ་གླིང་ནང་ཡར་རྒྱས་གཏོང་ཐུབ་ཅེས་པའི་བརྗོད་གཞིའི་ཐོག་བཀའ་སློབ་དང་། ཕྱི་ཚེས་ ༢༠ ཉིན་གོང་ཞུས་ཚོང་ལས་སྒྲིག་འཛུགས་དེ་དང་། སེམས་དང་སྲོག་གི་ཞིབ་འཇུག་ཚན་པ་གཉིས་ཟུང་འབྲེལ་ཐོག་གོ་སྒྲིག་ཞུས་པའི་བཟང་སྤྱོད་དང་ལྡན་པའི་ཚོང་ལས་བྱེད་ཕྱོགས། དེ་བཞིན་འགྲོ་བ་མིའི་བདེ་སྐྱིད་སྐྲུན་ཐབས། ཕན་ཚུན་ཡིད་ཆེས་བློས་འགེལ་ཐོག་ནས་འཛམ་གླིང་འདིའི་ནང་སྤྱི་ཚོགས་ཀྱི་གནས་སྟངས་ཡར་རྒྱས་གཏོང་ཕྱོགས་བཅས་པའི་བརྗོད་གཞིའི་བགྲོ་གླེང་ཚོགས་འདུའི་ཐོག་བཀའ་སློབ་སྩལ་རྒྱུ་ཡིན་འདུག
བགྲོ་གླེང་ཚོགས་འདུ་དེ་དག་གི་ནང་ཨ་རིའི་ནང་གི་ཚོང་ལས་དང་། ཆབ་སྲིད་མི་སྣ། ཤེས་ཡོན་ཅན། མཁས་དབང་སོགས་མང་དག་ཅིག་མཉམ་ཞུགས་གནང་འཆར་ཡོད་པ་རེད་འདུག དེ་བཞིན་ཡང་རིང་མིན་སྤྱི་ཟླ་༣པའི་ཚེས་༧ཉིན་༧གོང་ས་མཆོག་གིས་ཨ་རིའི་རྒྱལ་སར་ཡོད་པའི་National Cathedralཡེ་ཤུ་ཚོགས་ཁང་དུ་མང་ཚོགས་ལ་བཀའ་སློབ་བཀྲིན་ཆེ་གནང་མཛད་རྒྱུའི་མཛད་འཆར་གཏན་འཁེལ་ཟིན་ཡོད་འདུག
གསར་འགོད་པ་ངག་དབང་ཆོས་འཕེལ