འབྲུག་ཡུལ་དེང་རབས་ཅན་ལ་མཆོང་བསྐྱོད་བྱས་བ།

འབྲུག་ཡུལ་ནང་ལག་ཐོགས་ཁ་པར་བེད་སྤྱོད་བྱེད་མཁན་ཇེ་མང་དུ་འགྲོ་བཞིན་ཡོད་པ་དེ་ དེང་རབས་ཅན་ལ་མཆོང་བསྐྱོད་བྱས་བ་རེད་ཟེར།
དེ་ཡང་གནས་ཚུལ་ལྟར་ན། དེང་སྐབས་འབྲུག་ཡུལ་ནང་ལག་ཐོགས་ཁ་པར་བེད་སྤྱོད་བྱེད་མཁན་མང་བའི་གནས་ཚུལ་དེས། འབྲུག་ཡུལ་གྱི་རྒྱལ་ཁབ་དེ་བཞིན་ཞིང་བྲན་ལམ་ལུགས་ནས་བཟོ་པའི་གསར་བརྗེའི་དུས་རབས་བརྒྱུད་མ་དགོས་པར་དེང་དུས་ལ་མཆོངས་བསྐྱོད་བྱས་པ་ཞིག་ཆགས་ཀྱི་ཡོད་པ་རེད་ཅེས་འབྲུག་གི་གསར་འགོད་པ་ལམ་བཟང་ལགས་ཀྱིས་གནས་ཚུལ་སྤེལ་བ་དང་། འབྲུག་རྒྱལ་ཁབ་ལ་མི་འབོར་འབུམ་བདུན་དང་ཕྱེད་ཀ་ཙམ་ཡོད་པ་དང་། ད་ལྟ་ཡུལ་དེའི་ནང་ལག་ཐོགས་ཁ་པར་བེད་སྤྱོད་བྱེད་མཁན་གྱི་གྲངས་འབོར་དེ་འབུམ་ལྔ་དང་ཕྱེད་ཀ་ཙམ་ཆགས་ཀྱི་ཡོད་པ་མ་ཟད། དེའི་ཁོངས་ནས་མི་འབོར་འབུམ་གཅིག་དང་ཁྲི་གཉིས་ཙམ་ཞིག་གིས་དྲ་རྒྱ་བེད་སྤྱོད་བྱེད་ཀྱི་ཡོད་པ་ཉམས་ཞིབ་བྱུང་ཡོད་པ་རེད། ལོ་ངོ་བཅུ་ཕྲག་འགའ་ཤས་རིང་འབྲུག་ཡུལ་གྱི་མི་སེར་རྣམས་ཀྱི་མི་ཚེ་སྐྱེལ་སྟངས་ཐོག་ཧ་ཅང་གི་འགྱུར་བ་ཆེན་པོ་ཕྱིན་ཡོད། དེ་ནི་འབྲུག་ཡུལ་ནང་ཕྱི་ཤུགས་རྐྱེན་མི་ཡོང་ཆེད་གཞུང་ཕྱོགས་ནས་ཚོད་འཛིན་བྱས་བ་བརྒྱུད་ཕྱི་ལོ་༡༩༩༩ལོ་ཙམ་ནས་མ་གཏོགས་བརྙན་འཕྲིན་བེད་སྤྱོད་བྱེད་འགོ་བཙུགས་ཐུབ་མེད་པ་དང་། སྐབས་དེར་ཡུལ་གྱི་མི་འབོར་གྱི་བརྒྱ་ཆ་༢༥ ཙམ་ཞིག་ལ་མ་གཏོགས་སྐམ་གློག་གི་མཐུན་རྐྱེན་མེད་ནའང་ད་ཆ་ཡུལ་གྱི་མི་མང་ཚང་མར་སྐམ་གློག་གི་མཐུན་རྐྱེན་ཡོད་པ་རེད། འབྲུག་ཡུལ་ནང་འཕྲུལ་རིགས་ཐོག་ཧ་ཅང་གི་འགྱུར་བ་ཆེན་པོ་འགྲོ་བཞིན་པ་དེར་འབྲུག་ཡུལ་གྱི་སྲིད་བློན་ཚེ་རིང་སྟོབས་རྒྱལ་ལགས་ཀྱིས་དགའ་བསུ་གནང་བ་ལས་དེར་ངོ་རྒོལ་གྱི་རྣམ་པ་སྟོན་གནང་གི་མེད་པ་རེད། དེ་ཡང་སྲིད་བློན་ཚེ་རིང་སྟོབས་རྒྱལ་ལགས་ཀྱིས་འཕྲུལ་རིཊ་ནི་འབྲུག་ཡུལ་ཡར་རྒྱས་ཕུན་སུམ་ཚོགས་པ་ཡོང་རྒྱུར་ཕན་ཐོགས་ཡོང་གི་རེད་ཅེས་གསུང་འདུག
གསར་འགོད་པ་ལྷུན་གྲུབ་ཚེ་རིང༌།