དབུ་མའི་ལམ་ལ་རྒྱ་རིགས་ཤེས་ལྡན་པས་རྒྱབ་སྐྱོར།

དེ་ཡང་The Times of India ཞེས་པས་གནས་ཚུལ་སྤེལ་བའི་ནང༌། ཚེས་༡༣ཉིན་གསར་འགོད་འདུ་འཛོམས་སྐབས་༧གོང་ས་མཆོག་གིས་བོད་དོན་ཐོག་ལ་རྒྱ་མི་རིགས་དོ་སྣང་བྱེད་མཁན་ཇེ་མང་དུ་འགྲོ་གི་ཡོད་པ་དང་། ༢༠༠༨ནས་བཟུང་རྒྱ་མི་རིགས་ཤེས་ལྡན་པས་དབུ་མའི་ལམ་གྱི་སྲིད་ཇུས་ལ་རྒྱབ་སྐྱོར་ཡོད་པའི་རྩོམ་ཡིག་སྟོང་ཕྲག་སྤེལ་བ་བྱུང་ཡོད་པ་དང༌། རྩོམ་ཡིག་དེ་ཚོའི་ནང་དོན་ནི། རྒྱ་ནག་གཞུང་གི་སྲིད་ཇུས་ལ་སྐྱོན་བརྗོད་དང་མཉམ་བོད་ནང་འཛིན་པའི་སྲིད་ཇུས་གུ་ཡངས་གཏོང་དགོས་བ་བཤད་པ་སོགས་བོད་རྒྱའི་དཀའ་རྙོག་སེལ་ཐབས་དབུ་མའི་ལམ་གྱི་སྲིད་ཇུས་ལ་རྒྱ་ནག་ནང་གི་རྒྱ་རིགས་ཤེས་ལྡན་པ་རྒྱབ་སྐྱོར་ཞུ་མཁན་ཇེ་མང་ཡིན་པ་གསུངས་འདུག གསར་འགོད་པ་གཅིག་གིས། ༧གོང་ས་སྐྱབས་མགོན་ཆེན་པོ་མཆོག་ཞལ་བཞུགས་པའི་སྐུ་དུས་རིང་བོད་ལ་རང་དབང་ཐོབ་རྒྱུའི་ཐུགས་རེ་གནང་གི་ཡོད་མེད་བཀའ་འདྲི་ཞུས་པར། རྒྱ་ནག་ནང་གི་མི་དམངས་དང༌། ལྷག་པར་དུ་རྒྱ་ནག་གི་ཤེས་ཡོན་ཅན་ཚོར་འདོད་བློ་མི་ཁེངས་པའི་གནས་སྟངས་ཡོང་བཞིན་ཡོད། བདེན་པར་མཐའ་ཡོད་པར་སོང༌། ངོས་རང་ལ་རེ་བ་ཡོད།  རྒྱ་ནག་གི་གོ་མཚོན་དང་དྲག་པོའི་དབང་ཤུགས་དེ་དུས་ཚོད་རིང་པོ་གནས་ཐུབ་ཀྱི་མ་རེད་ཅེས་བཀའ་ལན་གནང་འདུག